ନିମାପଡା ଓ ବଡଚଣା ପାଇଁ ନୂଆ ପ୍ରାଥୀଙ୍କ ନାଁ ଘୋଷଣା କଲା କଂଗ୍ରେସ ! ବଡଚଣା ପାଇଁ ଅଜୟ ସାମଲଙ୍କୁ ମିଳିଲା ଟିକେଟ, ନିମାପଡାରୁ ସତ୍ୟବ୍ରତଙ୍କ ସ୍ଥାନରେ ଦିଲ୍ଲୀପ ନାୟକ ଲଢିବେ ନିର୍ବାଚନ

123

କନକ ବ୍ୟୁରୋ : ଆଉ ମାତ୍ର ଗୋଟିଏ ଦିନ ପରେ ପ୍ରଥମ ପର୍ଯ୍ୟାୟ ନିର୍ବାଚନ । ପ୍ରମୁଖ ରାଜନୈତିକ ଦଳ ଗୁଡ଼ିକ ୨୦୧୯ ମହାସମର ପାଇଁ ସୀପାହି ପ୍ରସ୍ତୁତ କରିସାରିଛନ୍ତି । ୨୦୧୯ରେ ଦେଖିବାକୁ ମିଳିବ ଜୋରଦାର ଲଢ଼େଇ । ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ଆଜି ସରୁଛି ନିର୍ବାଚନ ପ୍ରଚାର ।  ଗୋଟିଏ ପଟେ ପ୍ରଚାର ମଇଦାନ ସରଗରମ ଥିବାବେଳେ ଆଜି ପ୍ରାର୍ଥୀ ବଦଳାଇଛି କଂଗ୍ରେସ ।

ନିମାପଡା ଓ ବଡଚଣା ବିଧାନସଭା ଆସନ ପାଇଁ ଆଜି ନୂଆ ପ୍ରାର୍ଥୀ ଘୋଷଣା କରିଛି କଂଗ୍ରେସ । ବଡଚଣାରୁ କଂଗ୍ରେସ ପ୍ରାର୍ଥୀ ହେବେ ଅଜୟ ସାମଲ । ଏଠାରୁ ନିର୍ବାଚନ ଲଢିବାକୁ ପୂର୍ବତନ ମନ୍ତ୍ରୀ ସୀତାକାନ୍ତ ମହାପାତ୍ର ମନା କରିଦେଇଥିଲେ । ସୀତାକାନ୍ତ ମହାପାତ୍ର ଟିକେଟ୍ ମିଳିବାରେ ବିଳମ୍ବରେ ଅଭିଯୋଗ ଦର୍ଶାଇ ଶେଷ ମୁହୂର୍ତ୍ତରେ ନିର୍ବାଚନ ଲଢିବାକୁ ମନାକରିଦେଇଥିଲେ । ଏହା ପରେ ଆଜି ସକାଳୁ ନୂଆ ପ୍ରାର୍ଥୀ ଘୋଷଣା କରିଛି କଂଗ୍ରେସ । ସେହିଭଳି ନିମାପଡାରୁ ଲଢିବେ ଦିଲ୍ଲୀପ ନାୟକ । ଆଜି ସେ ନିଜର ନାମାଙ୍କନ ପତ୍ର ଦାଖଲ କରିବେ । ଏଠାରେ ନିର୍ବାଚନ ଲଢିବାକୁ ସତ୍ୟବ୍ରତ ପାତ୍ର ମନାକରିଦେବା ପରେ ନୂଆ ପ୍ରାର୍ଥୀ ଘୋଷଣା କରିଛି କଂଗ୍ରେସ । ଟିକେଟ ଘୋଷଣାରେ ବିଳମ୍ବ ଯୋଗୁଁ ସେ ଟିକେଟ ଫେରାଇ ଦେଇଥିଲେ। ଟିକେଟ ଫେରାଇବା ସହ ପୁରୀ ଜିଲ୍ଲା ସାଧାରଣ ସମ୍ପାଦକ ପଦରୁ ମଧ୍ୟ ଇସ୍ତଫା ଦେଇଛନ୍ତି ସତ୍ୟବ୍ରତ ।

ଦିନକୁ ଦିନ କଂଗ୍ରେସ ପାଇଁ ସଙ୍କଟ ବଢ଼ିବାରେ ଲାଗିଛି । କିଏ ଟିକେଟ ଘୋଷଣାରେ ବିଳମ୍ବ ପାଇଁ ଦଳ ଛାଡ଼ୁଛି ତ ଆଉ କିଏ ଟିକେଟ ପାଇ ମଧ୍ୟ ଫେରାଇ ଦେଉଛି । ଯାହା ପିସିସି ସଭାପତିଙ୍କ ପାଇଁ ମୁଣ୍ଡବିନ୍ଧାର କାରଣ ପାଲଟିଛି । ଏହା ପୂର୍ବରୁ ପିପିଲି ବିଧାନସଭା ପ୍ରାର୍ଥୀ ଯୁଧିଷ୍ଠିର ସାମନ୍ତରାୟ, ତିର୍ତୋଲ୍ ପ୍ରାର୍ଥୀ ବିଭୁପ୍ରସାଦ ତରାଇ, କବିସୂର୍ଯ୍ୟନଗର ପ୍ରାର୍ଥୀ ସୀତାରାମ ପାଣିଗ୍ରାହୀ ପ୍ରମୁଖ କଂଗ୍ରେସ ଦଳରୁ ନିର୍ବାଚନ ଲଢ଼ିବା ପାଇଁ ଅନିଚ୍ଛା ପ୍ରକାଶ କରିଥିଲେ।

ମତାମତ

Your email address will not be published.