ମହିଳା ବିରୋଧୀ ହିଂସାରେ ୧ନମ୍ବର ସ୍ଥାନରେ ଭାରତ : ଆଫଗାନିସ୍ତାନ ଓ ସିରିଆଠାରୁ ବି ଭାରତରେ ଅଧିକ ଦୁଷ୍କର୍ମ
କନକ ବ୍ୟୁରୋ : ମହିଳାମାନଙ୍କ ପାଇଁ ସବୁଠୁ ବିପଦପୂର୍ଣ୍ଣ ଦେଶ ଭାରତ । ବିଶେଷ କରି ଦୁଷ୍କର୍ମ ଓ ଯୌନ ଶୋଷଣ ଦୃଷ୍ଟିରୁ ଆଗରେ ରହିଛି ଭାରତ । ମହିଳାଙ୍କ ଅଧିକାର ନେଇ ସାରା ବିଶ୍ୱରେ କାମ କରୁଥିବା ୫୫୦ ଜଣ ଏକ୍ସପର୍ଟଙ୍କ ମତ ଆଧାରରେ ଲଣ୍ଡନର ଏକ ସଂସ୍ଥାର ସର୍ଭେ ରିପୋର୍ଟ ଏମିତି କିଛି ଚାଂଚଲ୍ୟକର ରିପୋର୍ଟ ଦେଇଛି । ଆଫଗାନିସ୍ଥାନ ଏ ତାଲିକାର ଦ୍ୱିତୀୟ ସ୍ଥାନରେ ଥିବା ବେଳେ ଯୁଦ୍ଧ ବିଧ୍ୱସ୍ତ ସିରିଆ ରହିଛି ତୃତୀୟରେ । ଚତୁର୍ଥରେ ସୋମାଲିଆ ଓ ପଂଚମରେ ସ୍ଥାନ ପାଇଛି ସାଉଦୀ ଆରବ । ଏକମାତ୍ର ୟୁରୋପୀୟ ଦେଶ ଭାବେ ଆମେରିକା ପ୍ରଥମ ୧୦ଟି ସ୍ଥାନ ଭିତରେ ରହିଛି । ସବୁଠୁ ଶକ୍ତିଶାଳୀ ଓ ପ୍ରଭାବଶାଳୀ ଦେଶ ଆମେରିକା ସିରିଆ ସହ ତୃତୀୟରେ ରହିଛି । ୨୦୧୧ରେ ସଂସ୍ଥାର ସର୍ଭେରେ ଆଫଗାନିସ୍ଥାନ ପ୍ରଥମରେ ଥିବା ବେଳେ କଙ୍ଗୋ, ପାକିସ୍ତାନ, ଭାରତ ଓ ସୋମାଲିଆ ଦ୍ୱିତୀୟରୁ ପଂଚମ ସ୍ଥାନରେ ରହିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଗତ କିଛି ବର୍ଷ ଭିତରେ ଭାରତରେ ବୃଦ୍ଧି ପାଉଥିବା ଦୁଷ୍କର୍ମ, ହତ୍ୟା, ଯୌନ ଶୋଷଣ ଆଦି ମହିଳା ବିରୋଧୀ ହିଂସା ଦେଶକୁ ସବୁଠୁ ଅସୁରକ୍ଷିତ ସ୍ଥାନକୁ ନେଇଆସିଛି । ବିଶ୍ୱର ସବୁଠୁ ବର୍ଦ୍ଧିତ ଅର୍ଥନୀତି ଓ ବିକାଶଶୀଳ ଦେଶର ମହିଳା ସୁରକ୍ଷା କ୍ଷେତ୍ରରେ ସବୁଠୁ ପଛରେ ଥିବାରୁ ଚିନ୍ତା ପ୍ରକାଶ ପାଇଛି । ସରକାରୀ ତଥ୍ୟ କହୁଛି ୨୦୦୭ରୁ ୨୦୧୬ ଭିତରେ ଦେଶରେ ମହିଳା ବିରୋଧୀ ହିଂସା ୮୩ ପ୍ରତିଶତ ବୃଦ୍ଧି ପାଇଛି । ପ୍ରତି ଘଂଟାରେ ୪ ଜଣ ମହିଳା ଦୁଷ୍କର୍ମର ଶୀକାର ହେଉଛନ୍ତି ।