ଯାଜପୁର ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ବିଗିଡି ଯାଇଛି ସ୍ୱାସ୍ଥ୍ୟସେବା : ଅସ୍ୱାସ୍ଥ୍ୟକର ପରିବେଶରେ ଚାଲିଛି ଡାକ୍ତରଖାନା
କନକ ବ୍ୟୁରୋ : ଅସୁସ୍ଥ ଡାକ୍ତରଖାନା । ମୁଖ୍ୟମନ୍ତ୍ରୀଙ୍କ ଉଦଘାଟନ ପରେ ବି ଲୋକଙ୍କ କାମରେ ଆସୁନି ଏମସିସିଏଚ୍ କୋଠା । ଏମିତି ଏକ ଡାକ୍ତରଖାନା ହେଉଛି ଯାଜପୁର ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର । ଏଠାରେ ସ୍ୱାସ୍ଥ୍ୟସେବା ସମ୍ପୂର୍ଣ୍ଣ ଭାବରେ ବିଗିଡି ଯାଇଛି । ଡାକ୍ତରଖାନାରେ ମାତ୍ର ତିନିଜଣ ଡାକ୍ତର ପାଳି କରି ଡାକ୍ତରଖାନା ଚଳାଉଥିବା ବେଳେ ରୋଗୀମାନେ ସଠିକ ଚିକିତ୍ସା ପାଉନଥିବା ଅଭିଯୋଗ ହୋଇଛି । ଧର୍ମଶାଳା ଅଂଚଳରେ ଗର୍ଭବତୀ ମହିଳା ଓ ନବଜାତକଙ୍କ ଉନ୍ନତ ଚିକିତ୍ସା ପାଇଁ ୬କୋଟି ଟଙ୍କା ବ୍ୟୟରେ ନିର୍ମାଣ କରାଯାଇଥିବା ଏମସିସିଏଚ୍ ଗୃହକୁ ମୁଖ୍ୟମନ୍ତ୍ରୀ ଉଦଘାଟନ କରିବା ପରେ ମଧ୍ୟ କାର୍ଯ୍ୟକ୍ଷମ ହୋଇନାହିଁ । ଏଣେ ଅସ୍ୱାସ୍ଥ୍ୟକର ପରିବେଶରେ ଚାଲିଛି ଡାକ୍ତଖାନାର ।
Kanak News is now on WhatsApp
Join and get latest news updates delivered to you via WhatsApp
ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ବ୍ଳକର ୫୪ଟି ପଂଚାୟତର ହଜାର ହଜାର ଲୋକଙ୍କ ଭରସା ପାଲଟିଥିବା ଏଠାରେ ଖାଲିପଡିଛି ଗାଇନକଲୋଜି, ପେଡିଆଟ୍ରିକ ଓ ସର୍ଜରୀ ଭଳି ଗୁରୁତ୍ୱପୂର୍ଣ୍ଣ ବିଭାଗର ପଦବି । ଯେଉଁ କେତେଜଣ ଡାକ୍ତର ଅଛନ୍ତି ସେମାନେ ଅଧିକାଂଶ ସମୟ ଘରୋଇ କ୍ଲିନିକରେ ଚିକିତ୍ସା କରୁଥିବାରୁ ଡାକ୍ତରଖାନାରୁ ରୋଗୀ ଚିକିତ୍ସା ନପାଇ ଫେରୁଥିବା ଅଭିଯୋଗ ହୋଇଛି । ଆଗାମୀ ଦିନରେ ଧର୍ମଶାଳା ଡାକ୍ତରଖାନାର ଅଚଳାବସ୍ତା ଦୂର ନହେଲେ ନବନିର୍ମାଣ ସଂଗଠନ ଆନ୍ଦୋଳନକୁ ଓହ୍ଲାଇବ ବୋଲି ଚେତାବନୀ ଦେଇଛି । ସେପଟେ ଏହି ଘଟଣାରେ ପ୍ରତିକ୍ରିୟା ରଖି ଯାଜପୁର ସିଡିଏମଓ କହିଛନ୍ତି ଖୁବଶୀଘ୍ର ଏମସିସିଏଚ ଗୃହ ସଚଳ ହେବ ।
କୋଟି କୋଟି ଟଙ୍କାରେ ନିର୍ମାଣ କରାଯାଇଥିବା ଧର୍ମଶାଳା ମେଡିକାଲର ଏମସିସିଏଚ ଗୃହ ମୁଖ୍ୟମନ୍ତ୍ରୀଙ୍କ ଦ୍ୱାରା ଉଦଘାଟନ ହେବା ପରେ କାର୍ଯ୍ୟକ୍ଷମ ନହେବା ଘଟଣା ସ୍ୱାସ୍ଥ୍ୟ ବିଭାଗର ଅପାରଗତାକୁ ଦର୍ଶାଉଛି ।