ଦିଲ୍ଲୀରେ ଓଡ଼ିଶାର ପଲ୍ଲୀ ଝିଅଙ୍କ କମାଲ୍ ! ପରେଡ୍ ପଡ଼ିଆରେ ୩ଶହ ୩୦ସିସି ବୁଲେଟରେ ଷ୍ଟଂଟ୍ ଦେଖାଇ ସାରା ଦେଶକୁ ଚମାକାଇ ଦେଇଥିଲେ ମହିଳା ଯବାନ
କନକ ବ୍ୟୁରୋ: ପୁତ୍ର ମୋହରେ ଅନ୍ଧ ହୋଇ, ଝିଅଙ୍କୁ ଅଲୋଡ଼ା ଭାବୁଥିବା ଲୋକଙ୍କୁ, ହୁଏତ ଏହି କାହାଣୀ ସେମାନଙ୍କ ଆଖି ଖୋଲିଦେବ । ନାରୀ ଆଜି ଅବଳା କିମ୍ବା ଦୁର୍ବଳା ହୋଇ ରହିନି । ଘରର ଚାରିକାନ୍ଥ ଭିତରୁ ବାହାରି ଆସି, ଆଜି ସେ ସଫଳତାର ଶିଖରରେ ପହଂଚିଛି । ଦେଶକୁ ସୁରକ୍ଷା ଦେଉଥିବା ସେହି ୩ ଜଣ ମହିଳା ଯବାନଙ୍କ କାହାଣୀ ଆମେ କହୁଛୁ । ଯେଉଁମାନେ ସାଧାରଣତନ୍ତ୍ର ଦିବସ ପ୍ୟାରେଡରେ ଦୁଃସାହାଶିକ ମୋଟର ସାଇକେଲ ଷ୍ଟଂଡ୍ ଦେଖାଇ ପୁରା ଦେଶବାସୀଙ୍କୁ ଚମକାଇ ଦେଇଥିଲେ । ଦିଲ୍ଲୀରେ ଝଲସି ଥିଲେ ଓଡ଼ିଶାର ପଲ୍ଲୀ ଝିଅ ।
Kanak News is now on WhatsApp
Join and get latest news updates delivered to you via WhatsApp
ଜାନୁଆରୀ ୨୬ ପରେଡ.. ୬୯ତମ ଗଣତନ୍ତ୍ର ଦିବସରେ ଯେତେବେଳେ ଦିଲ୍ଲୀ ରାଜପଥରେ ନାରୀ ଶକ୍ତିର ଅପୂର୍ବ ପ୍ରଦର୍ଶନ କରିଥିଲେ ସୀମା ସୁରକ୍ଷା ବାହିନୀର ଏହି ମହିଳା ଯବାନ ସେତେବେଳେ ସାରା ଦେଶର ଆଖି ଲାଖି ଯାଇଥିଲା । ମୋଟର ସାଇକେଲ ଉପରେ ଅଦ୍ଭୁତ ସାହସ ଓ ସନ୍ତୁଳନ ଦେଖାଇଥିଲେ ମହିଳାମାନେ । ଯାହା ଦେଖି ମଣିଶ ନା ମେସିନ ବୁଝିବା କଷ୍ଟକର ହୋଇପଡୁଥିଲା । ୫ଟି ବୁଲେଟରେ ସବାର ୩୦ଜଣ ବିଏସଏଫ ମହିଳା ଯବାନ । ୫ଟି ପଦ୍ମ ପାଖୁଡାର ଆକୃତି ନେଇ ମାଡିଚାଲିଥିଲେ ଆଉ ଦେଖାଇଥିଲେ ନାରୀ ଶକ୍ତିର ନୂଆ ପରିଭାଷା । ଗୋଟିଏ ବାଇକରେ ଥିଲେ ୭ ଯବାନ । ପବନ ଚକିିର ଆକୃତି ନେଇ ମାଡିଚାଲିଥିଲେ ପରେଡ ପଡିଆରେ । କୋମଳ ହୃଦୟର ନାରୀ କେତେ ସାହସୀ ହୋଇପାରେ ଏଭଳି ଚିତାକର୍ଷକ ଷ୍ଟଂଟ ଜରିଆରେ ଦେଇଥିଲେ ତାର ପ୍ରମାଣ ।
