ଖାଲଖମା ରାସ୍ତାରେ ଆସିପାରିଲା ନାହିଁ ଆମ୍ବୁଲାନ୍ସ : ଖଟିଆରେ ଅଢେଇ କିଲୋମିଟର ବୁହା ହେଲେ ଗର୍ଭବତୀ,ହସ୍ପିଟାଲ ଯିବା ବାଟରେ ଜନ୍ମଦେଲେ ଶିଶୁପୁତ୍ର
କନକ ବ୍ୟୁରୋ : ଆସନ୍ନ ପ୍ରସବାଙ୍କ ପାଇଁ ଅଡୁଆ ହେଲା ରାସ୍ତା । ଗାଁକୁ ରାସ୍ତା ନଥିବାରୁ ଠିକାଣା ସମୟରେ ଘର ପାଖରେ ପହଂଚି ପାରିଲାନାହିଁ ଆମ୍ବୁଲାନ୍ସ । ତେଣୁ ପ୍ରସବ ବେଦନାରେ ଛଟପଟ ହେଉଥିବା ଗର୍ଭବତୀଙ୍କୁ ଅଢେଇ କିଲୋମିଟର ରାସ୍ତା ଖଟିଆରେ ବୋହି ଆମ୍ବୁଲାନ୍ସ ପାଖକୁ ନେଇଥିଲେ ପରିବାର ଲୋକ । ଆଉ ଆମ୍ବୁଲାନ୍ସରେ ଡାକ୍ତରଖାନା ଯିବା ବାଟରେ ଶିଶୁ ପୁତ୍ରକୁ ଜନ୍ମ ଦେଇଛନ୍ତି ନବରଙ୍ଗପୁର ଜିଲ୍ଲା ଉମରକୋଟ ତେଲାରୀ ଗାଁର ଦସାଇ ସାନ୍ତା । ବର୍ଷା ଯୋଗୁ ତେଲାରୀ ଗାଁର ରାସ୍ତା ମାଟିକାଦୁଅ ଯୋଗୁଁ ଗମନାଗମନ ପାଇଁ ଅସୁବିଧା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ତେଣୁ ୧୦୨ ଆମ୍ବୁଲାନ୍ସ ତେଲାରୀ ଗାଁକୁ ନଯାଇ ଅଢେଇ କିଲୋମିଟର ଦୂର ମାଲଗେଡା ଗାଁ ପାଖରେ ଅଟକି ରହିଥିଲା । ତେଣୁ ଦସାଇଙ୍କ ପରିବାର ଲୋକ ତାଙ୍କୁ ଖଟିଆରେ ବସାଇ ଆମ୍ବୁଲାନ୍ସ ଯାଏଁ ଆଣିଥିଲେ । ସେଠାରୁ ତାଙ୍କୁ ଉମରକୋଟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେବା ବାଟରେ ସେ ଶିଶୁ ପୁତ୍ରଟିଏ ଜନ୍ମ ଦେଇଛନ୍ତି । ପରେ ଉଭୟ ମା ଓ ନବଜାତକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ସେମାନଙ୍କ ଅବସ୍ଥା ଭଲ ଥିବା ଜଣାପଡିଛି ।
ସୂଚନାଯୋଗ୍ୟ କିଛି ଦିନ ପୂର୍ବରୁ ରାୟଗଡା ଜିଲ୍ଲା ଉପାନ୍ତ ଅଞ୍ଚଳର କଲ୍ୟାଣସିଂହପୁର ଲଣ୍ଡାବାଲ ଗ୍ରାମରେ ଏପରି ଏକ ଘଟଣା ଘଟିଥିଲା । ଗାଁ ର ଜଣେ ମହିଳାଙ୍କ ଦେହ ହଠାତ ଖରାପ ହେବା କାରଣରୁ ତାଙ୍କ ସମ୍ପର୍କୀୟମାନେ ସରକାରଙ୍କ ପକ୍ଷରୁ ଉପଲବ୍ଧ ହେଉଥିବା ମାଗଣା ଆମ୍ବୁଲାନ୍ସ ୧୦୮ କୁ ଫୋନ କରିଥିଲେ । ତେବେ ଆମ୍ବୁଲାନ୍ସ ନ ଆସିବାରୁ ବାଧ୍ୟ ହୋଇ ନିକଟ ସମ୍ପର୍କୀୟ ଓ ସ୍ଥାନୀୟ ଅଞ୍ଚଳର ଯୁବକ ମାନେ ମହିଳାଙ୍କୁ ଏକ ଲୁଗାରେ ବାଉଁଶ ଦେଇ ବୋହିକି ମେଡ଼ିକାଲ ନେଇଥିଲେ ।