ରାତିର ଶତ୍ରୁ , ଦିନରେ ମିତ୍ର
ଭୁବନେଶ୍ୱର ବ୍ୟୁରୋ, କନକ ନ୍ୟୁଜ୍ : ବିଷ୍ଣୁ ଦାସ ଏବଂ ରାଜଶ୍ରୀ ମଲ୍ଲିକ । ଜଗତସିଂହପୁର ବିଜେଡିର ଏହି ଦୁଇ ନେତାଙ୍କ ମଧ୍ୟରେ ବିବାଦ ବହୁ ପୁରୁଣା । ମଦ ବ୍ୟବସାୟୀ ତଥା ଠିକାଦାର ରାସବିହାରୀ ଦାସଙ୍କ ସହ ଲିଙ୍କ ନେଇ ପୂର୍ବରୁ ମୁହାଁମୁହିଁ ହୋଇଥିଲେ ବିଜେଡିର ଏହି ଦୁଇ ନେତା । ହେଲେ ଆଜି କିନ୍ତୁ ଦେଖିବାକୁ ମିଳିଥିଲା ଏକ ଭିନ୍ନ ଦୃଶ୍ୟ । ରାଜ୍ୟସଭା ପାଇଁ ନାମାଙ୍କନପତ୍ର ଦାଖଲ ବେଳେ ବିଷ୍ଣୁ ଦାସଙ୍କ ପାଇଁ ପ୍ରସ୍ତାବକ ସାଜିଥିଲେ ତିର୍ତୋଲ ବିଧାୟିକା ରାଜଶ୍ରୀ ମଲ୍ଲିକ । ବିଷ୍ଣୁ ଦାସଙ୍କ ପକ୍ଷରୁ ଦାଖଲ କରାଯାଇଥିବା ଦୁଇଟି ସେଟ୍ ମଧ୍ୟରୁ ପ୍ରଥମ ସେଟରେ ପ୍ରସ୍ତାବକ ଭାବେ ନାଁ ରହିଥିଲା ରାଜଶ୍ରୀ ମଲ୍ଲିକଙ୍କର । ତେବେ ଉଭୟଙ୍କ ମଧ୍ୟରେ ଥିବା ବିବାଦର ସମାଧାନ ପାଇଁ ହୁଏତ ଏହି ନିର୍ଦେଶ ଦେଇଥାଇପାରନ୍ତି ବିଜେଡି ସୁପ୍ରିମୋ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ବିଷ୍ଣୁ ଦାସଙ୍କ ସହ ରାଜ୍ୟସଭା ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି ବିଜେଡିର ଆଉ ଦୁଇ ପୁରୁଖା ନେତା । ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ବିଧାନସଭା ରିଟର୍ଣିଂ ଅଫିସରଙ୍କ ନିକଟରେ ପ୍ରାର୍ଥିପତ୍ର ଦାଖଲ କରିଛନ୍ତି ପ୍ରସନ୍ନ ଆଚାର୍ଯ୍ୟ ଏବଂ ଏନ୍.ଭାସ୍କର ରାଓ । ୩ ଜଣ ପ୍ରାର୍ଥୀଙ୍କ ପାଇଁ ମୋଟ ୬୦ ଜଣ ପ୍ରସ୍ତାବକ ଥିଲେ ।
ଜଣେ ପ୍ରାର୍ଥୀ ରାଜ୍ୟସଭାକୁ ନିର୍ବାଚିତ ହେବା ପାଇଁ ୩୭ ଜଣ ବିଧାୟକଙ୍କ ସମର୍ଥନ ଆବଶ୍ୟକ । ତେଣୁ ସଂଖ୍ୟା ଦୃଷ୍ଟିରୁ ବିଜେଡିର ଏହି ୩ ପ୍ରାର୍ଥୀ ନିଦ୍ୱର୍ନ୍ଦ୍ୱରେ ନିର୍ବାଚିତ ହେବା ନିଶ୍ଚିତ । ଭୁପିନ୍ଦର ସିଂ, ବୈଷ୍ଣବ ପରିଡା ଓ ପ୍ୟାରିମୋହନ ମହାପାତ୍ରଙ୍କ କାର୍ଯ୍ୟକାଳ ଶେଷ ହେବା ପରେ ତାଙ୍କ ସ୍ଥାନରେ ଏହି ତିନି ନେତା ରାଜ୍ୟସଭା ଯିବେ ।