କନକ ବ୍ୟୁରୋ : ବିଜେପି ନେତା ତଥା କେନ୍ଦ୍ରମନ୍ତ୍ରୀ ନୀତିନ ଗଡକରୀଙ୍କ ବୟାନକୁ ନେଇ ଏବେ ବିରୋଧୀ ଶିବିରରେ ଚର୍ଚ୍ଚା । ନୀତିନ ଗଡକରୀ ଗତ କିଛି ଦିନ ହେବ ଏମିତି କିଛି ବୟାନ ଦେଇଛନ୍ତି ଯାହା ମୋଦି ସରକାରଙ୍କୁ ବ୍ୟାକଫୁଟକୁ ଠେଲି ଦେଉଥିବା ବେଳେ ବିଜେପି ସରକାରଙ୍କୁ ଟାର୍ଗେଟ କରିବାକୁ ବିରୋଧୀ ଦଳକୁ ଖୋରାକ ଯୋଗାଉଛି । ଆଉ ମୋଦି ସରକାରଙ୍କ ଏହି ଅବୁଝା ମନ୍ତ୍ରୀଙ୍କୁ ନେଇ ଏବେ ଦେଶରେ ଚାରିଆଡେ ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ବିଜେପିର ଏହି ବରିଷ୍ଠ ନେତା ଏମିତି ଏକ ବୟାନ ଦେଇଛନ୍ତି ଯାହା ମୋଦି ସରକାରଙ୍କୁ ଅଡୁଆରେ ପକାଇଛି । କେବଳ ଅଡୁଆରେ ପକାଇନି ବରଂ ବିରୋଧୀଙ୍କୁ ମଧ୍ୟ ବେଶ ସୁହାଇଛି । ହଜାର ହଜାର ଲୋକଙ୍କ ସାମ୍ନାରେ ନିର୍ବାଚନ ପୂର୍ବରୁ ଦିଆଯାଇଥିବା ପ୍ରତିଶୃତିକୁ ମନେପକାଇ ଗଡକରୀ କହିଥିଲେ, ସ୍ୱପ୍ନ ଦେଖାଉଥିବା ନେତାଙ୍କୁ ଲୋକେ ଭଲ ପାଇଥାନ୍ତି । କିନ୍ତୁ ଦେଖାଇଥିବା ସ୍ୱପ୍ନ ଯଦି ପୂରଣ ନ ହୁଏ ତେବେ ଲୋକେ ମାଡ ମାରିବାକୁ ମଧ୍ୟ ପଛାଇ ନାହାନ୍ତି । ତେଣୁ ଲୋକଙ୍କୁ ସେହି ସ୍ୱପ୍ନ ଦେଖାଅ ଯାହାକୁ ପୂରଣ କରି ପାରିବ । ମୁଁ ସେହି ସ୍ୱପ୍ନ ଦେଖାଇବା ବ୍ୟକ୍ତି ନୁହେଁ । ଆଉ ଏଭଳି କହି ସ୍ୱପ୍ନ ଦେଖାଉଥିବା ନେତାଙ୍କୁ ଟାର୍ଗେଟ କରିଥିଲେ ନୀତିନ ।
ତେବେ ନୀତିନଙ୍କ ଏହି ବୟାନ ବିରୋଧୀ ଶିବିରକୁ ବେଶ ସୁହାଇଛି । କାରଣ ପୂର୍ବରୁ ବିରୋଧୀ ଦଳ ଗୁଡିକ ମଧ୍ୟ ମୋଦି ସରକାର ମିଛ ସ୍ୱପ୍ନ ଦେଖାଉଥିବା ବାରମ୍ବାର କହି ଆସିଛନ୍ତି । ଆଉ ଏଭଳି ସମୟରେ ଗଡକରୀଙ୍କ ବୟାନ ବିରୋଧୀ ଦଳ ଗୁଡିକ ପାଇଁ ବଡ ଅସ୍ତ୍ର ଭାବେ ଉଭା ହୋଇଛି । ସିଧାସଳଖ ନହେଲେ ବି ଗଡକରୀଙ୍କ ଏହି ବୟାନ ମୋଦିଙ୍କ ପାଇଁ ଉଦ୍ଦିଷ୍ଟ ଏକଥା ବିରୋଧୀ ଶିବିରରେ ଚର୍ଚ୍ଚା ହେଉଛି ।
