ମହାନଦୀ ପାଣି ପାଇଁ ସାଲିସ୍ କରାଯିବନି : ଧର୍ମେନ୍ଦ୍ର ପ୍ରଧାନ
ଭୁବନେଶ୍ୱର ବ୍ୟୁରୋ, କନକ ନ୍ୟୁଜ୍ : ମହାନଦୀ ମହାବିବାଦ ଉପରେ ମୁହଁ ଖୋଲିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସାମ୍ବାଦିକ ସମ୍ମିଳନୀ ଡାକି ନିଜର ଆଭିମୁଖ୍ୟ ରଖିଛନ୍ତି କେନ୍ଦ୍ର ମନ୍ତ୍ରୀ । ଧର୍ମେନ୍ଦ୍ର କହିଛନ୍ତି, ଏହି ବିବାଦ ଏକ ରାଜନୈତିକ ବିବାଦ ନୁହେଁ, ଏଥିରେ ୪ କୋଟି ଓଡ଼ିଆଙ୍କ ଭାଗ୍ୟ ନିର୍ଭର କରୁଛି । ମହାନଦୀର ପାଣି ପାଇଁ ବୁଝାମଣା କରାଯିବନି, ଏଥିପାଇଁ ସମସ୍ତେ ଏକାଠି ହୋଇ କାମ କରିବା ଜରୁରୀ ବୋଲି ସେ କହିଛନ୍ତି। ଛତିଶଗଡ଼ ସରକାର, ଓଡ଼ିଶା ସରକାର ଓ ସିଡବ୍ଲୁସି ମଧ୍ୟରେ ଚିଠି ଦେବା ନେବା ନେଇ ଯେଉଁ ବିବାଦ ଚାଲିଛି, ସେ ନେଇ ବିଜେପି ଏକ ଶ୍ୱେତପତ୍ର ପ୍ରକାଶ କରିବ ବୋଲି କହିଛନ୍ତି କେନ୍ଦ୍ରମନ୍ତ୍ରୀ । ତେବେ ଯୁଗ୍ମ ପରିଚାଳନା କମିଟି ଗଠନ ଉପରେ ସେ ଜୋର ଦେଇଛନ୍ତି। ଓଡ଼ିଶା ସରକାର ଏହି ଯୁଗ୍ମ ପରିଚାଳନା କମିଟି ଗଠନ ପ୍ରସଙ୍ଗକୁ ଯେପରି ଝୁଲାଇ ରଖିଛନ୍ତି, ତାକୁ ସମାଲୋଚନା କରିଛନ୍ତି ଧର୍ମେନ୍ଦ୍ର । ସେହିପରି ମହାନଦୀ ବିବାଦ ପ୍ରସଙ୍ଗରେ ବିରୋଧୀ ଦଳ ନେତା ନରସିଂହ ମିଶ୍ରଙ୍କ ଭୂମିକାକୁ ପ୍ରଶଂସା କରିଛନ୍ତି ଧର୍ମେନ୍ଦ୍ର । ମହାନଦୀ ଉପରେ ଛତିଶଗଡର ବ୍ୟାରେଜ ନିର୍ମାଣ ପ୍ରସଙ୍ଗକୁ ନେଇ ରାଜ୍ୟ ରାଜନୀତି ସରଗରମ ରହିଥିବା ବେଳେ ଧର୍ମେନ୍ଦ୍ରଙ୍କ ଏହି ସାମ୍ବାଦିକ ସମ୍ମିଳନୀକୁ ନେଇ ଚର୍ଚ୍ଚା ଜୋର ଧରିଛି।
Kanak News is now on WhatsApp
Join and get latest news updates delivered to you via WhatsApp