ମହଙ୍ଗା ପଡିଲା ବଲ ଟାମ୍ପରିଂ ! ୧ବର୍ଷ ପାଇଁ ସ୍ମିଥ, ୱାର୍ନରଙ୍କୁ ଦଳରୁ ବିଦା କଲା ଅଷ୍ଟ୍ରେଲିଆ
ମହଙ୍ଗା ପଡିଲା ବଲ ଟାମ୍ପରିଂ । ୧ ବର୍ଷ ପାଇଁ ଅଷ୍ଟ୍ରେଲିଆ ଦଳରୁ ବିଦା ହେଲେ ଷ୍ଟିଭ୍ ସ୍ମିଥ ଏବଂ ଡେଭିଡ ୱାର୍ନର । ଏହା ସହ କେମରନ ବେନକ୍ରାଫ୍ଟଙ୍କ ଉପରେ ୯ ମାସର ପ୍ରତିବନ୍ଧକ ଲଗାଯାଇଛି । କିନ୍ତୁ ବିଶ୍ୱକପ ଖେଳିବା ନେଇ ଏହି ଖେଳାଳୀମାନଙ୍କ ଉପରେ ଆଶଙ୍କା ନାହିଁ । ବିଶ୍ୱକପ ୩୦ ମେ ୨୦୧୯ ରୁ ଆରମ୍ଭ ହେବ । ଯାହା ପୂର୍ବରୁ ଏହି ସମସ୍ତ ଖେଳାଳୀଙ୍କ ଉପରୁ ପ୍ରତିବନ୍ଧକ ହଟି ସାରିଥିବ ।
Kanak News is now on WhatsApp
Join and get latest news updates delivered to you via WhatsApp
କ୍ରିକେଟ ଅଷ୍ଟ୍ରେଲିଆର ଏହି ନିଷ୍ପତ୍ତି ପରେ ଏବେ ଏହି ଦୁଇ ପ୍ରମୁଖ ଖେଳାଳୀଙ୍କୁ ଚଳିତ ଆଇପିଏଲରୁ ବିଦା କରିଛି ବିସିସିଆଇ । ସେମାନଙ୍କ ଜାଗାରେ ଅନ୍ୟ ଦୁଇ ଜଣ ଖେଳାଳୀଙ୍କୁ ଦଳରେ ସାମିଲ କରାଯିବ । ଚଳିତ ଆଇପିଏଲରୁ ଏହି ଦୁଇ ଖେଳାଳୀଙ୍କ ବାସନ୍ଦ ନେଇ ସୂଚନା ଦେଇଛନ୍ତି ଆଇପିଏଲ କମିଶନର ରାଜୀବ ଶୁକ୍ଲା । ରାଜୀବ ଶୁକ୍ଳା କହିଛନ୍ତି ଯେ, ଖୁବ ଶୀଘ୍ର ରାଜସ୍ଥାନ ରୟାଲ୍ସ ଏବଂ ସନ ରାଇଜର୍ସ ହାଇଦ୍ରାବାଦକୁ ଷ୍ଟିଭ୍ ସ୍ମିଥ ଏବଂ ଡେଭିଡ ୱାର୍ନରଙ୍କ ବଦଳ ଖେଳାଳୀ ଦିଆଯିବ । ଅଷ୍ଟ୍ରେଲିଆ ଟିମ କୋଚ ଡେରେନ ଲିମ୍ୟାନଙ୍କୁ ଏହି ମାମଲାରେ କ୍ଲିନ ଚିଟ୍ ଦେଇଛି କ୍ରିକେଟ ଅଷ୍ଟ୍ରେଲିଆ ।
ସେପଟେ କ୍ରିକେଟ ଅଷ୍ଟ୍ରେଲିଆ ଏହି ତିନି ଖେଳାଳୀଙ୍କୁ ଦକ୍ଷିଣଆଫ୍ରିକା ଗସ୍ତରୁ ଅଷ୍ଟ୍ରେଲିଆ ପଠାଇ ଦେଇଛି । ତିନି ଜଣ ଖେଳାଳୀ ଅଷ୍ଟ୍ରେଲିଆ ଫେରି ଆସିଛନ୍ତି ।
ଏହା ଥିଲା ବଲ ଟାମ୍ପରିଂର ପୁରା ଘଟଣା :
କେପଟାଉନରେ ଦକ୍ଷିଣଆଫ୍ରିକା ବିରୋଧରେ ତୃତୀୟ ଟେଷ୍ଟ ମ୍ୟାଚର ତୃତୀୟ ଦିନରେ ଅଷ୍ଟ୍ରେଲିଆର ଓପନର କେମରନ୍ ବେନକ୍ରାଫ୍ଟ ବଲ ଟାମ୍ପରିଂ କରୁଥିବା ବେଳେ ଧରାପଡିଥିଲେ । ମ୍ୟାଚ ଚାଲିଥିବା ସମୟରେ ବେନକ୍ରାଫ୍ଟ ନିଜ ଟ୍ରାଉଜରରୁ ଏକ ହଳଦିଆ ରଙ୍ଗର ବସ୍ତୁ କାଢୁଥିବାର ଦେଖା ଯାଇଥିଲା । ଏହି ଘଟଣା ପରେ ଏକ ସାମ୍ବାଦିକ ସମ୍ମିଳନୀରେ ଅଷ୍ଟ୍ରେଲିଆ ଅଧିନାୟକ ଷ୍ଟିଭ ସ୍ମିଥ୍ ବଲ ଟାମ୍ପରିଂ କରାଯାଇଥିବା ଘଟଣାକୁ ସ୍ୱୀକାର କରିଥିଲେ ।
ଏହି ଘଟଣାର କିଛି ଘଣ୍ଟା ପରେ ଅଷ୍ଟ୍ରେଲିଆ ସରକାର ସ୍ମିଥଙ୍କୁ ଅଧିନାୟକ ପଦରୁ ହଟାଇବା ପାଇଁ ନିର୍ଦ୍ଦେଶ ଦେଇଥିଲେ । କ୍ରିକ୍ ଇନଫୋ ରିପୋର୍ଟ ଅନୁସାରେ, ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ମେଲକମ୍ ଟର୍ନବୁଲ ମଧ୍ୟ ଏହି ଘଟଣାକୁ ଅତ୍ୟନ୍ତ ଆଶ୍ଚର୍ଯ୍ୟଜନକ ଏବଂ ନିରାଶଜନକ ବୋଲି କହିଥିଲେ । ଏହି ଘଟଣାରେ ସେ ନିରାଶ ହୋଇଥିବା କହିଥିଲେ । ଏହା ବିଶ୍ୱାସର ଅତ୍ୟନ୍ତ ବାହାରେ ଯେ, ଅଷ୍ଟ୍ରେଲିଆ କ୍ରିକେଟ ଟିମ୍ ଏହି ଫ୍ରଡରେ ସାମିଲ ଅଛି ।