ସ୍ୱାମୀଙ୍କ ପକ୍ଷରୁ ଛାଡପତ୍ର ନୋଟିସ୍ ପାଇବା ପରେ ସ୍ତ୍ରୀ ନେଲେ ଚରମ ନିଷ୍ପତ୍ତି : ଟ୍ରେନ୍ ଆଗକୁ ଡେଇଁ କଲେ ଆତ୍ମହତ୍ୟା
କନକ ବ୍ୟୁରୋ : ବ୍ରହ୍ମପୁର ଜିଆରପି ଥାନା ଅନ୍ତର୍ଗତ ଛତ୍ରପୁର ରେଳଷ୍ଟେସନ୍ ପୂର୍ବରୁ ଥିବା ଏକ ଲେବଲ୍ କ୍ରସିଂରେ ଆଜି ସକାଳେ ଜଣେ ମହିଳା ଡାକ୍ତର ଟ୍ରେନ୍ ଆଗକୁ ଡେଇଁ ଆତ୍ମହତ୍ୟା କରିଛନ୍ତି। ମୃତ ମହିଳା ଡାକ୍ତରଙ୍କ ନାମ ଅର୍ଚ୍ଚନା ଦାଶ(୩୧)। ଡାକ୍ତର ସ୍ୱାମୀଙ୍କ ଛାଡ଼ପତ୍ର ନୋଟିସ୍ ପାଇବା ପରେ ସେ ଏହିଭଳି ଏକ ଚରମ ନିଷ୍ପତ୍ତି ନେଇଥିବା ଜଣାପଡ଼ିଛି।
Kanak News is now on WhatsApp
Join and get latest news updates delivered to you via WhatsApp
ଛତ୍ରପୁର ଶ୍ରୀନଗର ଦ୍ୱିତୀୟ ଲାଇନରେ ରହୁଥିବା ଅବସରପ୍ରାପ୍ତ ଶିକ୍ଷକ ରଘୁନାଥଙ୍କ ଝିଅ ହେଉଛନ୍ତି ଅର୍ଚ୍ଚନା। ୨୦୦୩ ମସିହାରେ ଭୁବନେଶ୍ୱର ମଞ୍ଚେଶ୍ୱର ଥାନା ଗାଡ଼କଣା ଗ୍ରାମର ଅଞ୍ଜନ କୁମାର ଦାଶଙ୍କ ସହିତ ତାଙ୍କର ବାହାଘର ହୋଇଥିଲା। ସ୍ୱାମୀ ଭୁବନେଶ୍ୱର ସ୍ଥିତ ଏକ ଘରୋଇ ହସ୍ପିଟାଲରେ ଡାକ୍ତର ଭାବେ କାମ ଆରମ୍ଭ କରିଥିଲେ। ମାତ୍ର, ସ୍ୱାମୀ- ସ୍ତ୍ରୀ ମଧ୍ୟରେ ଭଲ ସମ୍ପର୍କ ନଥିଲା। ଏହାପରେ ସେ ବାପଘରକୁ ଚାଲି ଆସିଥିଲେ। କିଛି ମାସ ତଳେ ସେ ସୁନ୍ଦରପୁର ସ୍ଥିତ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ କାମ ଆରମ୍ଭ କରିଥିଲେ। ଗତ ୭ ତାରିଖ ଦିନ ସ୍ୱାମୀଙ୍କ ପକ୍ଷରୁ ଛାଡ଼ପତ୍ର ନୋଟିସ୍ ଆସିଥିଲା। ନୋଟିସ୍ ପାଇବା ପରେ ଅର୍ଚ୍ଚନା ସମ୍ପୂର୍ଣ୍ଣ ଭାଙ୍ଗି ପଡ଼ିଥିଲେ। କିଛିଦିନ ହେଲା ମାନସିକ ଦୁଃଶ୍ଚିନ୍ତାରେ ଥିଲେ।
