ନିର୍ବାଚନକୁ ଆଉ ଦିନ କେଇଟା ଥିବା ବେଳେ ମଧ୍ୟପ୍ରଦେଶରେ ଜୋର ଧରିଛି ରାଜନୀତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ମଧ୍ୟପ୍ରଦେଶ ଏବଂ ଛତିଶଗଡରେ ଧୁଆଁଧାର ରାଲି କରିଛନ୍ତି । ଆଉ ଏହି ସମୟରେ ସେ କଂଗ୍ରେସକୁ ଦମଦାର ଟାର୍ଗେଟ କରିଛନ୍ତି । ମୋଦି କହିଛନ୍ତି, ଯେଉଁ କାମ କଂଗ୍ରେସର ୪ଟି ପିଢି କରିପାରିନଥିଲେ, ସେହି କାମ ବିଜେପି ମାତ୍ର ୪ ବର୍ଷ ମଧ୍ୟରେ କରି ଦେଖାଇଛି । ଏକ ନିର୍ବାଚନୀ ସଭାକୁ ସମ୍ବୋଧିତ କରିବା ସହ ପ୍ରଧାନମନ୍ତ୍ରୀ କହିଛନ୍ତି, ମଧ୍ୟପ୍ରଦେଶ ଆଜି ଯେଉଁ ବିକାଶ ଦେଖୁଛି, ତାହା ବିଜେପି ସରକାର ହିଁ ଦେଇଛି । ଲୋକମାନଙ୍କର ପ୍ରଧାନମନ୍ତ୍ରୀ ଭାବେ ମୋଦିଙ୍କୁ କାମର ହିସାବ ମାଗିବାର ଅଧିକାର ରହିଛି । ସେହିପରି ସେମାନେ କଂଗ୍ରେସ ୪ଟି ପିଢିରେ ଦେଶ ପାଇଁ କଣ କରିଛି ତାହାର ହିସାବ ମଧ୍ୟ ମାଗିବା ଦରକାର ।
Kanak News is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀ ମୋଦି ମଧ୍ୟପ୍ରଦେଶରେ କଂଗ୍ରେସର ଶାସନକୁ ନେଇ ଆଗକୁ କହିଥିଲେ ଯେ, ପୂର୍ବରୁ ନା ଗଣମାଧ୍ୟମର ପ୍ରଚାର ପ୍ରସାର ଥିଲା ନା ହିଁ ସୋସିଆଲ ମିଡିଆର । ଯାହା ଫଳରେ କଂଗ୍ରେସ ଲୋକମାନଙ୍କୁ ମିଛ କହୁଥିଲା ଏବଂ ଲୋକମାନେ ମଧ୍ୟ ଏହାକୁ ସତ୍ୟ ବୋଲି ମାନିନେଉଥିଲେ । କିନ୍ତୁ ଏବେ ସମୟ ବଦଳିଯାଇଛି । ଏବେ ସମସ୍ତଙ୍କ ଆଗରେ ସତ୍ୟ ରହିଛି ଯେ, କିଏ ଦେଶର ବିକାଶ କରିଛି ବୋଲି ମୋଦି କହିଛନ୍ତି ।
ପ୍ରଧାନମନ୍ତ୍ରୀ ମୋଦି ଆବାସ ଯୋଜନାକୁ ନେଇ କହିଛନ୍ତି, ମଧ୍ୟପ୍ରଦେଶରେ ବିଜେପି ସରକାର ଏପର୍ଯ୍ୟନ୍ତ ୧୨ ଲକ୍ଷ ଲୋକଙ୍କୁ ଘର ଯୋଗାଇ ଦେଇଛି । ଏବଂ ଆଗକୁ ବିଜେପି ଲକ୍ଷ୍ୟ ରଖିଛି ଯେ, ଭାରତରେ ପ୍ରତିଟି ପରିବାର ପାଖରେ ନିଜର ଏକ ଘର ରହିଥିବ । ସେହିପରି ମହିଳାଙ୍କ ସୁରକ୍ଷାକୁ ନେଇ ମୋଦି କହିଛନ୍ତି, ମଧ୍ୟପ୍ରଦେଶରେ ୫ ଦିନରେ ବଳାତ୍କାରୀମାନଙ୍କୁ ଫାସୀ ଦଣ୍ଡାଦେଶ ଦିଆଯାଇଛି । ମୋଦି କହିଛନ୍ତି, ସରକାରଙ୍କୁ ସବୁବେଳେ ଗରିବ ଲୋକମାନଙ୍କ ପାଇଁ କାମ କରିବା ଆବଶ୍ୟକ । ଏହା ସହ ମୋଦି କଂଗ୍ରେସକୁ ନିର୍ମଳ ବାବାଙ୍କ ସହ ତୁଳନା କରିଛନ୍ତି ।
ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, ସେ ପ୍ରତିବର୍ଷ ତାଙ୍କ ସରକାରର ୪ ବର୍ଷର ହିସାବ ଦେଉଛନ୍ତି । କିନ୍ତୁ କଂଗ୍ରେସ ଏବେବି ଲୁହ ବୁହାଉଛି ଯେ, ଜଣେ ଚାହା ବାଲା କିପରି ଦେଶର ପ୍ରଧାନମନ୍ତ୍ରୀ ହେଲେ । ମୋଦି କହିଛନ୍ତି, ଯେପର୍ଯ୍ୟନ୍ତ ଆପଣ, ଲୋକତନ୍ତ୍ରକୁ ବୁଝିପାରିନାହାନ୍ତି, ସେତେ ପର୍ଯ୍ୟନ୍ତ ଆପଣ ଚାହା ବାଲାକୁ ଗାଳି ଦେଉଥିବେ । ପ୍ରଧାନମନ୍ତ୍ରୀ କହିଛନ୍ତି, ବିମୁଦ୍ରାକରଣରେ କାହାର ହେଲେ ମଧ୍ୟ କିଛି ଅସୁବିଧା ହୋଇନାହିଁ । କେବଳ ଗୋଟିଏ ପରିବାରର ଆଖିରୁ ହିଁ ଲୁହ ଝରୁଛି ।
ସେପଟେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ମଧ୍ୟ ମଧ୍ୟପ୍ରଦେଶରେ ନିଜ ଆଡ୍ଡା ଜମାଇଛନ୍ତି । ବିଭିନ୍ନ ସ୍ଥାନ ବୁଲି ବୁଲି ନିର୍ବାଚନୀ ପ୍ରଚାର କରୁଥିବା ବେଳେ ଅନେକ ରାଲି ମଧ୍ୟ କରୁଛନ୍ତି । ଆଜି ମଧ୍ୟ ସେ ବିଭିନ୍ନ ସ୍ଥାନରେ ରାଲି କରିବା ସହ ନିର୍ବାଚନୀ ସଭାକୁ ସମ୍ବୋଧିତ କରିଥିଲେ । କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ବିଜେପିକୁ ଟାର୍ଗେଟ କରିବା ସହ ମୋଦି ମିଥ୍ୟା ପ୍ରତିଶ୍ରୁତି ଦେଇଥିବା ଲୋକମାନଙ୍କୁ କହୁଛନ୍ତି । ଚଳିତଥର ନିର୍ବାଚନରେ କଂଗ୍ରେସ ଏବଂ ବିଜେପି ମଧ୍ୟରେ କଡା ଟକ୍କର ଦେଖିବାକୁ ମିଳିବ ବୋଲି ଚର୍ଚ୍ଚା ହେଉଛି ।