ସ୍ୱାଧୀନ ଭାରତର ଏକମାତ୍ର ପତାକା, ଯାହା ଏବେ ବି ରହିଛି ସୁରକ୍ଷିତ । ୧୯୪୭ ମସିହାର ତ୍ରିରଙ୍ଗା ଉଡୁଛି ଫରଫର୍
ସ୍ୱାଧୀନତା ଦିବସର ଅର୍ଥ ଭାରତ ଓ ତାହାର ନାଗରିକ ପାଇଁ ବହୁତ ବଡ । ଏହା ଭାରତୀୟଙ୍କ ପାଇଁ ବହୁତ ମହତ୍ୱପୂର୍ଣ୍ଣ କାହିଁକିନା ବ୍ରିଟିଶ ମାନଙ୍କ ଠାରୁ ସ୍ୱାଧୀନତା ପାଇବା ପରଠାରୁ ଭାରତ ଏହି ଦିବସ ପାଳନ କରିଆସୁଛି । ଭାରତୀୟମାନେ ଏହି ଉତ୍ସବକୁ ବହୁତ ଗର୍ବର ସହ ପାଳନ କରନ୍ତି । ଭାରତ ଦେଶ ହେଉଛି ‘ବିବିଧତାରେ ଏକତା’, ଯେଉଁଠି ବିଭିନ୍ନ ଜାତି ଓ ସମ୍ପ୍ରଦାୟର ଲୋକ ରହନ୍ତି ଏବଂ ପ୍ରତ୍ୟେକ ଜାତୀୟ ଉତ୍ସବକୁ ସେମାନେ ମିଳିମିଶି ପାଳନ କରନ୍ତି । ଆଉ ଏହାରି ଭିତରେ ଏକ ଖବର ସାମନାକୁ ଆସିଛି ଯାହା ଶୁଣିଲେ ଆଶ୍ଚର୍ଯ୍ୟ ହୋଇଯିବେ । ୧୫ ଅଗଷ୍ଟ ୧୯୪୭ରେ ଜର୍ଜ ଫୋର୍ଟରେ ଉତ୍ତୋଳନ ହୋଇଥିବା ତ୍ରିରଙ୍ଗା ଆଜି ବି ସୁରକ୍ଷିତ ରହିଛି । ଏହାକୁ ପ୍ରଥମଥର ୨୬ଜାନୁୟାରୀ ୨୦୧୩ରେ ଫୋର୍ଟର ସଂଗ୍ରହାଳୟରେ ଲୋକଙ୍କୁ ଦେଖେଇବା ପାଇଁ ରଖାଯାଇଥିଲା । ଜଣେ ଅଧିକାରୀଙ୍କ କହିବାନୁସାରେ, ଏହି ପତାକା ଦେଶ ସ୍ୱାଧୀନ ପରେ ଏକମାତ୍ର ପତାକା , ଯାହା ଏବେ ସୁଦ୍ଧା ସୁରକ୍ଷିତ ରହିଛି ।
Kanak News is now on WhatsApp
Join and get latest news updates delivered to you via WhatsApp
୧୯୪୭ ଅଗଷ୍ଟ ୧୫ରେ ଭାରତ ସ୍ୱାଧୀନ ହେବା ଦିନ ଠାରୁ ତାମିଲନାଡୁର ମାଡ୍ରାସ ଠାରେ ଥିବା ଫୋର୍ଟ ସେଣ୍ଟ ଜର୍ଜଠାରେ ଉଡୁଛି ତ୍ରିରଙ୍ଗା । ଏହା ହେଉଛି ଦେଶର ଏକମାତ୍ର ଭିଣ୍ଟେଜ୍ ଜାତୀୟ ପତାକା ,ଯାହା ଦୀର୍ଘ ୭୧ ବର୍ଷ ହେଲା ଉକ୍ତ ଦୁର୍ଗରେ ସୁରକ୍ଷିତ ହୋଇ ରହିଛି । ଭାରତୀୟ ପ୍ରତ୍ନତତ୍ତ୍ୱ ବିଭାଗ (ଏଏସଆଇ) ପକ୍ଷରୁ ଏହାକୁ ବହୁସ୍ତରୀୟ ସୁରକ୍ଷା ପ୍ରଦାନ କରାଯାଇଛି । ଅର୍ଥାତ୍ ଏହାର ରକ୍ଷଣାବେକ୍ଷଣ ଏବଂ ସୁରକ୍ଷା ଦାୟିତ୍ୱ ରହିଛି ଏଏସଆଇ ହାତରେ । ଏଏସଆଇର ‘ରିଜର୍ଭ କଲେକ୍ସନ’ ମଧ୍ୟରେ ଦୀର୍ଘ ଦଶନ୍ଧି ହେଲା ଏହାକୁ ସଂରକ୍ଷିତ କରି ରଖାଯାଇଛି ।
