ରାଜନୈତିକ ଛକାପଞ୍ଝାରେ ଗଲା ଡ୍ରାଇଭର ଦିଲେଶ୍ୱରଙ୍କ ଜୀବନ ! ନବୀନ କହିଲେ କ୍ଷମା ପାଇବେନି ହତ୍ୟାକାରୀ, ପିଲାଙ୍କ ପାଠପଢା ଖର୍ଚ୍ଚ ବହନ କରିବ ବିଜେଡି
କନକ ବ୍ୟୁରୋ : ପ୍ରଚାର ଶେଷ ଦିନ ରାତିରେ ବିଜେପୁରରେ ମନ୍ତ୍ରୀ ସୁଶାନ୍ତ ସିଂହଙ୍କ ଭାଇ ସୁବ୍ରତ ସିଂହଙ୍କୁ ଆକ୍ରମଣ ଘଟଣାରେ ସେହି ଗାଡିର ଡ୍ରାଇଭର ଦିଲେଶ୍ୱର ସାହୁଙ୍କ ମୃତ୍ୟୁ ହୋଇଯାଇଛି । ମୁଖ୍ୟମନ୍ତ୍ରୀ ଏହି ଘଟଣାକୁ ନୃଶଂସକାଣ୍ଡ ବୋଲି କହିବା ସହ ନିନ୍ଦା କରିଛନ୍ତି । ଦିଲେଶ୍ୱରଙ୍କ ପିଲାଙ୍କ ପାଠପଢା ଖର୍ଚ୍ଚ ବିଜେଡି ବହନ କରିବ ବୋଲି ସୁପ୍ରିମୋ ନବୀନ ଘୋଷଣା କରିଛନ୍ତି । ଏପଟେ ଘଟଣାକୁ ନେଇ ଜାରି ରହିଛି ଆରୋପ ପ୍ରତ୍ୟାରୋପ ।
Kanak News is now on WhatsApp
Join and get latest news updates delivered to you via WhatsApp
ବିଜେପୁରରେ ନିର୍ବାଚନ ସିନା ଶାନ୍ତିପୂର୍ଣ୍ଣ ଭାବରେ ଶେଷ ହୋଇଛି, ହେଲେ ରାଜନୈତିକ ଛକାପଂଝା ଭିତରେ ଚାଲି ଯାଇଛି ଜଣଙ୍କ ଜୀବନ । ଜୀବନ ଯୁଦ୍ଧରେ ହାରି ଯାଇଛନ୍ତି ଡ୍ରାଇଭର ଦିଲେଶ୍ୱର ସାହୁ । ଗତ ଗୁରୁବାର ଦିନ ଶ୍ରମମନ୍ତ୍ରୀ ସୁଶାନ୍ତ ସିଂହଙ୍କ ଭାଇ ସୁବ୍ରତ ସିଂହଙ୍କୁ ନେଇ ଯାଉଥିଲେ ଦିଲେଶ୍ୱର । ସୋହେଲା ବନାବିରା, ଯେଉଁଠି ଏମାନଙ୍କ ଉପରେ ଅତର୍କିତ ଆକ୍ରମଣ ହୋଇଥିଲା । କଟକ ବଡ ମେଡ଼ିକାଲରେ ଆଖିବୁଜି ଦେଇଛନ୍ତି ଦିଲେଶ୍ୱର ସାହୁ । ଏହାପରେ ଦିଲେଶ୍ୱରଙ୍କ ପରିବାର ସମୂର୍ଣ୍ଣ ଭାବେ ଭାଙ୍ଗିପଡିଛି । ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଦିଲେଶ୍ୱର ଦାବି କରିଛନ୍ତି ।
କିଏ ରାଜନୀତି କରିବ, ଆଉ କିଏ ନିର୍ବାଚିତ ହୋଇ ବିଧାନସଭା ଯିବ । ହେଲେ ଜୀବନ ଦେବାକୁ ପଡିବ ଏହି ଭଳି ଦିଲେଶ୍ୱର ସାହୁଙ୍କ ଭଳି ଲୋକଙ୍କୁ । କାରଣ ସ୍ପଷ୍ଟ ହୋଇନଥିଲେ ବି ରାଜନୈତିକ ହିଂସା ଓ ପ୍ରତିହିଂସା ଯୋଗୁଁ ଏଭଳି ଆକ୍ରମଣ ହୋଇଥିବା ଅନୁମାନ କରାଯାଉଛି । ଅନ୍ୟପଟେ ମୃତ ଡ୍ରାଇଭର ଦିଲେଶ୍ୱରଙ୍କ ମୃତଦେହକୁ କଟକ ମେଡ଼ିକାଲରୁ ବିଜେଡି କାର୍ଯ୍ୟଳୟକୁ ଅଣାଯାଇଥିଲା । ଯେଉଁଠି ମୁଖ୍ୟମନ୍ତ୍ରୀ ଦିଲେଶ୍ୱରଙ୍କୁ ଶେଷ ଶ୍ରଦ୍ଧାଞ୍ଜଳି ଦେଇଥିଲେ ।
ଦିଲେଶ୍ୱର ସବୁ ଦିନ ପାଇଁ ଦୁନିଆ ଛାଡ଼ି ଚାଲି ଯାଇଛନ୍ତି । ହେଲେ ତାଙ୍କ ଶବ ଉପରେ କିନ୍ତୁ ରାଜନୀତି ଥମିନି । ଶାସକ ବିଜେଡି ଏଥିପାଇଁ ବିଜେପିକୁ ଦାୟୀ କରିଥିବା ବେଳେ ବିଜେପି କହୁଛି ଦିଲେଶ୍ୱରଙ୍କୁ ହତ୍ୟା କରାଯାଇଥାଇପାରେ । ଓଡ଼ିଶାରେ ରାଜନୈତିକ ପ୍ରତିଦ୍ୱନ୍ଦିତା ଏତେ ତିବ୍ରତର ହେଉଛି ଯେ, କେତେବେଳେ ହିଂସା ଘଟୁଛି ତ, ଆଉ କେତେବେଳେ ଜୀବନ ଚାଲିଯାଉଛି । ଆଉ ଲୋକଙ୍କ ଜୀବନକୁ ନେଇ ଚାଲିଛି ରାଜନୀତିର ରୋଟି ସେକା ।