ମିଥାନଲ ପିଇଲେ ଭଲ ହୋଇଯିବ କରୋନା ! ଇରାନରେ ଗୁଜବକୁ ସତ ଭାବି ଜୀବନ ବିକଳରେ ବିଷାକ୍ତ ମଦ ପିଇଦେଲେ ଲୋକେ; ୩ଶହ ମୃତ, ୧୦୦୦ରୁ ଅଧିକ ଅସୁସ୍ଥ
ବିଦ୍ର- କରୋନାକୁ ନେଇ କୌଣସି ଗୁଜବରେ ବିଶ୍ୱାସ କରନ୍ତୁ ନାହିଁ ।
କନକ ବ୍ୟୁରୋ: ସାରା ଦୁନିଆରେ ଆତଙ୍କ ରଚିଥିବା କରୋନା ଭାଇରସର ପ୍ରକୋପ ଥମିବାର ନା ଧରୁନି । ଦିନକୁ ଦିନ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବା ସହ ମୃତ୍ୟୁ ସଂଖ୍ୟା ମଧ୍ୟ ବଢିଚାଲିଛି । ଆଉ ଏହି ମହାମାରୀ ଭୁତାଣୁ ବିଶ୍ୱର ୨୦୨ ଦେଶକୁ ବ୍ୟାପିଥିବା ବେଳେ ୫ ଲକ୍ଷରୁ ଅଧିକ ଲୋକ ଏହାର ଶିକାର ହୋଇସାରିଲେଣି । ସେହିପରି ସାରା ବିଶ୍ୱରେ ପ୍ରାୟ ୨୬ ହଜାର ୪୪୭ ଲୋକ କୋଭିଡ-୧୯ରେ ପ୍ରାଣ ହରାଇ ସାରିଥିବା ବିଶ୍ୱ ସ୍ୱାସ୍ଥ୍ୟ ସଂଗଠନ ପକ୍ଷରୁ ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
କରୋନାର କୋକୁଆ ଭୟ ଭିତରେ ଇରାନରେ ବର୍ତ୍ତମାନ କରୋନା ଭାଇରସକୁ ନେଇ ସୃଷ୍ଟି ହୋଇଛି ଏକ ବଡ ବିପର୍ଯ୍ୟୟ । ଏକ ଗୁଜବର ଶିକାର ହୋଇ ଇରାନରେ ପ୍ରାୟ ୩ ଶହ ଲୋକ ପ୍ରାଣ ହରାଇଥିବା ବେଳେ ୧ ହଜାରରୁ ଅଧିକ ଲୋକ ଏବେ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି ହୋଇ ଜୀବନ ମରଣ ସହ ସଂଗ୍ରହ କରୁଛନ୍ତି । ମିଳିଥିବା ସୂଚନା ଅନୁସାରେ, ଇସଲାମିକ୍ ରିପବ୍ଲିକ୍ ଅଫ୍ ଇରାନରେ ମିଥାନଲ ନାମକ ଏକ ରସାୟନିକ ପଦାର୍ଥ (ଇଣ୍ଡଷ୍ଟ୍ରିଆଲ ଆଲକୋହଲ) ପିଇ ୩ ଶହରୁ ଅଧିକ ଲୋକ ପ୍ରାଣ ହରାଇବା ଘଟଣା ସମସ୍ତଙ୍କୁ ଚକିତ କରିଦେଇଛି । ତେବେ ମିଥାନଲ ଆଲକହଲ ପିଇଲେ କାଳେ କରୋନା ଭଲ ହୋଇଯିବ ବୋଲି ସୋସିଆଲ ମିଡିଆରେ ଏକ ମିଥ୍ୟା ଖବର ପ୍ରସାରିତ ହେବାପରେ ଲୋକେ ଏହାକୁ ସତ ବୋଲି ଧରିନେଇଥିଲେ । ଫଳରେ ଇରାନରେ ଏଭଳି ସାଂଘାତିକ ସ୍ଥିତି ଉପୁଜିଥିବା ଜଣାପଡିଛି ।
ଅନ୍ୟପଟେ ବିଷାକ୍ତ ମଦ ପିଇ ଇରାନରେ ଏତେ ସଂଖ୍ୟକ ଲୋକଙ୍କ ଜୀବନ ଯିବା ପରେ ଇରାନ ସରକାରଙ୍କ ନିର୍ଦ୍ଦେଶକ୍ରମେ ବିଭିନ୍ନ ସ୍ଥାନରେ ଚଢଉ କରି ଏହାକୁ ଜବତ କରାଯାଇଛି । ଏଥି ସହିତ ଏଭଳି ଗୁଜବ ପ୍ରସାର କରିଥିବା ଲୋକଙ୍କ ବିରୋଧରେ ମଧ୍ୟ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।