ପଖାଳ: ଛପନ ଭୋଗରେ କାଳିଆ ଖାଏ, ଛପର ଘରେ ଗରିବଟିଏ ପ୍ରତିଦିନ ଖାଏ ।
କନକ ବ୍ୟୁରୋ: ପଖାଳକୁ ପରିଚୟ ଦରକାର ନାହିଁ । ପଖାଳ ପ୍ରତିଟି ଓଡ଼ିଆର ପରିଚୟ, ଜଣେ ଗରିବର ଦାମୀ ଖାଦ୍ୟ, ଅଭାବୀର ଶେଷ ଆଶା, ଭୋକ ମେଣ୍ଟାଉଥିବାର ପରିଭାଷା । ଦାରୁଦିଅଁଙ୍କ ଛପନ ଭୋଗରେ ହେଉ କି ଦୁଃଖୀରଙ୍କୀର ନିତିଦିନିଆ ଖାଦ୍ୟ, ସେଠି ଏଠି ସବୁଠି ଶୀଘ୍ର ପ୍ରସ୍ତୁତ ହେଉଥିବା ବ୍ୟଞ୍ଜନ ମଧ୍ୟରୁ ପଖାଳ ଭାତ ହେଉଛି ସମସ୍ତଙ୍କ ପ୍ରିୟ ।
Kanak News is now on WhatsApp
Join and get latest news updates delivered to you via WhatsApp
କୋଶଳା ଶାଗକୁ ପୋଇ ରାଇ…
ଦହି ପଖାଳକୁ ଲୁଣି ଶୁଖୁଆ ଖାଇ
ସ୍ୱାଦ ବଢ଼ିଯିବ ଥିଲେ ବଡ଼ିଚୁରା ବସା ଦହି
ସଜ ପଖାଳ…ବାସି ପଖାଳ…ଚାଇଁ ପଖାଳ…ଦହି ପଖାଳ । ଏମିତି ଅନେକ ପ୍ରକାରର ପଖାଳ ଆପଣ ଓଡ଼ିଆଙ୍କ ଘରେ ପାଇବେ । ମ୍ୟାଗୀଠୁ ବି ଯଦି କେଉଁ ଖାଦ୍ୟ କମ୍ ସେକେଣ୍ଡରେ ପ୍ରସ୍ତୁତ କରି ହେବ ତାହା ହେଉଛି ପଖାଳ ଭାତ । ସାଧାରଣତଃ ଓଡ଼ିଆଙ୍କ ପାରମ୍ପରିକ ଖାଦ୍ୟ ଭାବେ ବେଶ୍ ପରିଚିତ ଏହି ପଖାଳ କଂସା ।
ପଖାଳକୁ ନେଇ କେହି କେହି କୁହନ୍ତି, ଲାଲ୍ ଟହ ଟହ ପାତଲଘଟାଁ, ଧାନ ମିରଚା ନୁନେ… ଚିଟକି ଚିଟକି ଖାଏମା ପୁତା, ବାସି ପଖାଳର ସାଙ୍ଗେ । ପୂର୍ବ-ପଶ୍ଚିମ, ଉତ୍ତର ଦକ୍ଷିଣ ଓଡ଼ିଶାର କୋଣ ଅନୂକୋଣରେ ପଖାଳ ଭାତକୁ କିଏ କେଉଁ ପ୍ରକାରରେ ବାଖ୍ୟା କରିପାରେ କିନ୍ତୁ ପଖାଳ ଭାତ ପାଇଁ ସମାନ ଭାବ, ସମାନ ଆବେଗ କଂସାରେ ଭରି ରହିଥାଏ ।
ଆଧୁନିକ ଜମାନାରେ ଜଙ୍କ୍ ଫୁଡ୍ ଯୁବପୀଢ଼ିଙ୍କ ସ୍ୱାସ୍ଥ୍ୟ ସମସ୍ୟା ବଢ଼ାଉଥିବାବେଳେ ପଖାଳ କଂସାଏ ପେଟ ପାଇଁ ଭଲ ଆଉ ଶରୀର ପାଇଁ ପ୍ରତିରୋଧକ ଭଳି କାମ କରିଥାଏ ବୋଲି ବିଶେଷଜ୍ଞ ମାନେ କୁହନ୍ତି । ପଖାଳ ଭାତର ମୁନ୍ଦେ ତୋରାଣୀ ଥକାପଣ ମେଣ୍ଟାଇବା ସହ ପେଟର ବିଭିନ୍ନ ସମସ୍ୟାରୁ ମୁକ୍ତି ଦେଇଥାଏ ।
ପଖାଳ ସହ ଖାଦ୍ୟ କହିଲେ, ବଡ଼ିଚୁରା, ମାଛ ଭଜା, ଶାଗ ଭଜା, ଆମ୍ବ ଧନିଆ ଚଟଣି, ତେନ୍ତୁଳି ଖଟା ଆଦି ଲାଗିଥାଏ । ଯୁଗ ବଦଳିବା ସହ ଏବେ ପଖାଳ କଂସାରେ ଆଉ କେହି କାହାର ପରିଚୟ ଖୋଜୁ ନାହାନ୍ତି । ବରଂ ପେଟେ ପଖାଳ ଖୁଆଇ ଅତିଥି ସକ୍ରାର କରାଯାଉଛି । ସେଥିପାଇଁ ତ ଚାଳିଆଠୁ ଆରମ୍ଭ କରି ଫାଇଭ୍ ଷ୍ଟାର ହୋଟେଲ ମାନଙ୍କରେ ଏବେ ପଖାଳ ବି ଏକ ମେନ୍ୟୁ ଭାବେ ରହିଛି ।
ଆଜି ବି ଯଦି ଆପଣ ସହରୀ ରାଇଜରୁ ଆଖି ଫେରାଇ ଗାଁର ଗଳିକନ୍ଦି ଅଗଣାକୁ ଅନେଇବେ, ବଡ଼ିଚୁରା, ଶାଗ ଭଜା ସହ ପଖାଳ ବେଲାଏ ଦେଖିବାକୁ ପାଇବେ । କାରଣ ଅଦିନିଆ ମେଘ ପରି ସହରରେ ପାଳନ ହୁଏ ପଖାଳ ଦିବସ । ହେଲେ ଗାଁ ଗହଳିରେ ପଖାଳ ପ୍ରତିଦିନ ପାଳନ ହେଉଥିବା ପର୍ବ, ସଜ ପଖାଳ ଭଳି ସବୁଦିନିଆ ସୁଖ ।