ଆସିଲା ‘ଅଭିମନ୍ୟୁ’ର ଭାଇ : ଗୁମୁରି କାନ୍ଦୁଥିବା ଗୁମୁଡୁମାହାରେ ଖୁସିର ଖବର
ଗୁମୁଡୁମାହାରେ ସୁରକ୍ଷାକର୍ମୀଙ୍କ ଗୁଳିମାଡରେ ନିରୀହ ଗ୍ରାମବାସୀଙ୍କ ମୃତ୍ୟୁ ଘଟଣା । ଦେଢମାସ ତଳେ ସାରା ରାଜ୍ୟରେ ଏହି ଅଭାବନୀୟ ଘଟଣା ଚର୍ଚ୍ଚା ସୃଷ୍ଟି କରିଥିଲା । କନ୍ଧମାଳ ଆସିଥିଲା ପୁଣି ଚର୍ଚ୍ଚାକୁ। ରାଜନୀତି ବି ହେଲା । ନିନ୍ଦାରୁ ବଂଚିବାକୁ ତୁହାକୁ ତୁହା ସରକାର ଘୋଷଣା କରିଥିଲେ ଅନୁକମ୍ପା ରାଶି । ହେଲେ ଗୁମୁଡୁମାହାର କିଛି କୁନି ଚରିତ୍ର ଏବେ ବି ଆମ ସାମ୍ନାରେ । ଗୁଳିକାଣ୍ଡରେ ମାଆକୁ ବଂଚାଇ ଜଣେ ୧୩ ମାସର ଶିଶୁ ପ୍ରାଣ ହରାଇଥିବା କଥା ଆପଣଙ୍କର ମନେ ଥିବ । ହେଲେ ସେହି ମାଆଠାରୁ ଜନ୍ମ ନେଇଛି ପୁଣି ଏକ ପୁତ୍ର ସନ୍ତାନ।
Kanak News is now on WhatsApp
Join and get latest news updates delivered to you via WhatsApp
ଏହେଉଛି ସେହି ପୁଅ, ଯାହାର ୧୩ମାସର ଭାଇ ଗୁମୁଡୁମାହା ଗୁଳିକାଣ୍ଡରେ ପାଲଟି ଯାଇଥିଲା ଅଭିମନ୍ୟୁ । ଯିଏ ଗୁଳି ଖାଇ କେବଳ ମା’କୁ ବଂଚାଇ ନଥିଲା ବରଂ ମା’ ପେଟରେ ଥିବା ତା ସାନଭାଇକୁ ମଧ୍ୟ ବଂଚାଇଥିଲା ।
ଆଉ ନିଘୋଡ ନିଦରେ ଶୋଇଥିବା ଏ ପିଲାଟି ହେଉଛି ଗୁମୁଡୁମାହା ଅଭିମନ୍ୟୁର ସାନଭାଇ । ଯିଏ ଦୁଇଦିନ ତଳେ ଦୁନିଆ ଦେଖିଛି । ଜନ୍ମ ହେଉ ହେଉ କାଚଘରେ କରୁଛି ଜୀବନ ସଂଗ୍ରାମ । କାରଣ ମାତ୍ର ୭ ମାସ ବୟସର ହୋଇଥିବା ବେଳେ ସେ ମା’ର ଗର୍ଭ ଛାଡି ଦୁନିଆକୁ ଆସିଛି ।
ମଜୁରୀ ଟଙ୍କା ନେଇ ଘରକୁ ଫେରୁଥିବା ବେଳେ ସୁରକ୍ଷାକର୍ମୀଙ୍କ ଚକ୍ରବ୍ୟୁହରେ ପଡି ଯାଇଥିଲେ ଲୋଟ ଦିଗାଳ ଓ ସୁନୀତା ଦିଗାଳ । ଗୁଳିମାଡରେ ସାମାନ୍ୟ ଆଘାତ ହୋଇଥିଲେ ହେଲେ ଗର୍ଭବତୀ ମା’ ହରାଇଥିଲେ ନିଜ ଗେହ୍ଲାପୁଅକୁ । ମାତ୍ର ଦେଢମାସ ପରେ ପୁଣି ସୁନୀତା ଏବେ ମା’ ହୋଇଛନ୍ତି । ହେଲେ ମନ ଭଲ ନାହିଁ । କାରଣ କୁନି ପୁଅ ଜନ୍ମରୁ ଅସୁସ୍ଥ ।
କନ୍ଧମାଳ କରୁଣ କାହାଣୀ ଏବେ ଇତିହାସ । ହେଲେ ଏହି ଦୁଇ ପିଲାଙ୍କ ମଧ୍ୟରୁ ଜଣେ ଯୁବା ହେବା ପୂର୍ବରୁ ଯବାନ ସାଜିଥିଲା, ଆଉ ଜଣେ କଥା କହି ଶିଖିବା ପୂର୍ବରୁ ମା’ ଛେଉଣ୍ଡ ହୋଇ ଯାଇଥିଲା । ଆଉ ଏହି କୁନି ପିଲାଟି ଅଭିମନ୍ୟୁଙ୍କ ପୁଅ ପରୀକ୍ଷିତ ଭଳି ମା’ ପେଟରେ ଥାଇ ଶୁଣୁଥିଲା ଗୁଳିଗୋଳାର ଶବ୍ଦ ।