୨୦୧୩ ଜାନୁୟାରୀ ୨୬ରେ ପ୍ରଥମ କରି ଫୋର୍ଟ ସେଣ୍ଟ ଜର୍ଜ ପରିସରରେ ଥିବା ଫୋର୍ଟ ମ୍ୟୁଜିୟମରେ ସର୍ବସାଧାରଣଙ୍କ ପାଇଁ ଏହାର ପ୍ରଦର୍ଶନ ହୋଇଥିଲା । ତେବେ ପତାକାକୁ ଏଭଳି ଭାବେ ସଂରକ୍ଷଣ କରିବା ସେତେ ସହଜ ନୁହେଁ । ଏକ ଏୟାର ଟାଇଡ୍ କାଠ ଏବଂ କାଚ ଶୋ କେସରେ ଏହାକୁ ରଖାଯାଇଛି । ପତାକାର ଚାରିପାର୍ଶ୍ୱରେ ସିଲିକା ଜେଲର ୬ଟି ପାତ୍ର ରହିଛି । ଏହାଦ୍ୱାରା ସବୁ ସମୟରେ ଶୋ କେସର ଆର୍ଦ୍ରତା ନିୟନ୍ତ୍ରଣ ହେବା ସହ ତାହାକୁ ଶୋଷିନେଇଥାଏ । ପତାକା ରହିଥିବା ହଲ୍ ଓ ଶୋ କେସରେ ସବୁବେଳେ ନିୟନ୍ତ୍ରଣ କରିବା ଲାଗି ଏକ ଲ୍ୟୁକ୍ସ ମିଟର ବ୍ୟବସ୍ଥା କରାଯାଇଛି । ପ୍ରତିଟି ମୁହୂର୍ତ୍ତରେ ସେଠାକାର ତାପମାତ୍ରା ଓ ଶୀତ ତାପକୁ ନିୟନ୍ତ୍ରଣ କରାଯାଇଥାଏ ।
ହଲରେ ଭ୍ରମଣକାରୀ ପହଂଚିଲେ ସେଠାରେ ବ୍ୟବସ୍ଥିତ ମାନବସମ୍ବେଦନଶୀଳ ଲାଇଟ୍ ଆପେ ଆପେ ଜଳି ଉଠିଥାଏ । ଶୋ କେସରେ ଯେଭଳି ବାହାରର ଆଲୁଅ, ପବନ ,ଧୂଳିକଣା ପ୍ରବେଶ ନକରିପାରିବ ସେଥିପ୍ରତି ବିଶେଷ ଧ୍ୟାନ ଦିଆଯାଇଛି । ସେଠାରେ ସୁରକ୍ଷାବ୍ୟବସ୍ଥା ମଧ୍ୟ କଡାକଡି କରାଯାଇଛି । ଯଦି କିଛି ଅପ୍ରୀତିକର ପରିସ୍ଥିତି ସୃଷ୍ଟି ହୁଏ, ସେଥିପାଇଁ ସାଇରନ୍ ବ୍ୟବସ୍ଥା ମଧ୍ୟ ରହିଛି ବୋଲି ଜଣେ ଅଧିକାରୀ ସୂଚନା ଦେଇଛନ୍ତି । ତେବେ ଏତେବର୍ଷ ପୁରୁଣା ହେବା ଯୋଗୁଁ ପତାକାର ,କିଛି ଅଂଶ ଫାଟି ଯାଇଛି ।
ଶୁଦ୍ଧ ରେଶମ କପଡାରେ ପ୍ରସ୍ତୁତ ଏହି ପତାକାର ଦୈର୍ଘ୍ୟ ୧୨ ଫୁଟ୍ ରହିଥିବା ବେଳେ ପ୍ରସ୍ଥ ରହିଛି ୮ଫୁଟ୍ । ଭାରତ ସ୍ୱାଧୀନ ଘୋଷିତ ହେବା ପରେ ୧୯୪୭ ଅଗଷ୍ଟ ୧୫ ତାରିଖ ସକାଳ ୫ଟା ୫ମିନିଟରେ ଫୋର୍ଟ ସେଣ୍ଟ ଜର୍ଜଠାରେ ବ୍ରିଟିଶ୍ ୟୁନିୟନ ପତାକା ହଟାଇ ତ୍ରିରଙ୍ଗାକୁ ଉତ୍ତୋଳନ କରାଯାଇଥିଲା । ଏହି ଅବସରରେ ହଜାର ହଜାର ଲୋକ ସେଠାରେ ଉପସ୍ଥିତ ଥିଲେ । ତେବେ ସେହି ପତାକା କିଏ ଉତ୍ତୋଳନ କରିଥିଲେ ସେ ନେଇ ପ୍ରଶାସନ ପାଖରେ କିଛି ରେକର୍ଡ ନଥିବା ଅଧିକାରୀ ଜଣକ ପ୍ରକାଶ କରିଛନ୍ତି ।