Good to see Union Minister @nitin_gadkari concurring with our view that the Modi Govt was built on jumlas and fake promises. pic.twitter.com/DewDbnd16w
— Congress (@INCIndia) October 8, 2018
ଏହା ପୂର୍ବରୁ ମଧ୍ୟ ଗତ ବର୍ଷ ଗଡକରୀଙ୍କ ଏମିତି ଏକ ବୟାନ ଆସିଥିଲା ଯାହା ମୋଦି ସରକାରଙ୍କୁ ଅଡୁଆ ଜାଲରେ ଛନ୍ଦି ଦେଇଥିଲା । ସେତେବେଳେ ନିର୍ବାଚନ ସମୟରେ ବଡ ବଡ ପ୍ରତିଶୃତି ଦେଇ କିଭଳି କ୍ଷମତାକୁ ଆସିହେବ ତାହାର ପର୍ଦ୍ଦାଫାଶ କରିଥିଲେ ଗଡକରୀ । କହିଥିଲେ, ଜନତାଙ୍କୁ ଲମ୍ବା ଚଉଡା ପ୍ରତିଶୃତି ଦେବାକୁ କିଛି ଲୋକ ଆମକୁ କହିଥିଲେ । କିନ୍ତୁ ଶାସନ କ୍ଷମତାକୁ ଆସିବା ପରେ ଯେତେବେଳେ ଲୋକମାନେ ସେହି ପ୍ରତିଶୃତି କଥା ମନେ ପକାଉଛନ୍ତି ସେତେବେଳେ ଲୋକଙ୍କ କଥା ଶୁଣି ହସିବା ସହ ସେଠାରୁ ଚାଲିଯାଉଛୁ ବୋଲି କହିଥିଲେ ଗଡକରୀ । ଆଉ ଏହି ବୟାନ ସେତେବେଳେ ରାଜନୀତିରେ ନିଆଁ ଲଗାଇଥିଲା । ଖାସକରି ବିଜେପିର ଅଚ୍ଛେଦିନ ସ୍ଲୋଗାନକୁ ଗଡକରୀଙ୍କ ଏହି ବୟାନ ଶକ୍ତ ଚାପୁଡା ଥିଲା ବୋଲି ଚର୍ଚ୍ଚା ହୋଇଥିଲା ।
ଏସବୁ ଭିତରେ ଯେତେବେଳେ ଜାତୀୟ ଗଣମାଧ୍ୟମର ସର୍ଭେ ରିପୋର୍ଟ ବିଜେପି ପାଇଁ ସର୍ତକ ଘଣ୍ଟି ବଜାଇ ସାରିଛି ଓ ଦେଶର ବିଭିନ୍ନ ରାଜ୍ୟରେ ୨୦୧୪ ଭଳି ମୋଦି ମ୍ୟାଜିକ କାମ କରିବନି ବୋଲି ଚର୍ଚ୍ଚା ହେଉଛି ସେତେବେଳେ ଗଡକରୀଙ୍କ ବୟାନକୁ ରାଜନୈତିକ ମହଲରେ ଭିନ୍ନ ଦୃଷ୍ଟିରେ ଦେଖାଯାଉଛି । ଖାସକରି ମୋଦିଙ୍କ ଲୋକପ୍ରିୟତାର ଗ୍ରାଫ୍ ଧୀରେ ଧୀରେ ଖସୁଥିବା ବେଳେ ଗଡକରୀଙ୍କୁ ୨୦୧୯ରେ ପ୍ରଧାନମନ୍ତ୍ରୀ ରେସରେ ସାମିଲ କରିବାକୁ ନାଗପୁର ଅଫିସରୁ ବ୍ଲୁ-ପ୍ରିଣ୍ଟ ପ୍ରସ୍ତୁତ ହେଉଥିବା ଚର୍ଚ୍ଚା ହେଉଛି ।
