ଠକି ପାରିବେନି ସରପଞ୍ଚ ! ଆପଣଙ୍କ ପଞ୍ଚାୟତକୁ ମିଳୁଛି କେତେ ଟଙ୍କା, କେଉଁଠି ହେଉଛି ଖର୍ଚ୍ଚ, ଜାଣନ୍ତୁ ଗୋଟିଏ କ୍ଲିକରେ
ଗାଁର ବିକାଶରେ ଦେଶର ବିକାଶ । ଏକଥା କେବଳ କାଗଜ କଲମରେ ହିଁ ସିମୀତ ରହୁଛି । ଗାଁର ବିକାଶ ପାଇଁ ସରକାର ଅନେକ ପଦକ୍ଷେପ ହାତକୁ ନିଅନ୍ତି । କିନ୍ତୁ ସେହି ଯୋଜନାରେ ଆସୁଥିବା ଟଙ୍କା କିପରି ଖର୍ଚ୍ଚ ହୁଏ ତାହା ଅଧିକାଂଶ ଲୋକ ଜାଣନ୍ତି ନାହିଁ । ଏପରିକି କେଉଁ କାମ ପାଇଁ କେତେ ଟଙ୍କା ଆସିଥାଏ ତାହାର ଟିକିଏ ବି ସୂଚନା ଅଧିକାଂଶ ଗାଁ ଲୋକଙ୍କ ପାଖରେ ନଥାଏ । କିଛି ସ୍ୱାର୍ଥନିଷ୍ଠ ବ୍ୟକ୍ତି ଅଫିସରଙ୍କୁ ହାତ କରି ଗାଁର ବିକାଶ ପାଇଁ ଆସୁଥିବା ପଇସାକୁ ଚଳୁ କରୁଥିଲେ ମଧ୍ୟ ଏହା ଅଧିକାଂଶ ଲୋକ ଜାଣି ପାରି ନଥାନ୍ତି । କିନ୍ତୁ ଏବେ ଆଉ ଗୋଟିଏ କ୍ଲିକରେ ଗ୍ରାମ ପଞ୍ଚାୟତର କେଉଁ କାମ ପାଇଁ ଭାରତ ସରକାର କେତେ ଟଙ୍କା ଦେଉଛନ୍ତି ତାହା ଆପଣ ଜାଣିପାରିବେ । ଏପରିକି ଯୋଜନା ଅନୁଯାୟୀ କେତେ କାମ ହୋଇଛି ଓ କେତେ କାମ ବାକି ଅଛି ସେ ସବୁ ବିଷୟରେ ମଧ୍ୟ ସବିଶେଷ ତଥ୍ୟ ପାଇପାରିବେ ।
Kanak News is now on WhatsApp
Join and get latest news updates delivered to you via WhatsApp
ମୋବାଇଲରେ ଗୋଟିଏ କ୍ଲିକ କରି ଏହି ସବୁ ବିଷୟରେ ଜାଣି ପାରିବା ସହ ଯଦି କେଉଁ କାର୍ଯ୍ୟରେ ଅନିୟମିତତା ହେଉଥାଏ ତେବେ ଜନଶୁଣାଣୀ ସମୟରେ ମଧ୍ୟ ଅଭିଯୋଗ କରିପାରିବେ । ଏହାର ସମ୍ପୂର୍ଣ୍ଣ ବିବରଣୀ ଜାଣିବା ପାଇଁ http://planningonline.gov.in/ReportData.do?ReportMethod=getAnnualPlanReport ଲିଙ୍କରେ କ୍ଲିକ କରିବାକୁ ପଡିବ । ଏହାଦ୍ୱାରା କିଛି ବିକଳ୍ପ ପ୍ରଥମେ ସୋ କରିବ ।
