ପିସି ମାଗିଲେ ଫୋନ୍ କର, ଘଂଟି ବଜାଅ : ଦୁର୍ନୀତି ରୋକିବାକୁ ଓଡିଶାର ଆନ୍ଧ୍ର ଫର୍ମୁଲା
କନକ ବ୍ୟୁରୋ : ବହୁତ ହୋଇଗଲା ପିସି । ବ୍ଲକ ସ୍ତରରେ ବହୁତ ସହିଲେ ସାଧାରଣ ଲୋକ । ହିତାଧିକାରୀ ନିଜ ହକ୍ ପାଇବାକୁ ବଂଚିତ ହେଲେ । ସବୁ କ୍ଷେତ୍ରରେ ଲୋକଙ୍କୁ ବ୍ୟତିବ୍ୟସ୍ତ କରୁଥିଲା ଲାଂଚ । ଆଉ ଏବେ ଏହାକୁ ରୋକିବାକୁ ନୂଆ ପଦକ୍ଷେପ ଘୋଷଣା କରିଛି ଭିଜିଲାନ୍ସ । ବିଭାଗ ଦେଇଛି ତତ୍ପରତା । ପିସି ନେଇ ଖୋଳତାଡ ଜାରି ରଖିଥିବା ଏହି ତଦନ୍ତକାରୀ ସଂସ୍ଥା ଜାରି କରିଛି ଫୋନ୍ ନମ୍ବର । ପିସି ମାଗିଲେ ଘଂଟି ବଜାଅ ଅଭିଯାନ । ଅର୍ଥାତ୍ ଫୋନକର ଆଉ ଦୁର୍ନୀତିର କର ପର୍ଦ୍ଦାଫାଶ ।
Kanak News is now on WhatsApp
Join and get latest news updates delivered to you via WhatsApp
ଭିଜିଲାନସ ନିର୍ଦ୍ଦେଶକ ଆର.ପି ଶର୍ମା ସୂଚନା ଦେଇ କହିଛନ୍ତି, ପିସି କିଏ ମାଗୁଥିଲେ ଲୋକେ ଫୋନ କରି ଭିଜିଲାନସକୁ ଜଣାଇପାରିବେ । ପ୍ରଧାନମନ୍ତ୍ରୀ ଆବାସ ଯୋଜନା, ବିଜୁ ପକ୍କାଘର ଯୋଜନାରେ ଲାଂଚ ମାଗୁଥିଲେ ଭିଜିଲାନ୍ସକୁ ଜଣାଇବାକୁ ବିଭାଗ ପକ୍ଷରୁ ଅନୁରୋଧ କରାଯାଇଛି । ଜାରି ହୋଇଥିବା ନମ୍ବର ଗୁଡିକ ହେଲା : ୦୬୭୧-୨୩୦୫୯୮୮, ୨୩୦୫୬୮୨ ଏବଂ ୦୬୭୪- ୨୩୯୭୭୪୮, ୨୨୮୨୩୦୦ । ସେହିଭଳି ଚାଲିଥିବା ତଦନ୍ତ ଉପରେ ସୂଚନା ଦେଇ କହିଛନ୍ତି, ପିସି ନେଇ ମୋଟ ୩୭ଟି ମାମଲା ରୁଜୁ ହୋଇଛି । ଏଥିରେ ୯ ଜଣ ଗିରଫ ହୋଇଛନ୍ତି । ୭୬ଟି ଅଭିଯୋଗ ଉପରେ ଚଦନ୍ତ ଚାଲିଛି । ୪୮ଟି ଅଭିଯୋଗର ତନଖି କରାଯାଉଛି ।