ଜାଣିଲେ ଆଶ୍ଚର୍ଯ୍ୟ ହେବେ ଦିଲ୍ଲୀ ରାଜପଥରେ ନିଜ ପ୍ରତିଭାର ପାରଦର୍ଶିତା ପ୍ରଦର୍ଶନ କରିଥିବା ଏହି ମହିଳା ଯବାନଙ୍କ ଭିତରେ ବି ଥିଲେ ବଲାଙ୍ଗିର ଘସିଏନ ଗାଁର କ୍ରୀଷ୍ଣା ଗଡତିଆ । ୨୦୧୧ରେ ସେ ଭାରତୀୟ ସୀମା ସୁରକ୍ଷା ବାହିନୀରେ ଯୋଗ ଦେଇଥିବାବେଳେ ସୀମା ଭବାନୀ ଦଳରେ ସାମିଲ ହୋଇ ଦିଲ୍ଲୀ ପରେଡ ପଡିଆରେ ବି ପ୍ରଦର୍ଶନ କରିଛନ୍ତି ଚିତାକର୍ଷକ ଷ୍ଟଂଟ । ଯେଉଁଥିବାଇଁ ମହାମହିମ ରାଷ୍ଟ୍ରପତିଙ୍କଠାରୁ ଆରମ୍ଭ କରି ତାଙ୍କ ଅଂଚଳବାସୀଙ୍କ ଯାଏଁ ମିଳିଛି ଭୁରିଭୁରି ପ୍ରଶଂସା ।
ସେହିପରି ସମ୍ବଲପୁର ଠେମରା ଗାଁର ଦୁଇ ଭଉଣୀ ଅନସୂୟା ଖେଡିଆ ଓ ସୁକମଣି ଖେଡିଆ ମଧ୍ୟ ଏହି ୧୧୩ ଜଣିଆ ଟିମରେ ସାମିଲ ହେବାର ଗୌରବ ଅର୍ଜନ କରିଥିଲେ । କମାଣ୍ଡୋ ଟ୍ରେନିଂ ନେଇଥିବା ସୀମା ସୁରକ୍ଷା ବଳର ଏହି ଦୁଇ ମହିଳା ଯବାନ ମାତ୍ର ୨୫ ଦିନର ପ୍ରଶିକ୍ଷଣ ପରେ ପରେଡ ପଡିଆରେ ପ୍ରଦର୍ଶନ କରିଥିଲେ ୩୩୦ ସିସି ରୟାଲ ଏନଫିଲ୍ଡ ବାଇକରେ ଆଖି ଲାଖିଗଲା ଭଳି ଷ୍ଟଂଟ ।
ଉଲ୍ଲେଖଥାଉ କି, ୨୦୧୫ରେ ପ୍ରଥମକରି ଦିଲ୍ଲୀ ରାଜପଥରେ ଜାତୀୟ ପରେଡରେ ଭାରତୀୟ ସ୍ଥଳସେନା, ବାୟୁ ସେନା ଓ ନୌସେନାର ମହିଳା ବାହିନୀକୁ ସାମିଲ କରାଯାଇଥିଲା । ଆଉ ଚଳିତବର୍ଷ ସୀମା ଭବାନୀ ପକ୍ଷରୁ ପ୍ରଦର୍ଶିିିତ ବାଇକ ଷ୍ଟଂଟରେ ଓଡିଶାର ୬ଜଣ ମହିଳା ଯବାନ ସାମିଲ ହୋଇ ସାରା ରାଜ୍ୟ ପାଇଁ ଗୌରବ ଆଣିଦେଇଥିଲେ ।