ଓମିକ୍ରନ ଭାରିଆଣ୍ଟକୁ ନେଇ ସବୁ ରାଜ୍ୟକୁ ଚିଠି ଲେଖିଲା କେନ୍ଦ୍ର, ବିଦେଶ ଫେରନ୍ତାକୁ ୧୪ ଦିନିଆ କ୍ୱାରେଣ୍ଟିନ ପାଇଁ ନିର୍ଦ୍ଦେଶ
କନକ ବ୍ୟୁରୋ : କରୋନା ଭୂତାଣୁର ନୂଆ ଭାରିଆଣ୍ଟ ଓମିକ୍ରନ ସାମ୍ନାକୁ ଆସିବା ପରେ ଏହାକୁ ନେଇ ସାରା ବିଶ୍ୱ ଏବେ ହତ ଚକିତ ହୋଇପଡିଛି । ଏନେଇ ବିଶ୍ୱର ଅନେକ ଦେଶ ପୁଣି ବିଭିନ୍ନ କୋଭଡି କଟକଣା ଲଗାଇବା ଆରମ୍ଭ କରିଛନ୍ତି । ଏହି କ୍ରମରେ କେନ୍ଦ୍ର ସରକାର ଏନେଇ ବାରମ୍ବାର ବୈଠକ କରିବା ସହ ସବୁ ରାଜ୍ୟକୁ ସତର୍କ ରହିବାକୁ କେନ୍ଦ୍ର ସରକାର ଚିଠି ଲେଖି ଜଣାଇଛନ୍ତି । ଶନିବାରଦିନ ପ୍ରଧାନମନ୍ତ୍ରୀ ଏନେଇ ସ୍ୱାସ୍ଥ୍ୟ ଅଧିକାରୀଙ୍କ ସହ ବୈଠକ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଦେଶର ପ୍ରତି ରାଜ୍ୟ ସରକାର ଏନେଇ ସତର୍କ ସୂଚନା ଜାରି କରିବା ସହ ବିଭାଗୀୟ ସ୍ତରରେ ବୈଠକ ଆରମ୍ଭ କରିଦେଇଛନ୍ତି । କୋଭିଡ-୧୯ ର ବି.୧.୧୫୨୯ ବା ଓମିକ୍ରନ ଭାରିଆଣ୍ଟ ଚଳିତ ସପ୍ତାହରେ ଦକ୍ଷୀଣ ଆଫ୍ରିକାରେ ଚିହ୍ନଟ ହୋଇଥିଲା । ଏହାକୁ ନେଇ ବିଶ୍ୱ ସ୍ୱାସ୍ଥ୍ୟ ସଂଗଠନ ଶୁକ୍ରବାର ଦିନ ଏହା ଏକ ଚିନ୍ତା ଜନକ ଭୂତାଣୁ ବୋଲି କହିଛି । ଏହା କରୋନାର ଅନ୍ୟ ଭାରିଆଣ୍ଟ ଠାରୁ ଅଧିକ ସଂକ୍ରାମକ ବୋଲି ବିଶ୍ୱ ସ୍ୱାସ୍ଥ୍ୟ ସଂଗଠନ ଚେତାଇ ଦେଇଛି ।
ଏନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ସଚିବ ରାଜିବ ଭୂଷଣ ସବୁ ରାଜ୍ୟକୁ ଚିଠି ଲେଖିଛନ୍ତି । ଚିଠିରେ ବିପଦ ଥିବା ଦେଶରୁ ଆସୁଥିବା ଲୋକମାନଙ୍କୁ ୧୪ ଦିନ କ୍ୱାରେଣ୍ଟିନରେ ରଖିବାକୁ ଚିଠିରେ ନିର୍ଦ୍ଦେଶ ଦିଆଯାଇଛି । ଏହାସହ ହଟସ୍ପଟ ଅଞ୍ଚଳ ଉପରେ ନଜର ରଖିବା ସହ ସେଠାରୁ ଚିହ୍ନଟ ହେଉଥିବା ସଂକ୍ରମିତଙ୍କ ସାମ୍ପଲ ଜିନୋମ ସ୍ୱିକେନ୍ସିଂ ପାଇଁ ଆଇଏନଏସଏସିଓଜି ଲ୍ୟାବକୁ ପଠାଇବାକୁ ପରାମର୍ଶ ଦିଆଯାଇଛି ।
ଏନେଇ କେନ୍ଦ୍ର ସ୍ୱାସ୍ଥ୍ୟ ବିଭାଗର ଚିଠି ପାଇବା ପରେ ଉତ୍ତରାଖଣ୍ଡ, କର୍ଣ୍ଣାଟକ,ଉତ୍ତର ପ୍ରଦେଶ,ମଧ୍ୟ ପ୍ରଦେଶ,ବିହାର,ଦିଲ୍ଲୀ ଓ ହରିଆଣା ସରକାର ରାଜ୍ୟରେ ବିଭିନ୍ନ କୋଭିଡ କଟକଣା ଲାଗୁ କରିଛନ୍ତି । ଏହାସହ ୫ ପ୍ରତିଶତ ମଧ୍ୟରେ ସଂକ୍ରମଣ ହାର ରଖିବାକୁ ସବୁ ରାଜ୍ୟ ସରକାର ନିଜ ନିଜର ସ୍ୱାସ୍ଥ୍ୟ ବିଭାଗକୁ ସତର୍କ କରାଇଛନ୍ତି ।