ଆର୍ଥିକ ବର୍ଷ : ଏହି ବିକଳ୍ପରେ ପ୍ରଥମେ କେଉଁ ଆର୍ଥିକ ବର୍ଷର ତଥ୍ୟ ଜାଣିବାକୁ ଚାହୁଁଛନ୍ତି ତାହା ବାଛିବାକୁ ପଡିଥାଏ । ଉଦାହରଣ ସ୍ୱରୂପ ଯଦି ଚଳିତ ଆର୍ଥିକ ବର୍ଷର ତଥ୍ୟ ଜାଣିବାକୁ ଚାହୁଁଛନ୍ତି ତେବେ ୨୦୧୭-୧୮ ବିକଳ୍ପକୁ ବାଛିବାକୁ ହୋଇଥାଏ ।
ରାଜ୍ୟ : ଆର୍ଥିକ ବର୍ଷ ପରେ କେଉଁ ରାଜ୍ୟର ତଥ୍ୟ ଚାହୁଁଛନ୍ତି ତାହାକୁ ଦିଆଯାଇଥିବା ବିକଳ୍ପ ଉପରେ ଚୟନ କରନ୍ତୁ ।
ପ୍ଲାନ ୟୁନିଟ : ରାଜ୍ୟ ଚୟନ କରିବା ପରେ ସ୍କ୍ରିନ ଉପରେ ପ୍ଲାନ ୟୁନିଟର ଅପ୍ସନ ଆସିଥାଏ । ଏହି ତାଲିକାରେ ଗ୍ରାମ ପଞ୍ଚାୟତ, ପଞ୍ଚାୟତ ସମିତି କିମ୍ବା ଜିଲ୍ଲା ପରିଷଦ ବିକଳ୍ପ ମଧ୍ୟରୁ ଯାହା ଉପରେ ତଥ୍ୟ ଜାଣିବାକୁ ପଡିଥାଏ ତାହାକୁ ଚୟନ କରିବାକୁ ପଡିଥାଏ ।
ଜିଲ୍ଲା ପଞ୍ଚାୟତ : ଏହି ବିକଳ୍ପରେ କେଉଁ ଜିଲ୍ଲାର ତଥ୍ୟ ଜାଣିବାକୁ ଚାହୁଁଛନ୍ତି ତାହାକୁ ଚୟନ କରିବାକୁ ପଡିଥାଏ । ଉଦାହରଣସ୍ୱରୂପ ଯଦି ଆପର କେନ୍ଦ୍ରପଡା ଜିଲ୍ଲାର କେଉଁ ଗ୍ରାମ ପଞ୍ଚାୟତ କଥା ଜାଣିବାକୁ ଚାହୁଁଥାନ୍ତି ତେବେ କେନ୍ଦ୍ରାପଡା ଜିଲ୍ଲା ଚୟନ କରିବାକୁ ପଡିବ ।
ବ୍ଲକ ପଞ୍ଚାୟତ : ଏହି ବିକଳ୍ପରେ କେଉଁ ବ୍ଲକ ବିଷୟରେ ଜାଣିବାକୁ ଚାହୁଁଛନ୍ତି ତାହା ଦର୍ଶାଇବାକୁ ପଡିବ ।
ଗ୍ରାମ ପଞ୍ଚାୟତ : ଏହି ସୋପାନରେ କେଉଁ ଗ୍ରାମ ପଞ୍ଚାୟତ ବିଷୟରେ ଜାଣିବାକୁ ଚାହୁଁଛନ୍ତି ତାହାର ତଥ୍ୟ ଦେବାକୁ ହୋଇଥାଏ । ସବୁ ବିକଳ୍ପ ଚୟନ କରିବା ପରେ Get Report ଉପରେ କ୍ଲିକ କରନ୍ତୁ । ଏହାପରେ ପୂରା ପଞ୍ଚାୟତ ପାଇଁ କେତେ ଟଙ୍କା ବଜେଟ ହୋଇଛି ତାହା ସ୍ପଷ୍ଟ ଆସିଯିବ । ଏପରିକି କେଉଁ କାମ ପାଇଁ କେତେ ଟଙ୍କା ବଜେଟ ହୋଇଛି ତାହା ମଧ୍ୟ ସ୍ପଷ୍ଟ ଉଲ୍ଲେଖ ଥିବ । ଯଦି ୱେବସାଇଟରେ କାମ ହୋଇଥବାର ଉଲ୍ଲେଖ ଥିବ ଓ ବାସ୍ତବରେ କାମ ହୋଇନଥିବ ତେବେ ଜନଶୁଣାଣୀ ସମୟରେ ଏନେଇ ଅଭିଯୋଗ କରିପାରିବେ ।