ପୂରା ଦେଶ ପାଳନ କରିଛି ୭୨ତମ ସ୍ୱାଧୀନତା ଦିବସ । ଆଉ ଏହି ଅବସରରେ ଭାରତବାସୀଙ୍କୁ ଏକ ନୂଆ ଉପହାର ଦେବାକୁ ଘୋଷଣା କରିଛି ପତଞ୍ଜଳି । ପୁଣିଥରେ ପତଞ୍ଜଳି କିମ୍ଭୋ ଆପ୍ ଲଞ୍ଚ କରିବାକୁ ଘୋଷଣା କରିଛି । ପତଞ୍ଜଳି ଦ୍ୱାରା ଲଞ୍ଚ ହେବାକୁ ଥିବା ଏହି ମେସେଜିଂ ଆପ୍ କିମ୍ଭୋ ସିଧାସଳଖ ହ୍ୱାଟସଆପକୁ ଟକ୍କର ଦେବ । ଉନ୍ନତମାନର ଫିଚର୍ସ ସହ ଅଗଷ୍ଟ ୨୭ରେ ଏହି ଆପକୁ ଗୁଗୁଲ ପ୍ଲେ ଷ୍ଟୋର ଓ ଆଇଓଏସ ଆପ୍ ଷ୍ଟୋରରେ ଉପଲବ୍ଧ କରାଯିବ । ଏନେଇ ପତଞ୍ଚଳି ଆୟୁର୍ବେଦର କାର୍ଯ୍ୟକାରୀ ନିର୍ଦ୍ଦେଶକ ଆଚାର୍ଯ୍ୟ ବାଳକୃଷ୍ଣ ଟ୍ୱିଟ୍ କରି ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆଚାର୍ଯ୍ୟ ବାଳକୃଷ୍ଣ ଟ୍ୱିଟ୍ କରି କିମ୍ଭୋ ଆପ ବାବଦରେ ଲୋକଙ୍କ ଠାରୁ ମତାମତ ମାଗିବା ସହ ଏହି ଆପକୁ ଡାଉନଲୋଡ କରିବାକୁ ଲିଙ୍କ ମଧ୍ୟ ସେୟାର କରିଛି । ସ୍ୱାଧୀନତା ଦିବସର ଶୁଭେଚ୍ଛା ଦେବା ସହ ପତଞ୍ଜଳି ପ୍ରତି ବିଶ୍ୱାସ ରହିଥିବାରୁ ଲୋକଙ୍କୁ ଧନ୍ୟବାଦ ଜଣାଇଥିଲେ ଆଚାର୍ଯ୍ୟ ବାଳକୃଷ୍ଣ । ସ୍ୱାଧୀନତା ଦିବସରେ କିମ୍ଭୋ ଆପ୍ ସହ ଡିଜିଟାଲ କ୍ଷେତ୍ରରେ ସ୍ୱାଧୀନ ହେବାର ଉତ୍ସବ ମନାଇବାକୁ ଲୋକମାନଙ୍କୁ କହିଥିଲେ ଆଚାର୍ଯ୍ୟ ବାଳକୃଷ୍ଣ । ତେବେ ଆପରେ ଆଉ କିଛି ଫିଚର୍ସ ପରିବର୍ତ୍ତନ ସହ ଏହାକୁ ଅଗଷ୍ଟ ୨୮ରେ ଲଞ୍ଚ କରିବାକୁ ଘୋଷଣା କରିଛନ୍ତି ବାଳକୃଷ୍ଣ । ଲଞ୍ଚ ହେବା ପୂର୍ବରୁ ଏହି ସ୍ୱଦେଶୀ ଭାରତୀୟ ଆପ କିମ୍ଭୋକୁ ପୂରା ବିଶ୍ୱରେ ପରିବ୍ୟାପ୍ତ କରିବାକୁ ଆହ୍ୱାନ ଦେଇଥିଲେ ବାଳକୃଷ୍ଣ ।
ପୂର୍ବରୁ ଏହି କିମ୍ଭୋ ଆପକୁ ମେ ମାସରେ ଲଞ୍ଚ କରାଯାଇଥିଲା । ତେବେ ଏହି ଆପରେ କିଛି ପରିବର୍ତ୍ତନ କରିବା ପାଇଁ କିଛି ଦିନ ପରେ ଏହାକୁ ଗୁଗୁଲ ପ୍ଲେ ଷ୍ଟୋରରୁ ହଟାଇ ଦିଆଯାଇଥିଲା । ସେତେବେଳେ ଯୋଗଗୁରୁ ବାବା ରାମଦେବ କହିଥିଲେ, ପତଞ୍ଜଳି ଦ୍ୱାରା ପ୍ରସ୍ତୁତ ହୋଇଥିବା ଏହି ଚାଟିଂ ଆପ କିମ୍ଭୋ ହ୍ୱାଟସଆପ କିମ୍ବା ଅନ୍ୟ କୌଣସି ଆପ ଠାରୁ ମଧ୍ୟ କୌଣସି ଗୁଣରେ କମ ନୁହେଁ । ଏପରିକି ଅନ୍ୟ ଆପ୍ ଅପେକ୍ଷା ଏଥିରେ ଫିଚର୍ସ ରହିଛି । ଏହା ହ୍ୱାଟସଆପ ଠାରୁ ମଧ୍ୟ ବଡ ଆପ୍ ଭାବେ ଉଭା ହେବ ।