କନକ ବ୍ୟୁରୋ : ଚାଷ କାମ ଯାହାର କେଡେ ଆନନ୍ଦ ତାହାର । ଦିନେ ଏହି ଉକ୍ତି ଚାଷୀକୂଳଙ୍କ ମର୍ଯ୍ୟାଦା ବଢାଉଥିଲା କିନ୍ତୁ ବର୍ତ୍ତମାନ ଏହା ଏବେ ଅଭିଶାପ ପାଲଟିଛି । କେଉଁଠି ସରକାରୀ ବ୍ୟବସ୍ଥା ଆଉ କେଉଁଠି ଦଲାଲ ପୁଣି କେତେବେଳେ ଫସଲରେ ରୋଗ ପୋକ ଲାଗି ଚାଷୀର ମେରୁଦଣ୍ଡ ଭାଙ୍ଗି ଦେଉଛି । ନବରଙ୍ଗପୁର ଚନ୍ଦାହାଣ୍ଡି ବ୍ଲକରେ ଶତାଧିକ ଏକ ଧାନ ଗଛରେ ଧାନ ବଦଳରେ ଅଗାଡି ଲାଗିଯାଇଥିବାରୁ ଚାଷୀଙ୍କ ମୁଣ୍ଡରେ ଚଡକ ପଡିଛି । ତେବେ ଘରୋଇ କମ୍ପାନୀରୁ ବିହନ କିଣି ଚାଷ କରିଥିବା ଚାଷୀ ଠକାମୀର ଶିକାର ହୋଇଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଭଲ ଧାନ ଅମଳ ହେବ ଏବଂ ଦୁଇ ପଇସା ରୋଜଗାର କରିବେ ଏହି ଆଶାରେ ଚାଷ କରିଥିଲେ ଚାଷୀ । ନବରଙ୍ଗପୁର ଜିଲ୍ଲା ନନ୍ଦାହାଣ୍ଡୀ ବ୍ଲକର ଚାଷୀମାନେ ଏକ ଘରୋଇ କମ୍ପାନୀ ଠାରୁ ବିହନ କିଣି ଧାନ ଅମଳ କରିଥିଲେ । କମ୍ପାନୀର କର୍ମଚାରୀମାନେ ଏକର ପିଛା ୩୦କ୍ୱିଂଟାଲ ଧାନ ହେବାର ପ୍ରଲୋଭନ ଦେଖାଇଥିଲେ । ଋଣ ନେଇ ଚାଷ କରିଥିବା ଚାଷୀ ଏବେ ଚିନ୍ତାରେ । କାରଣ ଧାନ ଅମଳ ହେବା ସମୟରେ ଅଗାଡି ହୋଇଯାଇଛି । ସରକାରୀ ଅଧିକାରୀ ମାନେ ଧାନ ଅମଳ କମିଯିବାର ଆକଳନ କରିବା ପରେ ଚାଷୀ ମୁଣ୍ଡରେ ଚଡକ ପଡିଛି ।
ଧାର କରଜ କରି ଚାଷ କରିଥିବା ଚାଷୀ ଏବେ ଅମଳ ସମୟରେ ଧାନ ଅଗାଡି ହୋଇଯିବା ଯୋଗୁଁ ଚିନ୍ତାରେ ପଡିଛି । ଏକର ଏକର ଜମିରେ ଚାଷ କରିଥିବା ଚାଷୀ ଏବେ କିପରି ପରିବାର ପ୍ରତିପୋଷଣ କରିବ ସେ ନେଇ କୌଣସି ଉପାୟ ପାଇପାରୁନାହିଁ । ଅପରପକ୍ଷରେ ଘରୋଇ କମ୍ପାନୀ ଦ୍ୱାରା ଯଦି ଚାଷୀମାନେ ଠକାମୀର ଶିକାର ହୋଇଥିବେ ତେବେ ତଦନ୍ତ କରି କମ୍ପାନୀ ବିରୋଧରେ ଉଚିତ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲା କୃଷି ଉପନିର୍ଦ୍ଦେଶକ କହିଛନ୍ତି । ରୋଜଗାର କରିବାର ସ୍ୱପ୍ନ ଯୋଗୁଁ ଯେ ବହୁମୂଲ୍ୟ ଦେବାକୁ ପଡିବ ଏହା କେବେ ଚିନ୍ତା କରିନଥିଲା ଚାଷୀ । ଏପରି ସମୟରେ ନବରଙ୍ଗପୁରର ଚାଷୀଙ୍କୁ ଆର୍ଥିକ ସହାୟତାର ଆବଶ୍ୟକତା ରହିଥିବା ବେଳେ ବିଭାଗ କଣ ପଦକ୍ଷେପ ନେଉଛି ତା ଉପରେ ଚାଷୀଙ୍କ ଭାଗ୍ୟ ନିର୍ଭର କରୁଛି ।