କଳାହାଣ୍ଡି ଜୟପାଟଣାରେ ଅଭାବନୀୟ କାଣ୍ଡ : ଦିନରେ ବିଜ୍ଞାନ,ରାତିରେ ଅନ୍ଧବିଶ୍ୱାସର ପାଠ
କଳାହାଣ୍ଡି : ଏକବିଂଶ ଶତାବ୍ଦୀରେ ଅନ୍ଧବିଶ୍ୱାସର ଏଭଳି ରୂପ ଦେଖିଲେ ବିସ୍ମିତ ଲାଗିବ । ହେଲେ ଏସବୁ ଖଟୁଛି ଆମ ଚାରିପାଖରେ । ଏହି ଦୃଶ୍ୟ ହେଉଛି କଳାହାଣ୍ଡି ଜୟପାଟଣା ବ୍ଲକ ଅଂଚଳରେ ଚାଲିଥିବା ମନ୍ତ୍ରତନ୍ତ୍ର ଦୃଶ୍ୟ । ରୋଗରୁ ମୁକ୍ତି ପାଇବା ପାଇଁ ଚାଲିଛି କାଳିସୀ ପୂଜା । ସବୁଠୁ ବିଡମ୍ବନାର କଥା ହେଉଛି, ଏହା କୌଣସୀ ତାନ୍ତ୍ରିକ ପୀଠ ନୁହେଁ, ଏହା ଚାଲିଛି ଏକ ସ୍କୁଲ ଘରେ । ଜୟପାଟଣା ବ୍ଲକ ଅନ୍ତର୍ଗତ ବଡକର୍ଲାକୋଟ ପଂଚାୟତର ସରକାରୀ ହାଇସ୍କୁଲରେ ଚାଲିଛି ଏହି କାଣ୍ଡ କାରଖାନା । ଯେଉଠି ବିଜ୍ଞାନ ପଢାଯିବା କଥା, ସେହି ପଢାଯାଉଛି ଅନ୍ଧବିଶ୍ୱାସର ପାଠ । ୬-୭ ଜଣ ଝିଅଙ୍କୁ ଆଗରେ ରଖି ତନ୍ତ୍ର ପୂଜା ଚାଲିଛି । ଏହି ପୂଜାରେ ଦିଆଯାଇଛି ପାରା ବଳି । ସବୁଠୁ ଆଶ୍ଚର୍ଯ୍ୟର କଥା ହେଉଛି ଏ ସବୁ ଚାଲିଛି ସ୍କୁଲର ପ୍ରଧାନ ଶିକ୍ଷକଙ୍କ ଅନୁମତିରେ ।
Kanak News is now on WhatsApp
Join and get latest news updates delivered to you via WhatsApp
ବିଜ୍ଞାନର ଏତେ ଅଗ୍ରଗତି ପରେ, ସ୍ୱାସ୍ଥ୍ୟ ସେବାର ଅତ୍ୟାଧୁନିକ ବ୍ୟବସ୍ଥା ପରେ ବି ସମାଜରୁ ଦୂର ହୋଇପାରୁନି ଅନ୍ଧବିଶ୍ୱାସ । ଯାହାର ପରିଣତି ହେଉଛି ଏହି ତନ୍ତ୍ରପୂଜା । ସ୍କୁଲରେ ଭୂତ ଥିବା ନେଇ ପ୍ରଚାର ଓ କିଛି ଛାତ୍ରୀ ଅସୁସ୍ଥ ହେବା ପରେ ଚାଲିଛି ଏଭଳି ଝଡାଫୁଙ୍କା । ଖୋଦ ପ୍ରଧାନ ଶିକ୍ଷକ ଓ ଖେଳ ଶିକ୍ଷକ ଏଥିରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିବା ଅଭିଯୋଗ ହେଉଛି । ୬ ଦିନ ଧରି ରାତି ଅଧରେ ଏଠି ତାନ୍ତ୍ରୀକ ପୂଜା ପାଠ କରାଯାଉଛି । ସ୍କୁଲ ହଷ୍ଟେଲରେ ରହୁଛନ୍ତି ୧୧୦ ଛାତ୍ରୀ । ଏଭଳି ଏକ ଅଭାବନୀୟ ଘଟଣାକୁ ନେଇ ଆମେ ଜିଲ୍ଲା ଶିକ୍ଷା ଅଧିକାରୀଙ୍କୁ ଜଣାଇବା ପରେ ଜୟପାଟଣା ବ୍ଲକ ଶିକ୍ଷା ଅଧିକାରୀ, ସିଆରସି ଓ ଡବ୍ଲୁଇଓ ଯାଇ ଘଟଣାର ତଦନ୍ତ କରିଛନ୍ତି ।