ଆଜି ହଟିବ ସସପେନ୍ସ, ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ନେଇ ହେବ ଘୋଷଣା ! ନଡ୍ଡା ଓ ଜୟରାମ ଠାକୁର ରେସରେ ଆଗରେ
ହିମାଚଳ ପ୍ରଦେଶର ନୂଆ ମୁଖ୍ୟମନ୍ତ୍ରୀ କିଏ ହେବ ସେ ନେଇ ଜାରି ରହିଥିବା ସସପେନ୍ସ ଆଜି ଦୂର ହେବ । ହିମାଚଳର ମଙ୍ଗ କିଏ ଧରିବ ସେ ନେଇ ଆଜି ଦଳ ନିଷ୍ପତି ନେବ ବୋଲି ସୂଚନା ମିଳିଛି । କିନ୍ତୁ କାହାକୁ ମୁଖ୍ୟମନ୍ତ୍ରୀ କରାଯିବ ସେ ନେଇ ସହମତି ହୋଇପାରୁନାହିଁ । ତେବେ ସୁତ୍ର ଅନୁଯାୟୀ, କେନ୍ଦ୍ରମନ୍ତ୍ରୀ ଜେ.ପି.ନଡ୍ଡା ମୁଖ୍ୟମନ୍ତ୍ରୀ ପଦ ପାଇଁ ରେସରେ ସବୁଠାରୁ ଆଗରେ ଅଛନ୍ତି । ସେହିଭଳି ୫ ଥର ବିଧାୟକ ହୋଇଥିବା ଜୟରାମଠାକୁର ବି ମୁଖ୍ୟମନ୍ତ୍ରୀ ପଦ ପାଇଁ ଅନ୍ୟତମ ଦାବିଦାର ବୋଲି କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲ ନିର୍ବାଚନ ପୂର୍ବରୁ ପ୍ରଚାର ସମୟରେ ହିମାଚଳ ପ୍ରଦେଶ ପାଇଁ ବିଜେପି ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ପ୍ରେମ କୁମାର ଧୂମଲ ନାଁ ଘୋଷଣା କରିଥିଲା । କିନ୍ତୁ ନିର୍ବାଚନରେ ପରାଜୟ ବରଣ କରିବା ପରେ ଧୂମଲ ଏହି ରେସରୁ ବାଦ ପଡିଛନ୍ତି । ଏପରିକି ସେ ଆଉ ମୁଖ୍ୟମନ୍ତ୍ରୀ ରେସରେ ନାହାନ୍ତି ବୋଲି ଧୂମଲ କହିଛନ୍ତି । ସେଥିପାଇଁ ନଡ୍ଡା କିମ୍ବା ଜୟରାମ ଠାକୁରଙ୍କ ମଧ୍ୟରୁ ଜଣେ ମୁଖ୍ୟମନ୍ତ୍ରୀ ହେବେ ବୋଲି ଚର୍ଚ୍ଚା ହେଉଛି ।
ମୁଖ୍ୟମନ୍ତ୍ରୀ ନାମରେ ମୋହର ମାରିବା ପୂର୍ବରୁ ଆଜି ଦିନ ପ୍ରାୟ ୧୨ଟା ୩୦ରେ ସିମଲାରେ ବିଜେପି ବିଧାୟକ ଦଳ ବୈଠକ ବସିବ । ତା ପୂର୍ବରୁ କେନ୍ଦ୍ରୀୟ ପର୍ଯ୍ୟବେକ୍ଷକ ନିର୍ମଳା ସୀତାରମଣ ଓ ନରେନ୍ଦ୍ର ତୋମର ବୈଠକ କରିବେ । ନେତା ନିର୍ବାଚନ ପାଇଁ ସିମଳାରେ ରାଜନୀତି ସରଗରମ ରହିଛି । ହିମାଚଳ ବିଜେପିର ସମସ୍ତ କୋର କମିଟି ସଦସ୍ୟ, ରାଜ୍ୟର ସମସ୍ତ ଲୋକସଭା ଓ ରାଜ୍ୟସଭା ସାଂସଦଙ୍କୁ ବି ସିମଳା ପଂହଚିବାକୁ ନିର୍ଦ୍ଦେଶ ଜାରି କରାଯାଇଛି । ତେବେ ନିର୍ବାଚନରେ ପରାଜୟ ବରଣ କରିଥିବା ଧୂମଲଙ୍କୁ ଦଳ ରାଜ୍ୟସଭା ପଠାଇବାକୁ ଚିନ୍ତା କରୁଛି । ଏପରିକି ଜେ.ପି ନଡ୍ଡା ଯଦି ମୁଖ୍ୟମନ୍ତ୍ରୀ ହୁଅନ୍ତି ତେବେ ପ୍ରେମ କୁମାର ଧୂମଲ କିମ୍ବା ଅନୁରାଗ ଠାକୁରଙ୍କୁ କେନ୍ଦ୍ରମନ୍ତ୍ରୀ କରାଯିବ ବୋଲି ଚର୍ଚ୍ଚା ଜୋର ଧରିଛି ।