୨୦୧୪ରେ ଯେଉଁ ସ୍ୱପ୍ନ ଦେଖାଇ ମୋଦି କ୍ଷମତାକୁ ଆସିଥିଲେ ତାହା ପୂରଣ ନ ହୋଇ ଥିବାରୁ ଦେଶରେ ବିଜେପି ବିପକ୍ଷରେ ସରକାର ବିରୋଧୀ ହାୱା ଆରମ୍ଭ ହୋଇଛି । ତେଣୁ ଏଭଳି ସ୍ଥିତିରେ ପୁଣିଥରେ କ୍ଷମତାକୁ ଫେରିବାକୁ ବିଜେପି ସରକାରର ପ୍ରଚ୍ଛଦପଟରେ ଥିବା ଆରଏସଏସ ଗଡକରୀଙ୍କ ଭଳି ନିର୍ବିବାଦୀୟ ନେତାଙ୍କୁ ୨୦୧୯ରେ ନିର୍ବାଚନୀ ମୈଦାନରେ ଓହ୍ଲାଇପାରେ ବୋଲି ଖୁବ ଆଲୋଚନା ହେଉଛି । ଏହାଛଡା ନୀତିନଙ୍କ ନାଗପୁର ଅଫିସ ସହ ମଧ୍ୟ ବେଶ ଭଲ ଓ ପୁରୁଣା ସର୍ମ୍ପକ ।
ଏଭଳି ଯୋଜନା ପଛରେ ମଧ୍ୟ ଏକ ବଡ କାରଣ ରହିଛି, ଗୋଟିଏ ପଟେ ବିଜେପି ଓ ମୋଦି ସରକାରଙ୍କ ଲୋକପ୍ରିୟତା କମି କମି ଚାଲିଥିବା ବେଳେ ଟିଡିପି, ପିଡିପି ଭଳି ସହଯୋଗୀ ଦଳ ଗୁଡିକ ମଧ୍ୟ ଏନଡିଏର ହାତ ଛାଡଛନ୍ତି ଓ ଶିବସେନା ଭଳି ଦଳ ସହ ବିଜେପିର ସର୍ମ୍ପକରେ ଫାଟ ସୃଷ୍ଟି ହୋଇଛି । ସହଯୋଗୀ ଦଳ ଗୁଡିକର ଅସନ୍ତୋଷ ବିଜେପି ପ୍ରତି କମ ଓ ମୋଦି ଆଣ୍ଡ କୋ ଉପରେ ଅଧିକ ରହୁଥିବା ଚର୍ଚ୍ଚା ହେଉଛି । ଏହାବାଦ ମୋଦି ଯେଉଁ ହିନ୍ଦୁତ୍ୱ ଏଜେଣ୍ଡାକୁ ନେଇ ନିର୍ବାଚନୀ ବୈତରଣୀ ପାର ହୋଇଥିଲେ ତାହା ପୂରଣ କରିବାରେ ମଧ୍ୟ ବିଫଳ ହୋଇଛି କେନ୍ଦ୍ର ସରକାର । ଯାହା ଆରଏସଏସକୁ ମଧ୍ୟ କ୍ଷୁବ୍ଧ କରିଛି । ତେଣୁ ଏଭଳି ସ୍ଥିତିରେ ଆରଏସଏସ ୨୦୧୯ରେ ନୂଆ ଚେହେରା ସହ ନିର୍ବାଚନକୁ ଆସିପାରେ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି ।
ଏହାବାଦ୍ ୨୦୧୯ରେ ଯଦି ବିଜେପି ଏକାକୀ ସଂଖ୍ୟା ଗରିଷ୍ଠତା ହାସଲ କରି ନ ପାରେ ଓ ସହଯୋଗୀ ଦଳ ଗୁଡିକଙ୍କର ଆବଶ୍ୟକତା ପଡେ ତେବେ ସେଭଳି ସ୍ଥିତିରେ ମୋଦି ନୁହେଁ ବରଂ ଗଡକରୀ ପ୍ରଧାନମନ୍ତ୍ରୀ ଚେହେରା ଭାବେ ଆରଏସଏସର ପ୍ରଥମ ପସନ୍ଦ ପାଲଟିପାରେ । କାରଣ ସହଯୋଗୀ ଦଳ ଭାବେ ଶିବସେନା ମଧ୍ୟ ମହାରାଷ୍ଟ୍ରରୁ କେହି ନେତା ପ୍ରଧାନମନ୍ତ୍ରୀ ଆସନରେ ବସନ୍ତୁ ବୋଲି ଚାହୁଁଥିବା ଚର୍ଚ୍ଚା ହେଉଛି । ଏପରିକି ସହଯୋଗୀ ଦଳ ଗୁଡିକୁ ଏକାଠି କରିବାର ଫର୍ମୁଲା ଗଡକରୀଙ୍କୁ ବେଶ ଭଲଭାବେ ଜଣା । ତେଣୁ ଗଡକରୀଙ୍କୁ ୨୦୧୯ ନିର୍ବାଚନରେ କେଉଁ ଭୂମିକାରେ ଦେଖିବାକୁ ମିଳିବ ତାହା ଉପରେ ଏବେ ସମସ୍ତଙ୍କର ନଜର ।