ପିସି କାରବାର ବନ୍ଦ କରିବା ପାଇଁ ଆନ୍ଧ୍ର ସରକାର ନେଇଥିବା ପଦକ୍ଷେପର ଅନୁକରଣ କରିଛନ୍ତି ନବୀନ ସରକାର । ଜାରି ହୋଇଥିଲା ଟୋଲ ଫ୍ରି’ ନମ୍ବର – ୧୧୦୦ । ଲାଂଚ ରୋକିବାକୁ ଆନ୍ଧ୍ରପ୍ରଦେଶ ଆରମ୍ଭ କରିଥିଲା ବଡ଼ ଲଢ଼େଇ । ୧୧୦୦ ନମ୍ବରରେ ଫୋନ କରି ଲାଂଚ ସଂପର୍କରେ ଜଣାଇଲେ, ଲାଂଚ ନେଇଥିବା ସରକାରୀ ବାବୁ ସାଂଗେ ସାଂଗେ ଫେରାଉଛନ୍ତି ଟଙ୍କା । ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁଙ୍କ ଏହି ପଦକ୍ଷେପ ମ୍ୟାଜିକ ଭଳି କାର୍ଯ୍ୟ କରୁଛି ଆନ୍ଧ୍ରରେ । ରୋଜ୍ୟରେ ଏହି ଟୋଲ ଫ୍ରୀ ନମ୍ବର କିଭଳି କାମ କରୁଛି ତାକୁ ଅପେକ୍ଷା ।
ପିସି ବାବଦରେ ପ୍ରଥମେ କନକ ନ୍ୟୁଜ ଖବର ପ୍ରସାରଣ କରିବା ପରେ ସରକାରୀ ସ୍ତରରେ ଆରମ୍ଭ ହୋଇଥିଲା ଧରପଗଡ । ଏହାପରେ ମୁଖ୍ୟମନ୍ତ୍ରୀ, ଜିଲ୍ଲାପାଳ ସମ୍ମିଳନୀରେ ଅଧିକାରୀଙ୍କୁ ନିର୍ଦ୍ଦେଶ ଦେଇ କହିଥିଲେ, ତୃଣମୂଳ ସ୍ତରରେ ପିସି କାରବାର ବନ୍ଦ କରିବାକୁ । ବାବୁମାନଙ୍କୁ ନବୀନଙ୍କ କରିଥିଲେ କଡା ତାଗିଦ । ବ୍ଲକସ୍ତରରେ ପିସି ବା ପର୍ସେଂଟେଜ କାରବାର ବନ୍ଦ କର । ବ୍ଲକସ୍ତରରେ ପିସି କାରବାର ଚାଲିଥିବା ପ୍ରଥମେ କନକ ନ୍ୟୁଜରେ ସ୍ୱୀକାର କରିଥିଲେ ଖୋଦ ପଂଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ । ମନ୍ତ୍ରୀ କହିଥିଲେ, ବ୍ଲକ ସ୍ତରରେ ୧୩ ପ୍ରତିଶତ ପିସି କାରବାର ଚାଲିଛି ଏବଂ ଏହାକୁ ରୋକିବା ଲାଗି ସେ ପଦକ୍ଷେପ ନେଉଛନ୍ତି ।
ଆଉ ଏହାପରେ ଭିଜିଲାନ୍ସ ଆରମ୍ଭ କରିଥିଲା ତଦନ୍ତ । ଖୋଜିଥିଲା ଫାଇଲ, ଦୁର୍ନୀତିଗ୍ରସ୍ତ ଅଧିକାରୀଙ୍କୁ । ବ୍ଲକସ୍ତରରେ ଛାନିଆ ପଶିବା ସହ ରଫାଦଫା କରିବାକୁ ଆରମ୍ଭ ହୋଇଥିଲା ଉଦ୍ୟମ । ରାଜନୀତି ବି ଜୋର ଧରିଥିଲା । କେନ୍ଦ୍ରମନ୍ତ୍ରୀ ଜୁଏଲ ଓରାମ କହିଥିଲେ, ଦୁର୍ନୀତିରେ ଆକଂଠ ବୁଡିଛନ୍ତି ରାଜ୍ୟ ସରକାର । ଜବାବରେ ବିଜେଡି କହିଥିଲା, ଜୁଏଲ ବାବୁଙ୍କର ଅଭିଜ୍ଞତା ଥିବ, ହୁଏତ ସେ ପିସି କାରବାର ବାବଦରେ ବେଶ ଜାଣିଥିବେ ।
