କନକ ବ୍ୟୁରୋ : ତିତ୍ଲି ବାତ୍ୟା ଯୋଗୁ କ୍ଷତିଗ୍ରସ୍ତ ଜଣେ ଚାଷୀ ଆଜି କୀଟନାଶକ ପିଇ ଆତ୍ମହତ୍ୟା କରିଛନ୍ତି । ଏହି ଘଟଣା ପ୍ରତିବାଦରେ ମୃତ ଚାଷୀଙ୍କ ପରିବାର ଲୋକେ ୪ ଘଣ୍ଟା ଧରି ରାସ୍ତାରୋକ କରିଛନ୍ତି । ମୃତ ଚାଷୀ ହେଲେ, ଗଜପତି ଜିଲ୍ଲା ଗୋଷାଣି ବ୍ଲକ ଏମ୍.ପୁର ପଞ୍ଚାୟତ ତୋଟାଗୁମୁଡ଼ା ଗ୍ରାମର ଚାଷୀ କେ. ଶ୍ରୀନୁ(୪୫) । ଶ୍ରୀନୁଙ୍କ ପରିବାର ଲୋକଙ୍କ କହିବାନୁସାରେ, ତାଙ୍କର ପ୍ରାୟ ୧ ଏକର ଜମି ରହିଛି । ମାଛମରା ଗ୍ରାମରେ ଥିବା ଅନ୍ୟ ୪ଏକର ଜମିରେ ସେ ଭାଗଚାଷ କରୁଥିଲେ । ସେ ପ୍ରାୟ ୩ ଲକ୍ଷ ଟଙ୍କା ହାତ ଉଧାର ଆଣି ଚାଷ କରିଥିଲେ । ତିତ୍ଲ ବାତ୍ୟା ପରେ ବନ୍ୟା ଯୋଗୁଁ ତାଙ୍କର ଜମିରେ ପାଣି ମାଡ଼ି ଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ପାଣି ଶୁଖିବା ପରେ ଯାହା କିଛି ଫସଲ ରହିଥିଲା ସେଥିରେ ପୋକ ଲାଗି ଯାଇଥିଲା । ଫସଲ ରକ୍ଷା କରିବା ପାଇଁ ଧାରକରଜ କରି ସେ କୀଟନାଶକ ଔଷଧ କ୍ରୟ କରି ଜମିରେ ସିଞ୍ଚନ କରିଥିଲେ । ତଥାପି କିଛି କାମ ଦେଇନଥିଲା । ସବୁ ଫସଲ ନଷ୍ଟ ହୋଇ ଯାଇଥିଲା । ଋଣ କିପରି ପରିଶୋଧ କରିବେ ସେ ଚିନ୍ତାରେ ରହୁଥିଲେ ଶ୍ରୀନୁ । ଗତକାଲି ସେ ମାନସିକ ଭାରସାମ୍ୟ ହରାଇ ଘରେ ଥିବା କୀଟନାଶକ ପିଇ ଦେଇଥିଲେ । ତାଙ୍କୁ ଗୁରୁତର ଅବସ୍ଥାରେ ଏମ୍କେସିଜି ମେଡିକାଲରେ ଭର୍ତ୍ତି କରାଯାଇଥିବା ବେଳେ ତାଙ୍କର ମୃତ୍ୟୁ ଘଟିଥିଲା ।