ଛାତ୍ରଛାତ୍ରୀଙ୍କ ଭବିଷ୍ୟତକୁ ନେଇ ସାଂଘାତିକ ଖେଳ । ପରୀକ୍ଷା ଖାତାରେ ଉତ୍ତର ଲେଖିବା ପରେ ବି ମିଳିନି ମାର୍କ, ରିଚେକିଂ ପରେ ସାମନାକୁ ଆସିଲା ସତ ।
କନକ ବ୍ୟୁରୋ : ଛାତ୍ରଛାତ୍ରୀଙ୍କ କ୍ୟାରିୟର ସହ କେମିତି ଖେଳାଯାଉଛି ତାର ଏକ ନମୁନା ସାମ୍ନାକୁ ଆସିଛି । ଯୁକ୍ତ ଦୁଇ ଖାତା ଦେଖାରେ ବାହାରିଛି ସାଙ୍ଘାତିକ ତ୍ରୁଟି । ଯାହା ଯୁକ୍ତ ଦୁଇ କାଉନସିଲର ପାରିବାପଣିଆ ଉପରେ ବଡ ପ୍ରଶ୍ନ ଠିଆ କରିଛି । ଅସ୍ମିତା ମହାନ୍ତି । ଭୁବନେଶ୍ୱର ରମାଦେବୀ ମହିଳା କଲେଜରେ ଚଳିତ ବର୍ଷ ଯୁକ୍ତ ଦୁଇରେ ପରୀକ୍ଷା ଦେଇଥିଲେ । ରେଜଲ୍ଟ ବାହାରିବା ପରେ ଆଶାନୁରୂପ ମାର୍କ ମିଳିନଥିଲା । ଆଉ ଏହାପରେ ରିଚେକିଂ ପାଇଁ ଆବେଦନ କଲେ ଅସ୍ମିତା । ଆବେଦନ ପରେ ଇଂରାଜୀ ପେପରର ଉତ୍ତର ଖାତା ମିଳିଥିଲା । ଦେଖନ୍ତୁ ଇଂରାଜି ପେପରର ଉତର ଖାତା ।
Kanak News is now on WhatsApp
Join and get latest news updates delivered to you via WhatsApp
୮ନଂ ପ୍ରଶ୍ନରେ ୧୦ ମାର୍କ ଥିବା ବେଳେ ଅସ୍ମିତା ଉତ୍ତର ଲେଖିଛନ୍ତି କିନ୍ତୁ ଶିକ୍ଷକ କୌଣସି ମାର୍କ ଦେଇନାହାନ୍ତି । ସେମିତି ୨ନଂ ଏବଂ ୩ନଂ ପ୍ରଶ୍ନର ଉତ୍ତର ଲେଖାଯାଇଥିବା ବେଳେ କୌଣସି ମାର୍କ ଦିଆଯାଇନାହିଁ ।
ମୂଲ୍ୟାଙ୍କନରେ ହୋଇଥିବା ତ୍ରୁଟି ଯୋଗୁଁ ଯୁକ୍ତ ୩ ଆଡମିଶନରେ ଅସୁବିଧା ଭୋଗୁଛନ୍ତି ଅସ୍ମିତା । ଆଉ ଏଥିପାଇଁ କାଉନସିଲକୁ ଦାୟୀ କରିଛନ୍ତି ଅସ୍ମିତାଙ୍କ ବାପା । ଯୁକ୍ତ ଦୁଇ କାଉନସିଲର ଚେୟାରମ୍ୟାନଙ୍କୁ ଭେଟିବା ପରେ ସେ କହିଛନ୍ତି, ୮ ମାସରୁ ଅଧିକ ସମୟ ଲାଗିବ । ଯାହାକି ଅସ୍ମିତାଙ୍କ ଭବିଷ୍ୟତ ପାଠପଢାରେ ବାଟ ଓଗାଳି ପାରେ । ଛାତ୍ରଛାତ୍ରୀଙ୍କ ଭବିଷ୍ୟତ ନିର୍ଭର କରୁଛି ଯୁକ୍ତ ଦୁଇ ପରୀକ୍ଷା ଫଳ ଉପରେ । ହେଲେ ଏପରି ମୂଲ୍ୟାଙ୍କନ ପୁଣି ଥରେ କାଉନସିଲର ପାରିବାପଣିଆ ଉପରେ ପ୍ରଶ୍ନ ଛିଡା କରିଛି ।