ସିଲଭର ଗର୍ଲଙ୍କୁ ସ୍ୱାଗତ : ହାଇଦ୍ରାବାଦ ଫେରିଲେ ପିଭି ସିନ୍ଧୁ
Kanak News is now on WhatsApp
Join and get latest news updates delivered to you via WhatsApp
ରିଓ ଅଲିମ୍ପିକ୍ସରେ ବ୍ୟାଡମିଂଟନରେ ରୈାପ୍ୟ ପଦକ ଜିତି ଇତିହାସ ସୃଷ୍ଟି କରିଥିବା ପିଭି ସିନ୍ଧୁ ଫେରିଛନ୍ତି ନିଜ ଘର ହାଇଦ୍ରାବାଦକୁ । ସଫଳତାର ସ୍ୱର୍ଣ୍ଣିମ ଇତିହାସ ରଚିଥିବା ସହରର ଝିଅ ସିନ୍ଧୁଙ୍କୁ ସ୍ୱାଗତ ଜଣାଇବା ପାଇଁ ଲୋକଙ୍କ ମଧ୍ୟରେ ଭିଡ ଜମିଥିଲା । ଏହି ସିଲଭର ଗର୍ଲର ଗୋଟେ ଝଲକ ପାଇବାକୁ ସମସ୍ତେ ଖୁସିରେ ଝୁମି ଉଠିଥିଲେ ।
ସିନ୍ଧୁଙ୍କ ସଫଳତା ଦେଶ ପାଇଁ ଖୁବ୍ ଗୈାରବର କଥା। ହାଇଦ୍ରାବାଦ ବିମାନ ବନ୍ଦରରେ ନିଜ ଗୁରୁ ପୁଲେଲା ଗୋପୀଚନ୍ଦଙ୍କ ସହ ପହଂଚିବାପରେ ସିନ୍ଧୁଙ୍କୁ ବିପୁଳ ସ୍ୱାଗତ ସମ୍ବର୍ଦ୍ଧନା ଦିଆଯାଇଛି । ଡବଲ ଡେକର ବସରେ ସିନ୍ଧୁ ଓ ଗୋପୀଚନ୍ଦ ବିମାନବନ୍ଦରରୁ ବାହାରି ଗଚିବାୱଲି ଷ୍ଟାଡିୟମ ପର୍ଯ୍ୟନ୍ତ ବିଜୟ ଶୋଭାଯାତ୍ରାରେ ଯାଇଥିଲେ । ଷ୍ଟାଡିୟମରେ ଆୟୋଜିତ ସ୍ୱତନ୍ତ୍ର କାର୍ଯ୍ୟକ୍ରମରେ ଯୋଗ ଦେଇଥିଲେ ସିନ୍ଧୁ ଓ କୋଚ୍ ଗୋପୀଚନ୍ଦ । ସିନ୍ଧୁଙ୍କ ସ୍ୱାଗତ ଶୋଭାଯାତ୍ରାରେ ତାଙ୍କ ପରିବାର ଓ ସର୍ମ୍ପକୀୟଙ୍କ ସହ ଶତାଧିକ ଫ୍ୟାନଙ୍କ ଭିଡ ଦେଖିବାକୁ ମିଳିଥିଲା।
ସିନ୍ଧୁଙ୍କୁ ଶୁଭେଚ୍ଛା ଓ ସମ୍ମାନ ଜଣାଇବା ପାଇଁ ସକାଳୁ ଲୋକମାନେ ବିମାନ ବନ୍ଦରରେ ରୁଣ୍ଡ ହୋଇଥିଲେ। ସିନ୍ଧୁଙ୍କ ସ୍ୱାଗତ ପାଇଁ ସହରର ସ୍ଥାନେ ସ୍ଥାନେ ପୋଷ୍ଟର ଓ ବ୍ୟାନର ମଧ୍ୟ ଲଗାଯାଇଥିଲା। ଏକ ପାରମ୍ପରିକ ଅନ୍ଧାଜରେ ଦେଶର ଏହି ସୁନାଝିଅକୁ ଗଚିବାୱଲି ଷ୍ଟାଡିୟମରେ ସ୍ୱାଗତ କରାଯାଇଥିଲା। ହାଇଦ୍ରାବାଦର ସ୍କୁଲପିଲାମାନେ ବି ଏହି ସିଲଭର ଗର୍ଲଙ୍କୁ ସ୍ୱାଗତ କରିଥିଲେ ।
ସେପଟେ ସିନ୍ଧୁଙ୍କୁ କୋଚିଂ ପ୍ରତି ଅଧିକ ଧ୍ୟାନ ଦିଆଯିବ ବୋଲି ରାଜ୍ୟ ସରକାର କହିଛନ୍ତି । ୨୦୨୦ରେ ଟୋକିଓରେ ହେବାକୁ ଥିବା ଅଲିମ୍ପିକ୍ସକୁ ନଜରରେ ରଖି ତାଙ୍କୁ ଅଧିକ ତାଲିମ ଦିଆଯିବ ବୋଲି ଉପମୁଖ୍ୟମନ୍ତ୍ରୀ ସୂଚନା ଦେଇଛନ୍ତି । ଖେଳର ମହାକୁମ୍ଭ କୁହାଯାଉଥିବା
ଏହି ରିଓ ଅଲିମ୍ପିକ୍ସ ୧୬ ଦିନରେ ସମାପନ ହୋଇଛି । ଶେଷ ଦିନରେ ବି ଉଦଘାଟନ ଦିନ ପରି ରଙ୍ଗାରଙ୍ଗ ଝଲକ ଦେଖିବାକୁ ମିଳିଥିଲା ରିଓରେ ।