ବୈଜୟନ୍ତଙ୍କ ବିରୋଧରେ ଲମ୍ବୁଛି ଅଭିଯୋଗର ତାଲିକା ! ମହାକାଳପଡା ବିଜେଡି କର୍ମୀ କହିଲେ, ସାଂସଦ କରୁଛନ୍ତି ଦଳ ବିରୋଧୀ କାମ
କନକ ବ୍ୟୁରୋ : ବିଜେଡି-ବୈଜୟନ୍ତ ଲଢେଇର ମହାଅଧ୍ୟାୟରେ ପ୍ରତିଦିନ ନୂଆ ନୂଆ କାହାଣୀ ଯୋଡି ହେବାରେ ଲାଗିଛି । ଆଜି ବୈଜୟନ୍ତଙ୍କ ବିରୋଧରେ ନବୀନଙ୍କ ଆଗରେ ଫେରାଦ ହୋଇଛନ୍ତି ମହାକାଳପଡା ନିର୍ବାଚନମଣ୍ଡଳୀର ବିଜେଡି କର୍ମୀ । ସାଂସଦ ବୈଜୟନ୍ତଙ୍କ ନାଁରେ ଅଧ ଡଜନେ ଅଭିଯୋଗର ଲମ୍ବା ଫର୍ଦ୍ଦ ନେଇ ଦଳର ସୁପ୍ରିମୋଙ୍କ ନିକଟରେ ଫେରାଦ ହୋଇଛନ୍ତି ଦଳୀୟ କର୍ମୀ । ସାଂସଦ ନିର୍ବାଚିତ ଲୋକ ପ୍ରତିନିଧିଙ୍କୁ ପଚାରୁନାହାନ୍ତି ବରଂ ଅପରାଧୀଙ୍କୁ ଧରି ଜନସଭାକୁ ଯାଉଛନ୍ତି ବୋଲି ବୈଜୟନ୍ତଙ୍କ ବିରୋଧରେ ଅଭିଯୋଗ ଆଣିଛନ୍ତି ମହାକାଳପଡା ନିର୍ବାଚନମଣ୍ଡଳୀର ଦଳୀୟ କର୍ମୀ । ଏହି ଲମ୍ବା ଅଭିଯୋଗର ଫର୍ଦ୍ଦ ଏତିକିରେ ସରିନି ବୈଜୟନ୍ତ ଦଳ ବିରୋଧୀ କାମ କରୁଛନ୍ତି ଏପରିକି ସଂସଦୀୟ କ୍ଷେତ୍ରକୂୁ ଗଲେ ବିଜେପି ଲୋକଙ୍କୁ ସାଙ୍ଗରେ ନେଉଛନ୍ତି ବୋଲି ମହାଭିଯୋଗ ଆସିଛି । ଦଳର ହିତ କରିବା ତ ଦୂରର କଥା ବରଂ ନିର୍ବାଚନମଣ୍ଡଳୀରେ ନିଜ ପ୍ରଚାର ଅଧିକ କରୁଛନ୍ତି । ଏହାସହ ସାଂସଦ ପାଣ୍ଠିର ଦୂରପଯୋଗ ନେଇ ମଧ୍ୟ ବୈଜୟନ୍ତଙ୍କ ବିରୋଧରେ ନବୀନଙ୍କୁ କହିଛନ୍ତି ଦଳୀୟ କର୍ମୀ । ତେଣୁ ଖୁବଶୀଘ୍ର ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବା ଆବଶ୍ୟକ ଦାବି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେବଳ ମହାକାଳପଡା ନୁହେଁ ବରଂ ଯେଉଁଠାରେ ବୈଜୟନ୍ତ ପାଣିଟାଙ୍କି ଉଦଘାଟନ କରି ବିବାଦର ସୁତ୍ରପାତ କରିଥିଲେ ସେହିଠାରୁ ମଧ୍ୟ ଆସିଛି ଅଭିଯୋଗ ଫର୍ଦ୍ଦ । ନିଶ୍ଚିତକୋଇଲି ବ୍ଳକର ଶତାଧିକ ବିଜେଡି ସମର୍ଥକ ବ୍ଳକ ସଭାପତି ରମାକାନ୍ତ ମହାନ୍ତିଙ୍କ ନେତୃ୍ତ୍ୱରେ ଆସି ବୈଜୟନ୍ତଙ୍କ ବିରୋଧରେ ଦଳର ସୁପ୍ରିମୋ ନବୀନ ପଟ୍ଟନାୟକଙ୍କ ଆଗରେ ଫେରାଦ ହୋଇଛନ୍ତି । ସେମାନଙ୍କର ମଧ୍ୟ ସମାନ ଅଭିଯୋଗ ଥିଲା କି ବୈଜୟନ୍ତ ଦଳ ବିରୋଧୀ କାମ କରୁଛନ୍ତି ଓ କର୍ମୀମାନଙ୍କୁ ଅଣଦେଖା କରୁଛନ୍ତି । ବୈଜୟନ୍ତଙ୍କୁ ଏବେ ନିଜ ନିର୍ବାଚନମଣ୍ଡଳୀରେ ବିରୋଧର ସାମ୍ନା କରିବାକୁ ପଡୁଛି । ବାରମ୍ବାର ବୈଜୟନ୍ତଙ୍କ ବିରୋଧରେ ଅଭିଯୋଗ ନେଇ ଦଳର ସୁପ୍ରିମୋଙ୍କ ନିକଟରେ ପହଞ୍ଚୁଛନ୍ତି ବିଜେଡି କର୍ମୀ ।
ତେବେ ଏସବୁ ଭିତରେ କାର୍ଯ୍ୟାନୁଷ୍ଠାନ ନିଆଯିବ କହି ଚୁପ୍ ବସିଛନ୍ତି ବିଜେଡି ମୁଖିଆ ନବୀନ ପଟ୍ଟନାୟକ । ବୁହାଳୋ ଠାରେ ପାଣି ଟାଙ୍କି ଉଦଘାଟନ ପରେ ଥାର୍ଡ ଫ୍ଲୋରର ଅଫିସରଙ୍କୁ ଟାର୍ଗେଟ କରିବା ବୈଜୟନ୍ତଙ୍କୁ ମହଙ୍ଗା ପଡିଛି । ଥାର୍ଡ ଫ୍ଲୋରର ଅଫିସରଙ୍କୁ ବିଜୁଙ୍କ ମାଡ ତତ୍ତ୍ୱ କଥା ମନେ ପକାଇବା ପରେ ବିଜେଡି-ବୈଜୟନ୍ତ ବିବାଦର ସୁତ୍ରପାତ ଆରମ୍ଭ ହୋଇଥିଲା । କିନ୍ତୁ ଏହି ବିବାଦ ପ୍ରଶମିତ ହେବା ବଦଳରେ ଏବେ ବଢିବାରେ ଲାଗିଛି । ବାରମ୍ବାର ଟ୍ୱିଟ୍ କରି ବିଜେଡିକୁ ଘାଇଲା କରୁଛନ୍ତି ବୈଜୟନ୍ତ । କିନ୍ତୁ ଏତେ ସବୁ ଦେଖିବା ପରେ ମଧ୍ୟ ନବୀନ ଏଯାଏଁ ବୈଜୟନ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ନ ନେଇ ଚୁପ ବସିଛନ୍ତି । କିନ୍ତୁ ବୈଜୟନ୍ତଙ୍କୁ ନେଇ ଏବେ ନିର୍ବାଚନମଣ୍ଡଳୀରେ ଦେଖାଦେଲାଣି ଅସନ୍ତୋଷ । ଖୁବଶୀଘ୍ର ବୈଜୟନ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପାଇଁ କର୍ମୀ ମାନେ ଦାବି କରୁଛନ୍ତି । ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ନିର୍ବାଚନମଣ୍ଡଳୀରୁ ବୈଜୟନ୍ତଙ୍କ ବିରୋଧରେ ସଙ୍ଗୀନ ଅଭିଯୋଗ ଆସିବା ପରେ ନବୀନ ତାଙ୍କ ପ୍ରତି କାର୍ଯ୍ୟାନୁଷ୍ଠାନ ନେବେ ତ ?