କନକ ବ୍ୟୁରୋ : ଚଳିତ ରଥଯାତ୍ରାକୁ କିଭଳି ଶୃଙ୍ଖଳିତ ଭାବେ ସମାପନ କରିହେବ ସେନେଇ କେନ୍ଦ୍ରାଞ୍ଚଳ ଆରଡିସି ଡି.ଭି ସ୍ୱାମୀଙ୍କ ଅଧ୍ୟକ୍ଷତାରେ ହୋଇଛି ଏସଓପି ବୈଠକ । ବିଶେଷ କରି ରଥଯାତ୍ରାରେ ଯଦି କୌଣସି କାରଣରୁ ଦୁର୍ଘଟଣା ହୁଏ, ତେବେ କିଭଳି ଘଟଣା ସ୍ଥଳରେ ଏନଡିଆରଏଫ, ଓଡ୍ରାଫ, ଡାକ୍ତରୀଦଳ ସହ ଆମ୍ବୁଲାନ୍ସ ଉଦ୍ଧାରକାରୀ ଦଳ ପହଁଚିବ ସେନେଇ ମକଡ୍ରିଲ କରାଯାଇଛି । ତେବେ ଏହାକୁ ସିସିଟିଭି କଣ୍ଟ୍ରୋଲ ରୁମ ମାଧ୍ୟମରେ ଅପରେସନ କରିବା ପାଇଁ ମଧ୍ୟ ନିଷ୍ପତି ନିଆଯାଇଛି । ଉଦ୍ଧାରକାରୀ ଦଳଙ୍କ ସହ ନୟୋଜିତ ହେବାକୁଥିବା ସମସ୍ତ ବିଭାଗକୁ ନେଇ ପରୀକ୍ଷାମୂଳକ ଭାବେ ପୁରୀର ୪ ଟି ସ୍ଥାନରେ ମକଡ୍ରିଲ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ ବିଶ୍ୱ ପ୍ରସିଦ୍ଧ ରଥଯାତ୍ରାରେ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସମାଗମକୁ ଦୃଷ୍ଟିରେ ରଖି ଆତଙ୍କବାଦୀ ଆକ୍ରମଣକୁ ଏଡ଼ାଇବା ପାଇଁ ଏସଓଜି ଓ ଟାକ୍ଟିକାଲ ଫୋର୍ସ ମୂତୟନ କରାଯିବାର ବ୍ୟବସ୍ଥା କରାଯାଇଛି । ତେବେ ଆସନ୍ତା କାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଶେଷ ରଥ ପରିଚାଳନା ସମନ୍ୱୟ କମିଟି ବୈଠକ ହେବାର କାର୍ଯ୍ୟକ୍ରମ ରହିଛି । ବର୍ତ୍ତମାନ ସୋସିଆଲ ମିଡିଆର ଟ୍ରେଣ୍ଡ ହୋଇଥିବାରୁ ରଥଯାତ୍ରାକୁ ଶୃଙ୍ଖଳିତ ଓ ସରକାରୀ ବିଭାଗ ମଧ୍ୟରେ ସମନ୍ୱୟ ବଜାୟ ରଖିବା ପାଇଁ ପ୍ରତିଟି ଘଟଣା ଓ ସମସ୍ୟାକୁ ଅଫିସିଆଲ ହ୍ୱାଟ୍ସଆପ ଗ୍ରୁପରେ ପୋଷ୍ଟ କରିବାକୁ ନିର୍ଦ୍ଦେଶ ଦିଆଯାଇଛି ।
ଏହି ବୈଠକରେ ପୁରୀ ଜିଲ୍ଲାପାଳ, ଅତିରିକ୍ତ ଜିଲ୍ଲାପାଳ, ଏସପି, ସିଡିଏମଓ, ରାଜ୍ୟ ବିପର୍ଯ୍ୟୟ ପରିଚାଳନା ଓ ପ୍ରଶମନ ବିଭାଗ ଅଧିକାରୀ, ପୌରସଂସ୍ଥା ଅଧିକାରୀଙ୍କ ସହ ଏନଡିଆରଏଫ, ଓଡ୍ରାଫ ଅଧିକାରୀମାନେ ଉପସ୍ଥିତ ଥିଲେ । ତେବେ କିଭଳି ଚଳିତ ରଥଯାତ୍ରାକୁ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ବଜାୟ ରଖି କାର୍ଯ୍ୟ କରି ହେବ ତାହା ଉପରେ ଗୁରୁତ୍ୱାରୋପ କରିଥିଲେ କେନ୍ଦ୍ରାଞ୍ଚଳ ଆରଡିସି ।