ତେବେକାହାକୁ କିଛି ନକହି ଅର୍ଚ୍ଚନା ଘରୁ ବାହାରି ଯାଇଥିଲେ। ସକାଳ ପ୍ରାୟ ୬ଟା ବେଳେ ଝିଅ ଟ୍ରେନ୍ ଆଗକୁ ଡେଇଁ ଆତ୍ମହତ୍ୟା କରିଥିଲେ। ଅର୍ଚ୍ଚନାଙ୍କ ବାପଘର ଲୋକ ନିର୍ଯ୍ୟାତନା ଯୋଗୁଁ ମାନସିକ ଭାରସାମ୍ୟ ହରାଇ ଝିଅ ତାଙ୍କର ଆତ୍ମହତ୍ୟା କରିଥିବା ଅଭିଯୋଗ କରିଛନ୍ତି। ଏ ନେଇ ଜିଆରପି ଥାନା କେସ୍ ନମ୍ବର ୫୬/୧୮ରେ ଅପମୃତ୍ୟୁ ମାମଲା ରୁଜୁ କରିଥିବା ଜଣାପଡ଼ିଛି।
ସେପଟେ ଭଦ୍ରକ ଜିଲ୍ଲାରେ ଧାମନଗର ଅନ୍ତର୍ଗତ ଶାମପୁର ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ସ୍ୱାମୀଙ୍କ ଗୁରୁତର ଅବସ୍ଥା ଦେଇ ସ୍ତ୍ରୀ ମଧ୍ୟ ବିଷ ପିଇ ଦେଇଛନ୍ତି। ଉଭୟଙ୍କ ମୃତ୍ୟୁ ପରେ ମାତ୍ର ଚାରି ମାସର ବୈବାହିକ ଜୀବନର ଅନ୍ତ ଘଟିଛି। ଶାମପୁର ଗ୍ରାମର ସତ୍ୟରଂଜନ ତ୍ରିପାଠୀ (ବାବୁ)ଙ୍କ ପୁଅ ଧର୍ମେନ୍ଦ୍ର (୩୦) ଚଳିତ ବର୍ଷ ମେ ମାସ ୯ ତାରିଖରେ କଟକ ବାଙ୍କି ଅଞ୍ଚଳର ନୀଳମଣି ଦାଶଙ୍କ ଝିଅ ପୂର୍ଣ୍ଣିମା(୨୩)ଙ୍କୁ ବିବାହ କରିଥିଲେ। ବିବାହର ୪ମାସ ମଧ୍ୟରେ ଉଭୟ ଦମ୍ପତି ବେଶ୍ ହସଖୁସିରେ ଦିନ କଟାଉଥିଲେ। ଗତକାଲି ରାତିରେ ହଠାତ୍ ଧର୍ମେନ୍ଦ୍ର କୌଣସି କାରଣରୁ ବିଷାକ୍ତ ଦ୍ରବ୍ୟ ଖାଇ ଦେଇଥିଲେ। ଧର୍ମେନ୍ଦ୍ରଙ୍କ ଅବସ୍ଥା ଗୁରୁତର ହେବା ଦେଖି ପୂର୍ଣ୍ଣିମା ମଧ୍ୟ ବିଷ ପିଇ ଦେଇଥିଲେ। ଉଭୟଙ୍କୁ ଗୁରୁତର ଅବସ୍ଥାରେ ଡାକ୍ତରଖାନା ଅଣାଯାଇଥିଲା। ସେଠାରେ ଦୁହିଁଙ୍କର ମୃତ୍ୟୁ ହୋଇଯାଇଥିଲା।
ନବବିବାହିତ ଦମ୍ପତିଙ୍କ ଏଭଳି ଆତ୍ମହତ୍ୟାର କାରଣ ଜଣା ପଡ଼ିନଥିବା ବେଳେ ପାରିବାରିକ ସମସ୍ୟା ଯୋଗୁଁ ଏପରି ଘଟିଥିବା ସ୍ଥାନୀୟ ଅଂଚଳରେ ଆଲୋଚନା ହେଉଛି।