କନକ ବ୍ୟୁରୋ: ବହୁ ଚର୍ଚ୍ଚିତ କମେଡି ଧାରା ବାହିକ କପିଲ ଶର୍ମା ସୋ’ରୁ ବିଦା ହେଲେ ନବେଜ୍ୟାତି ସିଂ ସିଦ୍ଧୁ । ତେବେ ପୁଲୱାମା ଆତଙ୍କୀ ହମଲାକୁ ନେଇ ଦେଇଥିବା ବିବାଦୀୟ ମନ୍ତବ୍ୟକୁ ନେଇ ସିଦ୍ଧୁଙ୍କୁ କପିଲ ଶର୍ମାଙ୍କ ସୋ’ରୁ ବାହାର କରିଦିଆଯାଇଛି । ସୂଚନା ଅନୁସାରେ,ଦେଶର ଯବାନ ସହିଦ ହୋଇଥିବା କାରଣରୁ ସାରା ଦେଶ ଶୋକ ମନାଉଥିବାବେଳେ ପାକିସ୍ଥାନ ସପକ୍ଷରେ ମନ୍ତବ୍ୟ ଦେଇଥିଲେ କଂଗ୍ରେସ ନେତା ନବଜ୍ୟୋତ ସିଂ ସିଦ୍ଧୁ । ଏହାକୁ ନେଇ ସାରା ଦେଶରେ ପ୍ରବଳ ପ୍ରତିକ୍ରିୟା ପ୍ରକାଶ ପାଇଥିଲା। ଦର୍ଶକମାନେ ସୋନି ଟିଭିରେ ପ୍ରସାରିତ କପିଲ ଶର୍ମା ଶୋ’କୁ ବର୍ଜନ କରିବା ପାଇଁ ଆହ୍ଵାନ ଦେଇଥିଲେ । ଏପରିକି ହଜାର ହଜାର ଦର୍ଶକ ନିଜ ମାସିକ ଟିଭି ପ୍ୟାକେଜରୁ ସୋନି ଟିଭିକୁ କାଟି ଦେଇଥିଲେ । ଏହା ପରେ ଛାନିଆ ହୋଇପଡ଼ିଛି ସୋନି ଟିଭି । ସୋନି ଟିଭି ପକ୍ଷରୁ ଆଜି କପିଲ ଶର୍ମା ଶୋରୁ ସିଦ୍ଧୁଙ୍କୁ ବାହାର କରିଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ପୁଲୱାମାଠାରେ ହୋଇଥିବା ବଡ ଆତଙ୍କୀ ହମଲାକୁ ନେଇ ସାରା ଦେଶ ସ୍ତବ୍ଧ ଥିବାବେଳେ ଦଳଗତ ନିର୍ବିଶେଷରେ ସମସ୍ତେ ଉପରକୁ ଉଠି ସରକାରଙ୍କ ପଛରେ ଛିଡା ହେବାକୁ ଆହ୍ଵାନ ଦିଆଯାଉଥିବା ବେଳେ ନବଜ୍ୟୋତ ସିଂ ସିଦ୍ଧୁ ଏ ସଂପର୍କରେ ଏକ ଅତି ଦୁର୍ଭାଗ୍ୟଜନକ ବୟାନ ଦେଇଥିଲେ । ଏହି ଆତଙ୍କବାଦୀ କାଣ୍ଡ ଏକ ଦୁର୍ଭାଗ୍ୟଜନକ ଘଟଣା ।କିନ୍ତୁ ଏଥିପାଇଁ ପାକିସ୍ତାନକୁ ଦୋଷୀ ବୋଲି ମାନିବାକୁ ପ୍ରସ୍ତୁତ ନାହାନ୍ତି ସିଦ୍ଧୁ ।
ସେ କହିଥିଲେ ଯେ ଅଳ୍ପ କିଛି ଲୋକଙ୍କ ପାଇଁ ସମଗ୍ର ଏକ ଦେଶକୁ ଦୋଷୀ ବୋଲି କହିବା ଠିକ ନୁହେଁ । ସେ ଆହୁରି ମଧ୍ୟ କହିଥିଲେ ଯେ ଆତଙ୍କବାଦୀର କୌଣସି ଦେଶ ନ ଥାଏ । ଗୁଳି ବା ଯୁଦ୍ଧ ଦ୍ୱାରା ଏହି ସମସ୍ୟାର ସମାଧାନ ହେବ ନାହିଁ, ଆମକୁ କଥାବାର୍ତ୍ତାର ବାଟ ଖୋଲା ରଖିବାକୁ ହେବ । ସିଦ୍ଧୁଙ୍କର ଏହି ବୟାନକୁ ନେଇ ସାରା ଦେଶରେ ତୀବ୍ର ଅସନ୍ତୋଷ ଦେଖାଯାଇଥିବା ବେଳେ ଆଜି ତାଙ୍କୁ କପିଲ ଶର୍ମା ସୋ’ରୁ ବାହାର କରିଦିଆଯାଇଥିବା ମିଳିଥିବା ସୂଚନାରୁ ଜଣାପଡିଛି ।