କନକ ବ୍ୟୁରୋ : ଦିଲ୍ଲୀ ସନ୍ଥନଗର ୧୧ମୃତ୍ୟୁ ଘଟଣା ପଛରେ ଜଣେ ତାନ୍ତ୍ରିକଙ୍କ ହାତ ଥିବାକୁ ନେଇ ଉଠିଛି ପ୍ରଶ୍ନ । ଗୀତାଦେବୀ ନାମକ ମହିଳା ତାନ୍ତ୍ରିକଙ୍କୁ ପୋଲିସ ହେପାଜତକୁ ନେଇଛି । ଲଳିତ ଭାଟିଆ ପରିବାର ସହ ତାଙ୍କର କି ସମ୍ପର୍କ ଥିଲା ସେନେଇ ପୋଲିସ ଛାନଭିନ କରୁଛି । ଖାଲି ସେତିକି ନୁହେଁ ଏହି ସାମୂହିକ ଆତ୍ମହତ୍ୟା ସମ୍ପର୍କରେ ଲଳିତଙ୍କ ପରିବାର ସହିତ ତାନ୍ତ୍ରିକ ପୂର୍ବରୁ କିଛି କଥା ହୋଇଥିଲେ କି ନାହିଁ ଏବଂ ଏନେଇ କିଛି ଆଭାସ ମିଳିଥିଲା କି ନାହିଁ ସେନେଇ ପୋଲିସ ତଦନ୍ତ କରୁଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ମହିଳା ଜଣଙ୍କ ତାଙ୍କ ବିରୋଧରେ ଆସିଥିବା ଅଭିଯୋଗକୁ ଖଣ୍ଡନ କରିଛନ୍ତି । ପୋଲିସ ସେହି ଘରୁ ଜବତ କରିଥିବା ସମସ୍ତ ମୋବାଇଲର କଲ ଡିଟେଲକୁ ଯାଂଚ କରୁଛି । ଏସବୁ ଫୋନରୁ କାହାକୁ କାହାକୁ ଫୋନ ହୋଇଥିଲା ସେନେଇ ଖୋଳତାଡ କରୁଛି ପୋଲିସ । ପ୍ରାୟ ୫୦୦ ଜଣ ଲୋକଙ୍କ ଏକ ତାଲିକା ତିଆରି କରିଛି ପୋଲିସ । ୧୦୦ଜଣଙ୍କୁ ପଚରା ଉଚରା ସରିଛି । ଆଉ ୪୦୦ଜଣଙ୍କୁ ସାମୂହିକ ଆତ୍ମହତ୍ୟା ସମ୍ପର୍କରେ ପଚରା ଉଚରା କରାଯିବ ବୋଲି ପୋଲିସ କହିଛି ।
ବର୍ତ୍ତମାନ ପର୍ଯ୍ୟନ୍ତ ହୋଇଥିବା ଯାଞ୍ଚରୁ ଏହି ସାମୂହିକ ଆତ୍ମହତ୍ୟା ପଛରେ ଧାର୍ମିକ ଅନ୍ଧବିଶ୍ୱାସ, ତନ୍ତ୍ରମନ୍ତ୍ର ଏବଂ ମୋକ୍ଷ ମୁଖ୍ୟ କାରଣ ରହିଥିବା ଜଣାପଡ଼ିଛି । ଆତ୍ମହତ୍ୟା କରିବା ପୂର୍ବରୁ ସମସ୍ତ ସଦସ୍ୟ ମୃତ୍ୟୁର ରହିର୍ସାଲ କରୁଥିବାନେଇ କେତେକ ନୂଆ ପ୍ରମାଣ ମିଳିଛି । ପୁଲିସ ଜବତ କରିଥିବା ଡାଏରୀ ଛାନ୍ଭିନ୍ରୁ ଏ ସଂପର୍କିତ ତଥ୍ୟ ମିଳିଛି । ୩୦ ଜୁନ୍ ପୂର୍ବରୁ ଭାଟିଆ ପରିବାର ଲଗାତାର ୬ ଦିନ ଧରି ଫାଶୀରେ ଝୁଲିବା ଅଭ୍ୟାସ କରୁଥିଲେ ବୋଲି ଜଣାପଡ଼ିଛି । ସମସ୍ତେ ସମୂହ ଭାବେ କିଭଳି ଏହି ଅଭ୍ୟାସ କରିବେ ସେ ସଂପର୍କରେ ମଧ୍ୟ ତଥ୍ୟ ଉଲ୍ଲେଖ ରହିଛି ।
କ୍ରାଇମ୍ ବ୍ରାଞ୍ଚ ଟିମ୍ ଆତ୍ମହତ୍ୟା ସ୍ଥଳରୁ ୯ଟି ଷ୍ଟୁଲ୍ ଜବତ କରିଛନ୍ତି । ଏଥିରେ ୮ଟି ବଡ଼ ଷ୍ଟୁଲ ଥିବା ବେଳେ ଗୋଟିଏ ଛୋଟ ଷ୍ଟୁଲ୍ ରହିଥିଲା । ଏହା ବ୍ୟତୀତ ଫାଶୀ ଲଗାଇବା ପାଇଁ ବ୍ୟବହାର ହୋଇଥିବା ତାରକୁ ମଧ୍ୟ ଯାଞ୍ଚ କରାଯାଉଛି । ପୁଲିସ କହିବା ମୁତାବକ ପରିବାରର ୯ ଜଣ ସଦସ୍ୟ ଆତ୍ମହତ୍ୟା ପାଇଁ ୫ଟି ଷ୍ଟୁଲ ବ୍ୟବହାର କରିଥିବା ବେଳେ ଆଉ ଏକ ଷ୍ଟୁଲ ଲଳିତ ଓ ଭୂପିଙ୍କ ମା’ ବ୍ୟବହାର କରିଥାନ୍ତେ । ଏହି ଆତ୍ମହତ୍ୟା ପଛରେ ଲଳିତଙ୍କ ପତ୍ନୀଙ୍କ ଭୂମିକା ଅଧିକ ରହିଥିବା ଏବଂ ଲଲିତଙ୍କ ନିଷ୍ପତ୍ତି କାର୍ଯ୍ୟକାରୀ କରିବା ପାଇଁ ସେ ସମସ୍ତଙ୍କ ଉପରେ ଚାପ ସୃଷ୍ଟି କରିଥିବା ଡାଏରୀ ଅନୁଧ୍ୟାନରୁ ଜଣାପଡ଼ିଛି ।