‘ଯାହାକୁ ରଖିବେ ଅନନ୍ତ କି କରି ପାରେ ବଳବନ୍ତ’ ଏହି ଉକ୍ତିର ଏକ ସଦ୍ୟ ଉଦାହରଣ ଦେଖିବାକୁ ମିଳିଛି ଛତିଶଗଡରେ । ଜଣେ ବ୍ୟକ୍ତିଙ୍କୁ କିଛି ଦୁର୍ବୃତ୍ତ ହତ୍ୟା କରି ଗାତ ଖୋଳି ପୋତି ଦେଇଥିଲେ । ପୋତିବାର ପାଖାପାଖି ୨୪ ଘଂଟା ପରେ ତାଙ୍କୁ ଜୀବିତ ଅବସ୍ଥାରେ ଉଦ୍ଧାର କରାଯାଇଛି । ସବୁଠାରୁ ଆଶ୍ଚର୍ଯ୍ୟକର କଥା ହେଲା ଉକ୍ତ ବ୍ୟକ୍ତି ଜଣକ ସଂପୂର୍ଣ୍ଣ ସୁସ୍ଥ ଅଛନ୍ତି ।

ସୂଚନା ଯୋଗ୍ୟ, ଛତିଶଗଡର ବମ୍ବା ଭଣ୍ଡାରପାରା ନାମକ ଗାଁ ବାସକରୁଥିବା ପ୍ଲାଜୁସ ମିଞ୍ଜଙ୍କ ଭଉଣୀ ସହ ବିବେକ ନାମକ ଜଣେ ଯୁବକର ବିବାହ ସ୍ଥିର ହୋଇଥିଲା । ଗତ ସପ୍ତାହ ମଙ୍ଗଳବାର ସଂନ୍ଧ୍ୟାରେ ବିବେକ ନିଜ ବନ୍ଧୁମାନଙ୍କ ସହ ପ୍ଲାଜୁସ ମିଞ୍ଜଙ୍କ ଘରେ ପହଂଚିଥିଲା । ଏବଂ ସେମାନଙ୍କୁ ସହରରେ ଛାଡିବା ଭଳି ମିଛ ବାହାନା କରି ପ୍ଲାଜୁସଙ୍କୁ ସାଥୀରେ ନେଇଯାଇଥିଲେ । ଏକ ନିଛାଟିଆ ତଥା ଜଙ୍ଗଲରେ ବିବେକ ଓ ତାର ସାଙ୍ଗମାନେ ମିଶି ପ୍ଲାଜୁସଙ୍କୁ ଅତି ଅମାନୁସିକ ମାଡମାରି ଥିଲେ ଆଉ ଯେତେବେଳେ ପ୍ଲାଜୁସ ଅଚେତ ହୋଇଯାଇଥିଲେ ତାଙ୍କୁ ସେମାନେ ଏକ ଗାତ ଖୋଳି ପୋତି ଦେଇ ଫେରାର ହୋଇଯାଇଥିଲେ ।

ପର ଦିନ ଯେତେବେଳେ ସ୍ଥାନୀୟ ଲୋକେ ସେହି ବାଟ ଦେଇ ଯାଇଥିଲେ ସେତେବେଳେ ସେ ମାଟି ଭିତରୁ ହଲଚଲ ହେବାର ଦେଖିଥିଲେ । ଆଉ ଏହାକୁ ଖୋଳିବାପରେ ସେମାନେ ମାଟି ଭିତରୁ ପ୍ଲାଜୁସଙ୍କୁ ଜୀବିତ ଅବସ୍ଥାରେ ପାଇଥିଲେ । ଏହାପରେ ସେମାନେ ତାଙ୍କୁ ତୁରନ୍ତ ଡାକ୍ତରଖାନା ନେଇ ଚିକିତ୍ସା କରିଥିଲେ ଏବଂ ପ୍ରାଥମିକ ଚିକିତ୍ସା ପରେ ଡାକ୍ତର ତାଙ୍କୁ ସଂପୂର୍ଣ୍ଣ ସୁସ୍ଥ ବୋଲି ଘୋଷଣା କରିଥିଲେ । ସୁସ୍ଥ ହେବାପରେ ପ୍ଲାଜୁସ ସମସ୍ତ ଘଟଣା ସଂପର୍କରେ ପୋଲିସକୁ କହିବା ସହ ପୂର୍ବ ଶତ୍ରୁତାକୁ କେନ୍ଦ୍ରକରି ତାଙ୍କ ଉପରକୁ ଏଭଳି ମରଣାନ୍ତକ ଆକ୍ରମଣ କରାଯାଇଛି ବୋଲି ସେ ଅଭିଯୋଗ କରିଛନ୍ତି ।