ବାହାଘର ଚାଲିଥିବା ସମୟରେ କଳା କନା ବୁଲାଇଲେ ଚୋର ! କନ୍ୟାପକ୍ଷର ମୁଲ୍ୟବାନ ସୁନାଗହଣା ସହ ଉପହାର ଚୋରି ଅଭିଯୋଗ
କନକ ବ୍ୟୁରୋ : ବାହାଘର ଚାଲିଥିବା ସମୟରେ ଚୋରି । ସମ୍ବଲପୁର ଅଇଁଠାପାଲି ସ୍ଥିତ ଏକ କଲ୍ୟାଣ ମଣ୍ଡପରେ ବାହାଘର ଚାଲିଥିବା ବେଳେ ଚୋରି ହୋଇଥିବା ଅଭିଯୋଗ ହୋଇଛି । କନ୍ୟାପକ୍ଷର ମୁଲ୍ୟବାନ ସୁନାଗହଣା ସହ ଦାମି ଉପହାର ଚୋରି ହୋଇଛି । ମଣ୍ଡପର ଦୁଇଟି ରୁମରେ ପଛପଟ ଝରକା ତାଡ଼ି ୯ ଭରି ସୁନା ସହ ୪ ରୁ ୫ ଲକ୍ଷ ନଗଦଟଙ୍କା ଚୋରି ହୋଇଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଚୋରମାନେ ଏକ ବାହାଘର ସ୍ଥଳକୁ ଟାରଗେଟ କରି ମୋଟା ଅଙ୍କର ସାମଗ୍ରୀ ଚୋରି କରିବାରେ ସଫଳ ହେବା ସାରା ସହରରେ ଚର୍ଚ୍ଚା ସୃଷ୍ଟି କରିଛି । ସୂଚନାଯୋଗ୍ୟ ମୁଦିପଡ଼ା ନିବାସୀ ରଂଜନ କୁମାର ପଣ୍ଡାଙ୍କ କନ୍ୟା ବାହାଘର ମଙ୍ଗଳବାର ସଂଧ୍ୟାରେ ରୟାଲ ରିଟ୍ରିଟରେ ଅନୁଷ୍ଠିତ ହୋଇଥିଲା । ଏହି ସଂଭ୍ରାନ୍ତ ବାହାଘରରେ ବହୁ ସଂଖ୍ୟାରେ ଅତିଥି ଯୋଗ ଦେଇ ଉପହାରଭାବେ ଅନେକ ଗୁଡ଼ିଏ ଲଫାପାରେ ନଗଦ ଅର୍ଥ, ଅଳଙ୍କାର ଓ ଅନ୍ୟାନ୍ୟ ସାମଗ୍ରୀ କନ୍ୟାକୁ ପ୍ରଦାନ କରିଥିଲେ । ନିକଟ ସଂପର୍କୀୟମାନେ ସ୍ୱର୍ଣ୍ଣ ଅଳଙ୍କାର କନ୍ୟାକୁ ପ୍ରଦାନ କରିଥିଲେ । ରାତିରେ ବାହାଘର ଆରମ୍ଭ ହେବା ପରେ ପରିବାର ଲୋକ ସମସ୍ତ ଉପହାର ସାମଗ୍ରୀକୁ ଗୋଟିଏ କୋଠରିରେ ଭର୍ତ୍ତି କରି ବାହାର ପଟୁ ତାଲା ଲଗାଇ ବାହା ବେଦି ନିକଟକୁ ଚାଲି ଆସିଥିଲେ ।
ନିକଟ କୋଠରିଟି କ୍ୟାଟରିଂ ସଂସ୍ଥାର ମହିଳା ୱେଟରମାନଙ୍କୁ ଦିଆ ଯାଇଥିଲା ଓ ତହିଁରେ ସେମାନେ ନିଜ ବ୍ୟକ୍ତିଗତ ସାମଗ୍ରୀ ରଖି ତାଲା ଦେଇ ବାହାରେ କାମରେ ଲାଗିଥିଲେ । ରାତି ପ୍ରାୟ ୧୨ଟା ବେଳେ ଜଣେ ମହିଳା କର୍ମଚାରୀ ନିଜ କୋଠରିକୁ ଯାଇ ଦେଖିଲା ବେଳକୁ ସାମଗ୍ରୀ ଗୁଡ଼ିକ ବିକ୍ଷିପ୍ତଭାବେ ପଡ଼ିଥିଲା ଓ କୋଠରିର ଝର୍କା ଖୋଲା ଥିଲା । ସେ ବାହାରକୁ ଆସି ସମସ୍ତଙ୍କୁ ଡାକି ଥିଲେ। କନ୍ୟା ଘର ଲୋକ ଯାଇ ନିକଟସ୍ଥ ନିଜ କୋଠରି ଦେଖିଲା ବେଳକୁ ସେହି କୋଠରିର ମଧ୍ୟ ଝରକା ଖୋଲି ସବୁ ଉପହାର ସାମଗ୍ରୀ (ଟଙ୍କା ଓ ଅଳଙ୍କାର) ଗାୟବ ହୋଇ ଯାଇଥିଲା । ଏନେଇ କନ୍ୟା ପିତା ଶ୍ରୀ ପଣ୍ଡା ବୁଧବାର ଅଇଁଠାପାଲି ଥାନାରେ ଏତଲା ଦେଇଛନ୍ତି ।