କରୋନା କଟକଣା ଭିତରେ ବଢୁଛି ଦାଦନ ଶ୍ରମିକଙ୍କ ସମସ୍ୟା : ତାଲାବନ୍ଦ ଭିତରେ ଆରମ୍ଭ ହେଲା ଘରବାହୁଡା, ଜାତୀୟ ରାଜପଥରେ ଶହ ଶହ ଶ୍ରମିକଙ୍କ ଭିଡକୁ ନେଇ ବଢିଲା ଚିନ୍ତା
କନକ ବ୍ୟୁରୋ : କରୋନା ଯୋଗୁଁ ଲାଗିଥିବା କଟକଣା ଅନେକଙ୍କ ପାଇଁ ଦୁର୍ଦ୍ଦଶା ନେଇ ଆସିଛି । ବିଶ୍ୱ ମହାମାରୀକୁ ରୋକିବା ପାଇଁ ଏହାକୁ ସମସ୍ତେ ସ୍ୱାଗତ ମଧ୍ୟ କରୁଛନ୍ତି । କିନ୍ତୁ ଅନେକ ଏହି ତାଲାବନ୍ଦ ଫଳରେ ଅସୁବିଧାରେ ମଧ୍ୟ ପଡୁଛନ୍ତି । ରାଜ୍ୟ ତଥା ରାଜ୍ୟ ବାହାରେ ଆଉ ଫସି ରହିଛନ୍ତ ହଜାର ହଜାର ଦାଦନ ଶ୍ରମିକ । ଗାଡି ଚାଲୁନଥିବାରୁ କେମିତି ଫେରିବେ ଘରକୁ । ଏହାରି ଭିତରେ ୩ ଜଣ ଯୁବକ ରାଜଧାନୀ ଭୁବନେଶ୍ୱରରୁ ଚାଲିଚାଲି ବାହାରିଛନ୍ତି କନ୍ଧମାଳ ଟିକାବାଲିକୁ । ଭୁବନେଶ୍ୱରରୁ ଟିକାବାଲି ଦୂରତା ପ୍ରାୟ ୨୫୦ କିମି । ମୁଣ୍ଡ ଉପରେ ପ୍ରବଳ ଖରା, ତଳେ ଡହ ଡହ ତାତି । ଗୋଡ ଫୋଟକା ହୋଇଗଲାଣି କିନ୍ତୁ ବାଟ ସରୁନି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ରାଉରକେଲାରେ ଠିକା ଶ୍ରମିକ ଭାବେ କାମ କରୁଥିବା ଉତ୍ତର ପ୍ରଦେଶର ୧୦ ଜଣ ଯୁବକ ଏବେ ବାହାରିଛନ୍ତି ନିଜ ଘର ଅଭିମୁଖେ । ଗାଡି ମଟର ଚାଲୁ ନଥିବା ବେଳେ ସେମାନେ ରାଉରକେଲାରୁ ଉତରପ୍ରଦେଶକୁପାଦରେ ଚାଲିଚାଲି ଯାଉଛନ୍ତି । ଗତକାଲି ରାତିରେ ସେମାନେ ଦୀର୍ଘ ୩୦ କିରୋମିଟର ବାଟ ଚାଲି ଚାଲି କୁଆରମୁଣ୍ଡାରେ ପହଞ୍ଚିଥିଲେ । ଭୋକ ଉପାସରେ ସେମାନେ ଚାଲିଛନ୍ତି । ଏପରିକି ପ୍ରଶାସନକୁ ଏନେଇ ସୂଚନା ଦେଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଇନଥିବା ଅଭିଯୋଗ ହେଉଛି । ଅନ୍ୟପଟେ ରାଜ୍ୟ ସରକାର ଅନ୍ୟ ରାଜ୍ୟ ମାନଙ୍କୁ ସେଠାରେ ଅଟକି ଥିବା ଓଡିଆଙ୍କ ପାଇଁ ସୁବିଧା କରିବାକୁ ଅନୁରୋଧ କରିଥିବା ବେଳେ ଅନ୍ୟ ରାଜ୍ୟର ବ୍ୟକ୍ତି ଓଡିଶାରେ ଅଟକି ରହିଥିଲେ ସେମାନଙ୍କ ସୁବିଧା କରିବା କଥା ଉଲ୍ଲେଖ କରିଛନ୍ତି ।