ପାହାନ୍ତିଆରେ କଟକ ବଡ ମେଡିକାଲରେ ପହଞ୍ଚିଲେ ପାଣ୍ଡିଆନ । ଏସସିବିର ଦ୍ୱିତୀୟ କ୍ୟାମ୍ପସ ପ୍ରସ୍ତାବିତ ଅଞ୍ଚଳ ବୁଲି ଦେଖିଲେ ।
କନକ ବ୍ୟୁରୋ : ପାହାନ୍ତିଆରେ କଟକ ବଡ ମେଡିକାଲରେ ପହଞ୍ଚିଲେ ଫାଇଭ-ଟି ସଚିବ ଭି.କେ ପାଣ୍ଡିଆନ । କଟକ ଏସସିବି ମେଡିକାଲ ସହ ଏସସିବିର ଦ୍ୱିତୀୟ କ୍ୟାମ୍ପସ ପ୍ରସ୍ତାବିତ ଅଞ୍ଚଳ ମହାନଦୀର ହାଡିଆ ପଠା ଓ ସିସୋର ପଠା ପରିଦର୍ଶନ କରିଛନ୍ତି ପାଣ୍ଡିଆନ । ପୂର୍ବଥର ଭଳି ଏଥର ମଧ୍ୟ ବଡି ଭୋରରୁ ବଡ ମେଡିକାଲରେ ପହଞ୍ଚିଥିଲେ ପାଣ୍ଡିଆନ । ଭୋର ପାଖାପାଖି ୫ଟା ସମୟରେ ଏସସିବିରେ ପହଞ୍ଚି ବିଭିନ୍ନ କାର୍ଯ୍ୟକ୍ରମର ସ୍ଥିତି ପରିଖିଥିଲେ ପାଣ୍ଡିଆନ ।
Kanak News is now on WhatsApp
Join and get latest news updates delivered to you via WhatsApp
କଟକ ବଡ଼ ଡାକ୍ତରଖାନାରୁ ବାହାରି ମେରିଟାଇମ ମ୍ୟୁଜିୟମରେ ଅନୁଷ୍ଠିତ ଏକ ସମୀକ୍ଷା ବୈଠକରେ ଯୋଗ ଦେବା ପରେ ପଠା ଅନୁଧ୍ୟାନ କରିଥିଲେ ପାଣ୍ଡିଆନ୍ । ଏହି ବୈଠକରେ ୫-ଟି ସଚିବଙ୍କ ସହ ଜଳ ସମ୍ପଦ ବିଭାଗର ଉଚ୍ଚ ଅଧିକାରୀ ଓ ଆର୍ଡିସି ମଧ୍ୟ ଉପସ୍ଥିତ ଥିଲେ । ମହାନଦୀ ହାଡିଆ ପଠାରେ କଟକ ଜିଲ୍ଲାପାଳ, ପୋଲିସ୍ କମିସନରଙ୍କ ସହ କଟକ ଡିସିପି ମଧ୍ୟ ଉପସ୍ଥିତ ଥିଲେ ।
ଏହାପୂର୍ବରୁ ଗତ ୬ ନଭେମ୍ବର ୨୦୧୯ରେ ମଧ୍ୟ ବଡି ଭୋରରୁ କଟକ ବଡ ମେଡିକାଲ ଗସ୍ତ କରିଥିଲେ ପାଣ୍ଡିଆନ । ଉଦ୍ଦେଶ୍ୟଥିଲା, ରାଜ୍ୟର ସବୁଠୁ ବଡ଼ ମେଡ଼ିକାଲରେ କେମିତି ଚାଲିଛି ସ୍ୱାସ୍ଥ୍ୟ ସେବା ତା’ର ତଦାରଖ କରିବା । ପ୍ରଥମେ କାଜୁଆଲିଟି ଯାଇ ରୋଗୀଙ୍କ ଅବସ୍ଥା ଯାଂଚ କରିଥିବା ବେଳେ ପରେ ଅଧୀକ୍ଷକଙ୍କ କାର୍ଯ୍ୟାଳୟକୁ ଯାଇ ମ୍ୟାପର ଅନୁଧ୍ୟାନ କରିଥିଲେ । ଏସସିବିରେ ଖାଲି ପଡ଼ିଥିବା ଜାଗାର କିଭଳି ସୁବିନିଯୋଗ ହୋଇ ପାରିବ, ତା’ର ଅନୁଧ୍ୟାନ କରିଥିଲେ ଫାଇଭ-ଟି ସଚିବ ।
ଆଉ ପାଣ୍ଡିଆନଙ୍କ ଗସ୍ତ ପରେ ପରେ ହିଁ କଟକ ବଡ଼ ମେଡ଼ିକାଲ ପାଇଁ ବଡ଼ ଧରଣର ଘୋଷଣା କରିଥିଲେ ରାଜ୍ୟ ସରକାର । ମୁଖ୍ୟମନ୍ତ୍ରୀ ୧୦୦୦ କୋଟି ଟଙ୍କାର ପ୍ୟାକେଜ ଘୋଷଣା କରିଥିଲେ । ଏସସିବିକୁ ଏମ୍ସ ପ୍ଲସ ଭାବେ ଗଢି ତୋଳିବାକୁ ଲକ୍ଷ୍ୟ ରଖାଯାଇଥିଲା । ଏଥିପାଇଁ ୩ ହଜାର ଶର୍ଯ୍ୟା ବିଶିଷ୍ଟ ସମନ୍ୱିତ ହସ୍ପିଟାଲ ନିର୍ମାଣ କରିବାକୁ ଘୋଷଣା କରାଯାଇଥିଲା ।