ଋଷ ସହ ଏସ-୪୦୦ ମିସାଇଲ୍ ଚୁକ୍ତି ପାଇଁ ଖପ୍ପା ହେଲା ଆମେରିକା : ଭାରତକୁ ଧମକାଇଲେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ପରିଣାମ ଭୋଗିବାକୁ ଦେଲେ ଚେତାବନୀ
କନକ ବ୍ୟୁରୋ : ଭାରତକୁ ଧମକାଇଲେ ଟ୍ରମ୍ପ । ଋଷ ସହ ଏସ-୪୦୦ ମିସାଇଲ୍ ଚୁକ୍ତି ପାଇଁ ଖପ୍ପା ହେଲା ଆମେରିକା । ଋଷ ସହ ଏସ-୪୦୦ ଆଂଟି ମିସାଇଲ୍ ସିଷ୍ଟମ୍ ଚୁକ୍ତି ନକରିବା ପାଇଁ ଭାରତକୁ ପୂର୍ବରୁ ଚେତାବନୀ ଦେଇ ଆସୁଥିବା ଆମେରିକା ଶେଷରେ ସିଧାସଳଖ ଭାରତକୁ ଆଖି ଦେଖାଇଛି । ଋଷ ସହ ଏସ-୪୦୦ ମିସାଇଲ୍ ଚୁକ୍ତି କରି ଭାରତକୁ ମହଙ୍ଗା ପଡିବ ବୋଲି କହିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ସେ କହିଛନ୍ତି ଯେ ଏହି ଚୁକ୍ତି କରି ଭାରତ ବହୁତ ବଡ ଭୁଲ କରିଛି । ଏହା ଆମେରିକାଜ୍ ଆଡଭର୍ସିଜ୍ ଥ୍ରୁ ସାଙ୍କସନ୍ସ ଆକ୍ଟ ବା କାଟ୍ସା’ର ଉଲ୍ଲଙ୍ଘନ । ତେଣୁ ଏହାର ପରିଣାମ ଭାରତକୁ ଭୋଗିବାକୁ ପଡିବ ବୋଲି ଟ୍ରମ୍ପ କହିଛନ୍ତି । ଏହା ସହ ନଭେମ୍ବର ୪ ପରେ ଇରାନ୍ ଠାରୁ ତେଲ ଆମଦାନୀ ଜାରି ରଖିଥିବା ଦେଶଗୁଡିକୁ ମଧ୍ୟ ଆମେରିକାର ଅସନ୍ତୋଷର ସାମନା କରିବାକୁ ପଡିବ ବୋଲି ଚେତାବନୀ ଦେଇଛନ୍ତି ଟ୍ରମ୍ପ ।
Kanak News is now on WhatsApp
Join and get latest news updates delivered to you via WhatsApp
ତେଣୁ ଆମେରିକା ଏବେ କାଟସା ଉଲ୍ଲଙ୍ଘନ ଅଭିଯୋଗରେ ଭାରତ ଉପରେ କଟକଣା ଲଗାଇପାରେ ବୋଲି ବିଶେଷଜ୍ଞମାନେ ଆଶଙ୍କା ପ୍ରକାଶ କରିଛନ୍ତି । କିନ୍ତୁ ଡୋନାଲ୍ଟ ଟ୍ରମ୍ପ ଭାରତ ପ୍ରତି କୋହଳ ମନୋଭାବ ପୋଷଣ କରିପାରନ୍ତି ବୋଲି ଆମେରିକାରେ ଅବସ୍ଥାପିତ ‘ଫ୍ରେଣ୍ଡସ୍ ଅଫ୍ ଇଣ୍ଡିଆ’ ଆଶା ପ୍ରକଟ କରିଛି । କାରଣ ଟ୍ରମ୍ପ ଭାରତକୁ ଆମେରିକାର ପ୍ରତିରକ୍ଷା ସହଯୋଗୀ ବୋଲି ଭାବୁ ଥିବାରୁ କଟକଣା ଲଗାଇ ନପାରନ୍ତି ବୋଲି ଅନୁମାନ କରାଯାଉଛି । ତେବେ ଭାରତ ଉପରେ କଟକଣା କୋହଳ କରିବା ଅଧିକାର କେବଳ ଟ୍ରମ୍ପଙ୍କର ହିଁ ରହିଛି ।