ସମଲିଙ୍ଗୀ ବିବାହକୁ ଆଇନ ମାନ୍ୟତା ସପକ୍ଷରେ ନାହାନ୍ତି କେନ୍ଦ୍ର ସରକାର । ସୁପ୍ରିମକୋର୍ଟରେ ଦାଖଲ କଲେ ସତ୍ୟପାଠ । ଆସନ୍ତାକାଲି ସୁପ୍ରିମକୋର୍ଟରେ ଶୁଣାଣି
କନକ ବ୍ୟୁରୋ: ସମଲିଙ୍ଗୀ ବିବାହକୁ କେନ୍ଦ୍ରର ନା’ । ସୁପ୍ରିମକୋର୍ଟରେ ସତ୍ୟପାଠ ଦାଖଲ କରି କେନ୍ଦ୍ର ସରକାର ସମଲିଙ୍ଗୀ ବିବାହକୁ ମାନ୍ୟତା ଦେବାକୁ ବିରୋଧ କରିଛନ୍ତି । ଏହା ଭାରତୀୟ ପରିବାର ବ୍ୟବସ୍ଥାର ବିରୁଦ୍ଧାଚରଣ କରୁଛି ବୋଲି ସତ୍ୟପାଠରେ ଦର୍ଶାଇଛନ୍ତି ମୋଦୀ ସରକାର । ଏଥିସହିତ ସମଲିଙ୍ଗୀ ବିବାହକୁ ଭାରତୀୟ ବିବାହ ପରମ୍ପରା ସହିତ ତୁଳନା କରାଯାଇପାରିବ ନାହିଁ ବୋଲି କହିଛନ୍ତି କେନ୍ଦ୍ର ସରକାର ।
Kanak News is now on WhatsApp
Join and get latest news updates delivered to you via WhatsApp
ସୁପ୍ରିମକୋର୍ଟରେ କେନ୍ଦ୍ରର ସତ୍ୟପାଠ
‘ବିବାହ କହିଲେ ଦୁଇ ବିପରୀତ ଲିଙ୍ଗ ବ୍ୟକ୍ତିଙ୍କ ମଧ୍ୟରେ ମିଳନ ଅପରିହାର୍ଯ୍ୟ ବୋଲି ବୁଝାଯାଏ । ଏହି ସଂଜ୍ଞା ସାମାଜିକ, ସାଂସ୍କୃତିକ ଓ ଆଇନଗତ ଭାବେ ବିବାହର ଅବଧାରଣା ହୋଇ ରହିଆସିଛି । ଏହାକୁ ନ୍ୟାୟିକ ବ୍ୟାଖ୍ୟା ଦ୍ୱାରା ବଦଳାଇବା ଉଚିତ ନୁହେଁ ।’ ଏ ହେଉଛି ସୁପ୍ରିମକୋର୍ଟରେ କେନ୍ଦ୍ର ସରକାର କରିଥିବା ସତ୍ୟପାଠର ସାରାଂଶ । ଯେଉଁଥିରେ ସମଲିଙ୍ଗୀ ବିବାହକୁ ବିରୋଧ କରିଛି କେନ୍ଦ୍ର । ସୋମବାର ଦିନ ଏହି ମାମଲାର ଶୁଣାଣି କରିବେ ସୁପ୍ରିମକୋର୍ଟ । ତେବେ ଦିନକ ପୂର୍ବରୁ ସତ୍ୟପାଠ ଦାଖଲ କରି ପୂର୍ବ ମତକୁ ଦୋହରାଇଛନ୍ତି କେନ୍ଦ୍ର ସରକାର ।
କେନ୍ଦ୍ର ସରକାର କହିଛନ୍ତି…
- ‘ଭାରତୀୟ ପରିବାର’ରେ ସମଲିଙ୍ଗୀ ବିବାହ ସୁସଙ୍ଗତ ହେବନାହିଁ
- ଭାରତୀୟ ପରିବାର କହିଲେ ‘ସ୍ୱାମୀ’ ଜଣେ ପୁରୁଷ, ‘ସ୍ତ୍ରୀ’ ଜଣେ ମହିଳା ଏବଂ ସେମାନଙ୍କ ମିଳନରେ ଜନ୍ମ ନେଉଥିବା ପିଲାମାନଙ୍କୁ ବୁଝାଏ
- ସମଲିଙ୍ଗୀ ସଂପର୍କ ଆଇପିସିର ଧାରା ୩୭୭ ଅନୁଯାୟୀ ଅପରାଧ ନୁହେଁ, ଏହି ଆଇନ ବଳରେ ସମଲିଙ୍ଗୀ ବିବାହକୁ ମୌଳିକ ଅଧିକାର ଭାବେ ଦାବି କରି ହେବନାହିଁ
- ଏହାକୁ ଦେଶର ଆଇନ ସ୍ୱୀକୃତି ଦେଉନାହିଁ
- ଏହା ପାରିବାରିକ, ସାମାଜିକ ଓ ଧାର୍ମିକ ବିଭ୍ରାଟ ସୃଷ୍ଟି କରିବ
- ସମଲିଙ୍ଗୀ ବିବାହ ଆବେଦନକୁ ଖାରଜ କରାଯାଉ
ତେବେ କେନ୍ଦ୍ର ସରକାରଙ୍କ ଏହି ସତ୍ୟପାଠକୁ ନେଇ ଭିନ୍ନ ଭିନ୍ନ ପ୍ରତିକ୍ରିୟା ଆସିଛି । ସମଲିଙ୍ଗୀ ସଂପର୍କ ବୈଧ ଘୋଷଣା ପରେ ବିବାହକୁ ଆଇନରେ ମାନ୍ୟତା ଦେବାକୁ ଏଲଜିବିଟି-କ୍ୟୁ କମ୍ୟୁନିଟି ଦାବି କରୁଛନ୍ତି । ସମଲିଙ୍ଗୀ ବିବାହ ପାଇଁ ବିଭିନ୍ନ କୋର୍ଟରେ ଆବେଦନ କରାଯାଇଛି । ସବୁ ଆବେଦନକୁ ସ୍ଥାନାନ୍ତର କରିବା ପାଇଁ ଜାନୁଆରୀ ୬ ତାରିଖରେ ନିର୍ଦ୍ଦେଶ ଦେଇଥିଲେ ସୁପ୍ରିମକୋର୍ଟ । କେନ୍ଦ୍ରର ମତାମତ ଜାଣିବାକୁ ଚାହିଁଥିଲେ ସର୍ବୋଚ୍ଚ ନ୍ୟାୟାଳୟ । ସୋମବାର ଦିନ ମାମଲାର ଶୁଣାଣି ହେବ ।