ବାଥରୁମରେ ଛୁରୀ ଭୁସି ଛାତ୍ରକୁ ହତ୍ୟା, ସ୍କୁଲରେ ଆତଙ୍କ ! ଗୁରୁଗ୍ରାମ ପରେ ଗୁଜୁରାଟରେ ସ୍କୁଲ ସୁରକ୍ଷା ନେଇ ଉଠିଲା ପ୍ରଶ୍ନ ।
ଗୁଜୁରାଟ ଭଦୋଦରା ଠାରେ ଏକ ସ୍କୁଲ ବାଥରୁମରୁ ଜଣେ ଛାତ୍ରର ମୃତ ଦେହ ମିଳିଛି । କୁହାଯାଉଛି ଯେ, ଏହି ଛାତ୍ର ଜଣଙ୍କୁ ହତ୍ୟା କରାଯାଇଛି । ମଧ୍ୟାନ୍ନ ସମୟରେ ସ୍କୁଲ ପରିସରରେ ଥିବା ବାଥରୁମରୁ ସମ୍ପୃକ୍ତ ଛାତ୍ର ଜଣଙ୍କର ମୃତଦେହ ଉଦ୍ଧାର କରାଯାଇଥିଲା । ତେବେ କୁହାଯାଉଛି ଯେ, ନବମ ଶ୍ରେଣୀରେ ପଢୁଥିବା ଏହି ୧୪ ବର୍ଷୀୟ ଛାତ୍ରର ଶବ ସ୍କୁଲର ବାଥରୁମରୁ ମିଳିଛି । ଛାତ୍ର ଜଣଙ୍କର ପେଟରେ ଛୁରୀରେ ଆଘାତ କରାଯାଇଥିବା ଦାଗ ରହିଛି । ଘଟଣାର ତଦନ୍ତଭାର ସ୍କୁଲ କର୍ତ୍ତୃପକ୍ଷ ପୋଲିସକୁ ଦେଇଛନ୍ତି । ଘଟଣାସ୍ଥଳରେ ପୋଲିସ ପହଞ୍ଚିବା ପରେ ମୃତ ଦେହକୁ ଜବତ କରାଯାଇ ପୋଷ୍ଟ ମର୍ଟମ ପାଇଁ ପଠାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ଗତବର୍ଷ ସେପ୍ଟେମ୍ବର ମାସରେ ମଧ୍ୟ ଏଭଳି ଏକ ମାମଲା ଗୁରୁଗ୍ରାମର ଏକ ସ୍କୁଲରେ ଦେଖିବାକୁ ମିଳିଥିଲା । ରେୟାନ ଇଣ୍ଟର ନ୍ୟାସନାଲ ସ୍କୁଲର ବାଥରୁମରୁ ପ୍ରଦ୍ୟୁମ୍ନ ଠାକୁରଙ୍କ ମୃତ ଦେହ ଜବତ ହୋଇଥିଲା । ସମ୍ପୃକ୍ତ ଛାତ୍ରଙ୍କର ତଣ୍ଟି କାଟି ହତ୍ୟା କରାଯାଇଥିବା ଜଣାପଡିଥିଲା । ଏହାର ତଦନ୍ତ କରାଯିବା ପରେ ଜଣାପଡିଥିଲା ଯେ ସ୍କୁଲର ସୁରକ୍ଷା ବ୍ୟବସ୍ଥା ଠିକ୍ ନଥିଲା । ତେବେ ଏହି ଘଟଣାରେ ପୋଲିସ ସ୍କୁଲ ବସର କଣ୍ଡକ୍ଟରଙ୍କୁ ଦୋଷୀ କରିଥିଲେ । ତେବେ ବାରମ୍ବାର ଏଭଳି ସ୍କୁଲ ଗୁଡିକରେ ଛାତ୍ରମାନଙ୍କର ମୃତ୍ୟୁକୁ ନେଇ ଏବେ ସ୍କୁଲ ଗୁଡିକର ସୁରକ୍ଷା ବ୍ୟବସ୍ଥା ଉପରେ ଏକ ବଡ ପ୍ରଶ୍ନବାଚୀ ସୃଷ୍ଟି ହୋଇଛି ।