ଚୀନରେ ଏକଛତ୍ରବାଦ ଯୁଗର ଆରମ୍ଭ! ସି ଜିନପିଙ୍ଗ୍ ଏବେ ଚୀନର ସର୍ବେସର୍ବା, ଆଜୀବନ ରହିବେ ରାଷ୍ଟ୍ରପତି । ଦେଶର ସମ୍ବିଧାନରେ ଐତିହାସିକ ପରିବର୍ତନ
କନକ ବ୍ୟୁରୋ : ଚୀନରେ ଆରମ୍ଭ ହେଲା ଏକଛତ୍ରବାଦ ଶାସନର ଯୁଗ । ଆଜୀବନ ରାଷ୍ଟ୍ରପତି ରହିବେ ସି ଜିନପିଙ୍ଗ୍ । ପାର୍ଲିଆମେଂଟରେ ଏ ନେଇ ସମ୍ବିଧାନକୁ ସଂଶୋଧନ କରାଯାଇଛି । ସମ୍ବିଧାନ ସଂଶୋଧନ ପରେ ଏକକ ଶାସନ ଭାର ଦିଆଯାଇଛି ଜିନପିଙ୍ଗଙ୍କୁ । ଏହାର ଅର୍ଥ ହେଉଛି କମ୍ୟୁନିଷ୍ଟ ପାର୍ଟିଠାରୁ ଆରମ୍ଭ କରି ପ୍ରଶାସନିକ ବ୍ୟବସ୍ଥାର ସେ ହିଁ ସର୍ବେସର୍ବା । କମ୍ୟୁନିଷ୍ଟ ପାର୍ଟି ପକ୍ଷରୁ କୁହାଯାଇଛି ତାଙ୍କରି ଭିଜନ୍ ଓ ଦୁର୍ନୀତି ମୁକ୍ତ ଆଭିମୁଖ୍ୟ ଯୋଗୁଁ ଉଭୟ ଆର୍ଥିକ ଓ ସାମରିକ ପାୱାର ହାଉସ ହୋଇପାରିଛି ଚୀନ । ଭାରତ-ଚୀନର ତିକ୍ତ ସଂପର୍କ ଦୃଷ୍ଟିରୁ ଏବେ ଦୁଇ ଦେଶର ସଂପର୍କ କେଉଁ ମୋଡ଼ ନେବ, ଏହା ଉପରେ ସମସ୍ତଙ୍କ ନଜର ।
Kanak News is now on WhatsApp
Join and get latest news updates delivered to you via WhatsApp
ଚୀନର ରାଷ୍ଟ୍ରପତି ସି ଜିନପିଙ୍ଗଙ୍କୁ ଏପରି ଅଧିକାର ଦିଆଯାଇଛି ଯାହା ଜାଣିଲେ ପ୍ରତ୍ୟେକ ଗଣତାନ୍ତ୍ରିକ ରାଷ୍ଟ୍ର ଆଶ୍ଚର୍ଯ୍ୟ ହୋଇଯିବେ । ସି ଜିନପିଙ୍ଗଙ୍କୁ ଆଜୀବନ ରାଷ୍ଟ୍ରପତି ହେବାର କ୍ଷମତା ମିଳିଛି । ଅର୍ଥାତ୍ ଜୀବନ ଥିବା ପର୍ଯ୍ୟନ୍ତ ସେ ଚୀନର ରାଷ୍ଟ୍ରପତି ରହିବେ । ତାଙ୍କ ହାତରେ ରହିବ ସବୁ କ୍ଷମତା । ଚୀନର ସମ୍ବିଧାନରେ ସଂଶୋଧନ କରାଯାଇ ଏକକ ଶାସନ ଭାର ଦିଆଯାଇଛି ଜିନପିଙ୍ଗଙ୍କୁ । ଏହାର ଅର୍ଥ ହେଉଛି, ସବୁ ଅନୁଷ୍ଠାନର ସେ ହିଁ ମୁଖ୍ୟ । କମ୍ୟୁନିଷ୍ଟ ପାର୍ଟିଠାରୁ ଆରମ୍ଭ କରି ପ୍ରଶାସନିକ ବ୍ୟବସ୍ଥାର ସେ ହିଁ ସର୍ବେସର୍ବା । ଚୀନ ପାର୍ଲିଆମେଂଟରେ ଦେଶର ସମ୍ବିଧାନ ସଂଶୋଧନ କରାଯାଇଛି । ପୂର୍ବରୁ ସମ୍ବିଧାନ ଅନୁଯାୟୀ ଜଣେ ରାଷ୍ଟ୍ରପତି ୫ ବର୍ଷିୟା ଦୁଇଟି ଟର୍ମ ରହିପାରିବା ବ୍ୟବସ୍ଥା ଥିଲା । ସମ୍ବିଧାନ ସଂଶୋଧନ କରାଯାଇ ଜିନପିଙ୍ଗଙ୍କୁ ଦିଆଯାଇଛି ଆଜୀବନ ରାଷ୍ଟ୍ରପତି ରହିବା ଅଧିକାର ।
