ରାଜଧାନୀ ରାଜରାସ୍ତାରେ ମୃତ୍ୟୁର ଗାତ ! ମ୍ୟାନହୋଲରେ ପଡ଼ି ଗଲା ବୃଦ୍ଧଙ୍କ ଜୀବନ
କନକ ବ୍ୟୁରୋ : ନନ୍ଦିଆ ନାୟକଙ୍କର ମୃତ୍ୟୁ ଏପରି ଆସିବ ବୋଲି ହୁଏତ କେହି ଅନ୍ଦାଜ ଲଗାଇ ପାରିନଥିବେ । ଭୁବନେଶ୍ୱରରେ ଏକ ମୁକୁଲା ଡ୍ରେନ ନେଇଛି ତାଙ୍କ ଜୀବନ । ଗୁରୁବାର ଭୋରରୁ ନିତ୍ୟ କର୍ମ ପାଇଁ ଆସିଥିବା ନନ୍ଦିଆଙ୍କ ଗୋଡ ଖସିଯିବାରୁ ଡ୍ରେନରେ ପଡି ପ୍ରାଣ ହରାଇଲେ । ବଡ଼ଭାଇର ଶୁଦ୍ଧ କ୍ରିୟାରେ ଯୋଗ ଦେବା ପାଇଁ ଗଂଜାମ ଦିଗପହଣ୍ଡିର ନାରାୟଣପୁରରୁ ଭୁବନେଶ୍ୱର ଆସିଥିଲେ ନନ୍ଦିଆ । ହେଲେ ମୃତ୍ୟୁ ଯେପରି ତାଙ୍କୁ ଏଠାରେ ଅପେକ୍ଷା କରିରହିଥିଲା । ବଡ଼ଭାଇର ଶୁଦ୍ଧ କ୍ରିୟା ତ ସରିଗଲା, ମାତ୍ର ପରିବାରରେ ଆଉ ଏକ ମୃତ୍ୟୁ ପରେ ଘରେ ପଡିଥିଲା କାନ୍ଦବୋବାଳି ।
Kanak News is now on WhatsApp
Join and get latest news updates delivered to you via WhatsApp
କିଛି ଦିନ ତଳେ ୭୦ ବର୍ଷୀୟା ବୃଦ୍ଧା ଖୋଲା ମ୍ୟାନହୋଲରେ ପଡି ସାରା ରାତି ଜୀବନ ସହ ସଂଘର୍ଷ କରିଥିଲେ । ପରଦିନ ସକାଳୁ ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରାଯାଇଥିଲା । ଘଟଣାକୁ ୧୦ ଦିନ ବି ବିତିନି, ରାଜଧାନୀର ମୁକୁଲା ପଡିଥିବା ମୃତ୍ୟୁର ଗାତ ପୁଣି ନେଇଥିଲା ଆଉ ଏକ ମୁଣ୍ଡ । ବାରମ୍ବାର ଲୋକ ମୃତାହତ ହେଉଥିଲେ ସତେ ଯେପରି କାହାର ପରୱା ନାହିଁ । ନା, ଏହି ସମସ୍ୟାର ସମାଧାନ ପାଇଁ କେହି ଆଗକୁ ଆସୁଛନ୍ତି, ନା ଉତ୍ତରଦାୟିତ୍ୱ ନେବାକୁ କେହି ରାଜି ହେଉଛନ୍ତି । ବିଏମସି ଓ ସ୍ୱିରେଜ୍ ବୋର୍ଡ ପରସ୍ପର ଉପରେ ଦୋଷ ଲଦୁଛନ୍ତି ।
ତେବେ ସବୁଠୁ ବିଡମ୍ବନାର ବିଷୟ ହେଉଛି ସ୍ୱିରେଜ ବୋର୍ଡ କର୍ମକର୍ତାଙ୍କ ବେପରୁଆ ମନବୃତ୍ତି । ମୂଲ୍ୟବାନ ଜୀବନ ଅକାଳରେ ଝଡିପଡୁଥିବା ବେଳେ କୌଣସି ତତ୍ପରତା ଦେଖାଉନାହାନ୍ତି ଅଧିକାରୀ । ପ୍ରତିକ୍ରିୟା ଦେବେ କଣ, ଗଣମାଧ୍ୟମକୁ ଧରାଛୁଆଁ ଦେଉନାହାନ୍ତି ବାବୁ । ରାଜଧାନୀରେ ବର୍ଷ ବର୍ଷ ଧରି ମୁକୁଲା ପଡୁଛି ଡ୍ରେନ ଓ ମ୍ୟାନହୋଲ । ସ୍ମାର୍ଟ ସିଟିର ଏହି ମରଣ ଯନ୍ତା ଏବେ ସମସ୍ତଙ୍କ ଚିନ୍ତା ବଢାଇଛି ।