ପଟିଦାର ନେତା ହାର୍ଦ୍ଦିକ ପଟେଲଙ୍କୁ କିଏ ପିଆଇଥିଲେ ପାଣି ? ଗୁଜୁରାଟ ପରୀକ୍ଷାରେ ପରୀକ୍ଷାର୍ଥୀଙ୍କୁ ପଚରାହେଲା କିଛି ଏଭଳି ପ୍ରଶ୍ନ ।
ଗୁଜୁରାଟରେ ହୋଇଥିବା ଏକ ପ୍ରତିଯୋଗୀ ପରୀକ୍ଷାରେ ପଟିଦାର ନେତା ହାର୍ଦ୍ଦିକ ପଟେଲଙ୍କ ସହ ଯୋଡି ହୋଇଥିବା ଏକ ପ୍ରଶ୍ନ ପଚରାଯାଇଥିଲା । ତେବେ ଏହି ପରୀକ୍ଷା ଗାନ୍ଧିନଗର ମ୍ୟୁନିସିପାଲଟି କର୍ପୋରେସନରେ କ୍ଲରିକାଲ୍ ପଦ ପାଇଁ ହୋଇଥିଲା । ଏହି ପରୀକ୍ଷା ରବିବାର ଦିନ ହୋଇଥିଲା । ପରୀକ୍ଷାରେ ପଚରାଯାଇଥିବା ଏହି ପ୍ରଶ୍ନକୁ ନେଇ ଏବେ ଚର୍ଚ୍ଚା ଜୋର ଧରିଛି । ପଟେଲ ସମୁଦାୟର ୨୫ ବର୍ଷୀୟ ନେତା ହାର୍ଦ୍ଦିକ ପଟେଲଙ୍କ ଅନଶନ ଦୀର୍ଘ ୧୯ ଦିନ ଧରି ଚାଲିବା ପରେ ଗତ ବୁଧବାର ଶେଷ ହୋଇଥିଲା । ହାର୍ଦ୍ଦିକ ଗୁଜୁରାଟର ଚାଷୀମାନଙ୍କ ପାଇଁ ରୁଣ ଛାଡ କରିବା ଏବଂ ପଟେଲ୍ ସମ୍ପ୍ରଦାୟ ଲୋକମାନଙ୍କ ପାଇଁ ସଂରକ୍ଷଣ ନିମନ୍ତେ ଅନଶନ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ତେବେ ଗୁଜୁରାଟରେ ଅନୁଷ୍ଠିତ ହୋଇଥିବା ଏହି ପରୀକ୍ଷାରେ ପଚରାଯାଇଥିବା ପ୍ରଶ୍ନ ହାର୍ଦ୍ଦିକଙ୍କ ଅନଶନ ସହ ହିଁ ଯୋଡି ହୋଇ ରହିଛି । ତେବେ ପ୍ରଶ୍ନଟି ଥିଲା କିଛି ଏପରି । ନିକଟରେ ଅନ୍ନଶନରେ ବସିଥିବା ହାର୍ଦ୍ଦିକ ପଟେଲଙ୍କୁ କେଉଁ ନେତା ପାଣି ପିଆଇଥିଲେ । ଆଉ ଏହି ପ୍ରଶ୍ନର ଉତ୍ତର ପାଇଁ ପରୀକ୍ଷାର୍ଥୀଙ୍କୁ ଚାରୋଟି ଅପସନ୍ ମଧ୍ୟ ଦିଆଯାଇଥିଲା । ଅପସନ୍ ଗୁଡିକ ଥିଲା, ଶରଦ ଯାଦବ, ଶତୃଘ୍ନ ସିହ୍ନା, ଲାଲୁ ପ୍ରସାଦ ଏବଂ ବିଜୟ ରୂପାଣୀ । ତେବେ ଏହି ପ୍ରଶ୍ନର ସଠିକ ଉତ୍ତର ହେଉଛି ଶରଦ ଯାଦବ । ଦୀର୍ଘ ୧୯ ଦିନ ଧରି ଅନଶନରେ ବସିଥିବା ହାର୍ଦ୍ଦିକ ପଟେଲଙ୍କୁ ଶରଦ ଯାଦବ ପାଣି ପିଆଇଥିଲେ ।