ପୁରୀ ବଡଦାଣ୍ଡରେ ଖଣ୍ଡଯୁଦ୍ଧ । ସାମ୍ବାଦିକଙ୍କୁ ମାଡ଼ ମାରି ଲହୁଲୁହାଣ କଲା ପୋଲିସ୍ । ଏସପ କହିଲେ, ସିସିଟିଭି ଫୁଟେଜର କରାଯିବ ଯାଂଚ
କନକ ବ୍ୟୁରୋ: ପୁରୀର ଏକ ପେଟ୍ରୋଲ ପମ୍ପରେ ନିମ୍ନମାନର ତେଲ ଦିଆଯାଉଥିବା ଅଭିଯୋଗରେ ଗତକାଲି ରାତିରେ ସ୍ଥାନୀୟ ଲୋକେ ଭଂଗାରୁଜା କରିଥିଲେ । ତେବେ ହଠାତ୍ ପୋଲିସ ସେଠାରେ ପହଁଚି ଲାଠିଚାର୍ଜ କରିଥିଲା । ଏହି ସମୟରେ ସାମ୍ବାଦିକଙ୍କୁ ମାଡ ମାରି ଲହୁଲୁହାଣ କରିଛି ପୋଲିସ । ଖବର ସଂଗ୍ରହ ପାଇଁ ଯାଇଥିବା ସାମ୍ବାଦିକ ପରିଚୟପତ୍ର ଦେଖାଇଥିଲେ ମଧ୍ୟ ପୋଲିସ କିଛି ଶୁଣିନଥିଲା । ସେପଟେ ପେଟ୍ରୋଲ ପମ୍ପ ଭଙ୍ଗାରୁଜା ଓ ସାମ୍ବାଦିକଙ୍କୁ ମାଡ଼ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ପୁରୀ ଏସପି ।
Kanak News is now on WhatsApp
Join and get latest news updates delivered to you via WhatsApp
ପୁରୀ ବଡଦାଣ୍ଡରେ ଥିବା ଗ୍ରାଣ୍ଡ ମୋଟର୍ସ ସର୍ଭିସ ଷ୍ଟେସନ ପେଟ୍ରୋଲ ପମ୍ପରେ ନିମ୍ନମାନର ତେଲ ଅଭିଯୋଗ କରି ତାତି ଉଠିଥିଲେ ସ୍ଥାନୀୟ ଲୋକ । ବାରମ୍ବାର ଏହି ଅଭିଯୋଗ ହେଉଥିଲେ ବି କୌଣସି କାର୍ଯ୍ୟାନୁଷ୍ଠାନ ନିଆନଯିବାରୁ ଗତକାଲି ରାତିରେ ଲୋକେ ଏକାଠି ହୋଇ ପେଟ୍ରୋଲ ପମ୍ପରେ ବ୍ୟାପକ ଭଙ୍ଗାରୁଜା କରିଥିଲେ । ପେଟ୍ରୋଲ ପମ୍ପରେ ଥିବା ଗାଡି, ଟାଙ୍କି ଓ ସିସିଟିଭିକୁ ମଧ୍ୟ ଭାଙ୍ଗି ଦେଇଥିଲେ । ଜନଗହଳି ସ୍ଥାନରେ ଏପରି ଭଙ୍ଗାରୁଜାକୁ ପ୍ରଥମରୁ ଅଟକାଇ ନଥିଲା ପୋଲିସ । ହଠାତ୍ ଆରମ୍ଭ କରି ଦେଇଥିଲା ଲାଠିଚାର୍ଜ । ଯାହାକୁ ପାଇଲା ଗୋଡାଇ ପିଟିଲା ପୋଲିସ । ଯେଉଁମାନେ ଭଙ୍ଗାରୁଜାରେ ସାମିଲ ଥିଲେ ସେମାନେ ତ ଖସିଗଲେ । ହେଲେ ପୋଲିସର ରୋଷର ଶିକାର ହୋଇଥିଲେ ଖବର ସଂଗ୍ରହ କରିବାକୁ ଯାଇଥିବା ସାମ୍ବାଦିକ । ସାମ୍ବାଦିକ ବୋଲି ପରିଚୟ ପତ୍ର ଦେଖାଇଥିଲେ ବି ଛାଡିନଥିଲା ପୋଲିସ । ପୁଲିସର ମାଡ଼ରେ ଆହତ ହୋଇଥିଲେ ୪ ଜଣ ସାମ୍ବାଦିକ ।
ସେପଟେ ପେଟ୍ରୋଲ ପମ୍ପ ଭଙ୍ଗାରୁଜା ଘଟଣା ଓ ସାମ୍ବାଦିକଙ୍କୁ ମାଡ଼ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ପୁରୀ ଏସପି । ସିସିଟିଭି ଯାଂଚ ପରେ ଏନେଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି ।
ଆଜି ମେଡିକାଲ ରୋଡ ଛକରେ ରାସ୍ତା ଅବରୋଧ କରିଥିଲେ ସ୍ଥାନୀୟ ଲୋକ । ଏସପି ଓ କୁମ୍ଭାରପଡା ଥାନା ଅଧିକାରଙ୍କ ନିଲମ୍ବନ ଦାବି କରିବା ସହ ପେଟ୍ରୋଲ ପମ୍ପକୁ ହଟାଇବା ଦାବିରେ ଅଡି ବସିଥିଲେ ଲୋକେ । ଏସପି ଘଟଣା ସ୍ଥଳରେ ପହଂଚି ଉତେଜନାକାରୀଙ୍କୁ ବୁଝାସୁଝା କରିବା ସହ ଘଟଣାର ତଦନ୍ତ ନିର୍ଦ୍ଦେଶ ପରେ ରାସ୍ତା ରୋକ ହଟିଥିଲା । ତେବେ ଏହି ଘଟଣା, ପୁରୀ ସହର ଭଳି ସମ୍ବେଦନଶୀଳ ଅଂଚଳରେ ହୁଗୁଳା ଆଇନ ଶୃଙ୍ଖଳା ବ୍ୟବସ୍ଥାର ଚିତ୍ର ସାମନାକୁ ଆଣିଛି ।