ପିଏଲ୍ଜିଏ ସପ୍ତାହ ପାଳନ ନେଇ ସ୍ବାଭିମାନ ଅଂଚଳରେ ମାଓ ପୋଷ୍ଟର ! ସମର୍ଥନ ପାଇଁ ଜନତାଙ୍କୁ ଆହ୍ୱାନ
କନକ ବ୍ୟୁରୋ : ମାଲକାନଗିରି ଜିଲ୍ଲା ସ୍ବାଭିମାନ ଅଂଚଳରେ ପିଏଲ୍ଜିଏ ସପ୍ତାହ ପାଳନ ନେଇ ପୋଷ୍ଟର୍ ମରାଯାଇଛି । ଏଥିରେ ସରକାର ବଡ଼ବଡ଼ ନଦୀବନ୍ଧ ନିର୍ମାଣ କରି ଲୋକଙ୍କୁ ବାସହରା କରିବା ସହ ବିସ୍ଥାପିତ କରିବାକୁ ଚାହୁଁଛନ୍ତି ବୋଲି ଉଲ୍ଲେଖ କରାଯାଇଛି । ଆହୁରି ମଧ୍ୟ କୁହାଯାଇଛି ଯେ- ଜଳ, ଜଂଗଲ, ଜମି କେବଳ ଆଦିବାସୀଙ୍କର, ଏହାକୁ କେହି ଛଡ଼ାଇ ନେଇପାରିବେ ନାହିଁ । ଏଥିସହିତ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶର ସଂପତ୍ତିକୁ ବିଦେଶୀଙ୍କ ହାତରେ ଟେକି ଦେବାକୁ ଚାହୁଁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେଣୁ ଜନତା ଏକ ହୋଇ ପିଏଲ୍ଜିଏକୁ ସମର୍ଥନ କରିବା ସହ ଏଥିରେ ସାମିଲ ହେବାକୁ ଆହ୍ବାନ କରାଯାଇଛି । ସେହିଭଳି, କନ୍ଧମାଳରେ ଏବେ ମାଓ ବିରୋଧୀ ଓ ଏହାର ପ୍ରତିରୋଧରେ ମାଓ ସମର୍ଥିତ ପୋଷ୍ଟର୍, ବ୍ୟାନର୍ ଯୁଦ୍ଧ ଚାଲିଛି । ଆଜି ସକାଳୁ ଦାରିଙ୍ଗବାଡ଼ି ବ୍ଲକ କିରିକୁଟି ପଞ୍ଚାୟତରେ ଦେଖିବାକୁ ମିଳିଛି ମାଓ ବ୍ୟାନର । ରାସ୍ତା କଡ଼ରେ ଟଙ୍ଗା ହୋଇଥିବା ଏକ କଳା ବ୍ୟାନରରେ ମାଓବାଦୀଙ୍କ ଆଡୁ ପ୍ରତିରୋଧ ସପ୍ତାହ ଡିସେମ୍ବର ୬ରୁ ୧୨ ତାରିଖ ଯାଏ ପାଳନ କରିବାକୁ ଡାକରା ଦିଆଯାଇଛି ।