କନକ ବ୍ୟୁରୋ : ତାମିଲନାଡୁ କ୍ଷମତା ଯୁଦ୍ଧରେ ପନିରସେଲଭମଙ୍କ ଉପରେ ଶଶିକଳା ଭାରୀ ପଡୁଥିବା ଜଣାପଡିଛି । ୧୩୧ ବିଧାୟକଙ୍କୁ ଅଜ୍ଞାତ ସ୍ଥାନକୁ ପଠାଇ ଦେଇଛନ୍ତି ଶଶିକଳା । ପନିରସେଲଭମଙ୍କ ବିଦ୍ରୋହ ପରେ ଆଶଙ୍କିତ ହୋଇ ପଡିଥିବା ଶଶିକଳା ଗତକାଲି ଦଳୀୟ ମୁଖ୍ୟାଳୟରେ ଏକ ବୈଠକ ଡକାଇଥିଲେ । ତାଙ୍କ ସାଥିରେ ରହିବାକୁ ଦଳୀୟ ବିଧାୟକମାନଙ୍କୁ ସେ ବୈଠକରେ ନିବେଦନ କରିବା ସହ ପନିରସେଲଭମ୍ ଦଳକୁ ଧୋକା ଦେଇଥିବା ମଧ୍ୟ କହିଥିଲେ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଶଶୀକଳା କହିଛନ୍ତି ଆମ୍ମା ଯେଉଁ ଦଳ ବିପକ୍ଷରେ ଲଢେଇ କରୁଥିଲେ ପନୀରସେଲଭମ ଶେଷରେ ସେହି ଦଳ ସହ ମିଶିଛନ୍ତି । ଏହାପରେ ୧୩୧ ଜଣ ଦଳୀୟ ବିଧାୟକଙ୍କୁ ବସ୍ ଦ୍ୱାରା ଏକ ଅଜ୍ଞାତ ସ୍ଥାନକୁ ପଠାଇ ଦେଇଛନ୍ତି ଶଶିକଳା । ଜୟଲଳିତାଙ୍କ ମୃତ୍ୟୁର ତଦନ୍ତ ପାଇଁ ଏକ କମିଟି ଗଠନ କରାଯିବା ଉଚିତ ବୋଲି ଗତକାଲି କହିଥିଲେ ମୁଖ୍ୟମନ୍ତ୍ରୀ ଦାୟିତ୍ୱରେ ଥିବା ପନ୍ନିରସେଲଭମ । ଏହା ସହ ଦଳୀୟ ବିଧାୟକଙ୍କ ସମର୍ଥନରେ ବିଧାନସଭାରେ ସେ ଶକ୍ତି ଦେଖାଇପାରିବେ ବୋଲି ଚ୍ୟାଲେଂଜ୍ କରିବା ପରେ ଶଶିକଳା ଅଧିକ ସତର୍କ ହୋଇ ପଡିଛନ୍ତି । ସେପଟେ ରାଜ୍ୟପାଳ ବିଦ୍ୟାସାଗର ରାଓ ଆଜି ଚେନ୍ନାଇ ଫେରୁଛନ୍ତି । ତେଣୁ ଏହି ପରିସ୍ଥିତିରେ ତାଙ୍କ ନିଷ୍ପତି ଉପରେ ଅନେକ କିଛି ନିର୍ଭର କରୁଛି ।