ସମ୍ବିଧାନ ସଂଶୋଧନ ପ୍ରସ୍ତାବ ଉପରେ ୨୯୬୩ ସଦସ୍ୟ ବିଶିଷ୍ଟ ଚୀନ ସଂସଦରେ ୨୯୫୮ ଜଣ ଜିନପିଙ୍ଗ୍ଙ୍କ ସପକ୍ଷରେ ମତ ଦେଇଥିଲେ । ମାତ୍ର ଦୁଇ ଜଣ ଜିନପିଙ୍ଗଙ୍କୁ ବିରୋଧ କରିଥିଲେ । ୩ ଜଣ ସଦସ୍ୟ ଗୃହରେ ଉପସ୍ଥିତ ନଥିଲେ । ଚୀନରେ କମ୍ୟୁନିଷ୍ଟ ଶାସନ ପ୍ରତିଷ୍ଠା କରିଥିବା ମାଓ ସେ ତୁଙ୍ଗଙ୍କ ସମକକ୍ଷ ସମ୍ମାନ ମିଳିଛି ଜିନପିଙ୍ଗଙ୍କୁ । ସମ୍ବିଧାନ ସଂଶୋଧନ ପରେ ମିଳିତ ନେତୃତ୍ୱ ନେଇ ସିଭିଲ୍ ସୋସାଇଟିର ଦାବି ଉପରେ ପାଣି ପଡିଯାଇଛି । କମ୍ୟୁନିଷ୍ଟ ପାର୍ଟି, ସରକାର, ପିପୁଲସ ଲିବରେସନ୍ ଆର୍ମି, ଗଣମାଧ୍ୟମ ଆଦି ସବୁ ବ୍ୟବସ୍ଥା ରହିବ ସି ଜିନପିଙ୍ଗଙ୍କ ନିୟନ୍ତ୍ରଣରେ ।
୨୦୧୨ ମସିହାରେ କମ୍ୟୁନିଷ୍ଟ ପାର୍ଟିର ସାଧାରଣ ସଂପାଦକ ଭାବେ କ୍ଷମତାକୁ ଆସିଥିଲେ ସି ଜିନପିଙ୍ଗ୍ । ପୂର୍ବ ସମ୍ବିଧାନ ଅନୁଯାୟୀ ୨୦୨୨ରେ ରାଷ୍ଟ୍ରପତି ପଦରୁ ସେ ଅବ୍ୟାହତି ନେଇଥାନ୍ତେ । ହେଲେ ଏହା ପୂର୍ବରୁ ଦଳକୁ ସପୂର୍ଣ୍ଣ ଭାବେ ନିଜ ନିୟନ୍ତ୍ରଣକୁ ନେଇଥିଲେ ଜିନପିଙ୍ଗ୍ । ଏବେ ତାଙ୍କୁ ମିଳିଛି ଆଜୀବନ ରାଷ୍ଟ୍ରପତି ରହିବା ଅଧିକାର । କମ୍ୟୁନିଷ୍ଟ ପାର୍ଟି ପକ୍ଷରୁ କୁହାଯାଇଛି ତାଙ୍କରି ଭିଜନ୍ ଯୋଗୁଁ ଚୀନ, ବିଶ୍ୱର ଉଭୟ ଆର୍ଥିକ ଓ ସାମରିକ ପାୱାର ହାଉସ ଭାବେ ଉଭା ହୋଇଛି ।
ଡୋକଲାମ୍ ପ୍ରସଙ୍ଗକୁ ନେଇ ଚୀନ ସହ ତିକ୍ତ ହୋଇଥିଲା ଭାରତର ପ୍ରସଙ୍ଗ । ସେପଟେ ପାକିସ୍ତାନ ସହ ରହିଛି ଚୀନର ନିବିଡ଼ ସଂପର୍କ । ଏହିଭଳି ସ୍ଥିତିରେ ସି ଜିନପିଙ୍ଗ୍ ଆଜୀବନ ରହିବେ ଚୀନର ରାଷ୍ଟ୍ରପତି । ଆଗକୁ ଦୁଇ ଦେଶର ସଂପର୍କ କେଉଁ ମୋଡ ନେବ, ଏ ନେଇ ଆରମ୍ଭ ହୋଇଛି ଜୋରଦାର ତର୍ଜମା ।