ଆଉ ଏହାରି ଭିତରେ ମୁଖ୍ୟ ଶାସନ ସଚିବଙ୍କ ଜିଲ୍ଲାପାଳ ମାନଙ୍କୁ ପିସି ରୋକିବାକୁ ଲେଖିଥିଲେ ଚିଠି । ଯେଉଁଥିରେ ଲେଖାଯାଇଥିଲା, କିଛି ଦୁର୍ନୀତିଖୋର ଅମଲା ଓ ନେତାଙ୍କ ଯୋଗୁଁ ସରକାରଙ୍କ ଛବି ଖରାପ ହେଉଛି । ଗତ ତିନିଟି ଆର୍ଥିକ ବର୍ଷରେ ୧୧ ଲକ୍ଷ ୫୦ ହଜାର ଲୋକଙ୍କୁ ପକ୍କାଘର ଯୋଗାଇ ଦେଇଛନ୍ତି ସରକାର । ହେଲେ କେତେକ ଦୁର୍ନୀତିଗ୍ରସ୍ତଙ୍କ ପାଇଁ ଗ୍ରାମାଂଚଳରେ ସମସ୍ତଙ୍କୁ ପକ୍କାଘର ଯୋଜନା ବାଧାପ୍ରାପ୍ତ ହେଉଛି । ଆବଶ୍ୟକ ହେଲେ ବିଭାଗୀୟ କାର୍ଯ୍ୟାନୁଷ୍ଠାନ ଏପରିକି ଅପରାଧିକ ମାମଲା ପାଇଁ ଏଫଆଇର କରିବାକୁ ମଧ୍ୟ କୁହାଯାଇଥିଲା ।
ଏବେ ନଜର ପକାନ୍ତୁ କିଭଳି ହୁଏ ପିସି କାରବାର ଏବଂ କାହାର ଭାଗ କେତେ?
– କନିଷ୍ଠ ଯନ୍ତ୍ରୀ ୦୩ ପ୍ରତିଶତ
– ସହକାରୀ ଯନ୍ତ୍ରୀ ୦୪ ପ୍ରତିଶତ
– ବିଡିଓ ୦୪ ପ୍ରତିଶତ
– ଅନ୍ୟାନ୍ୟ ବାଟରେ ୦୨ ପ୍ରତିଶତ
ବ୍ଲକରେ ଚାଲେ ୧୩ ପ୍ରତିଶତ ପିସି କାରବାର । ହେଲେ କିଛି ସ୍ଥାନରେ ଏହା ୨୦ ପ୍ରତିଶତ ମଧ୍ୟ ଅତିକ୍ରମ କରିଯାଏ । ବ୍ଲକ୍ ସ୍ତରରେ ଗୋଟିଏ କାମ ପାଇଁ ଯଦି କୋଟିଏ ଟଙ୍କା ଆସେ ତାହେଲେ ପିସି ବାବଦରେ କନିଷ୍ଠ ଯନ୍ତ୍ରୀଙ୍କ ଭାଗରେ ୩ ଲକ୍ଷ, ସହକାରୀ ଯନ୍ତ୍ରୀ ପଆନ୍ତି ୪ଲକ୍ଷ, ବିଡିଓ ୪ଲକ୍ଷ ଓ ଅନ୍ୟାନ୍ୟ ବାଟରେ ଯାଏ ୨ ଲକ୍ଷ ଟଙ୍କା । ମୋଟ୍ ଉପରେ ୧୩ ଲକ୍ଷ ଟଙ୍କା ପିସି ଆକାରରେ ଯାଏ ।
ତେବେ ନିର୍ବାଚନ ଆଗରୁ ଗୋଟିଏ ମାଷ୍ଟର ଷ୍ଟ୍ରୋକ୍ ମାରି ତୃଣମୂଳସ୍ତରରୁ ଦୁର୍ନୀତି ହଟାଇବାକୁ ଅଂଟା ଭିଡିଛନ୍ତି ରାଜ୍ୟ ସରକାର । ହିତାଧିକାରୀଙ୍କୁ ନିଜ ହକରୁ ବଂଚିତ କରାଉଥିବା ଏହି ରାକେଟ କେତେ ଶୀଘ୍ର ପର୍ଦ୍ଦାଫାଶ ହେଉଛି ତା ଉପରେ ନଜର । ତେବେ ବଡ କଥା ହେଉଛି, ସବୁଠି ପିସି କାରବାରରେ ଅଧିକାରୀ ନଥାନ୍ତି, କିଛି ସ୍ଥାନରେ ବିଧାୟକ ଓ ମନ୍ତ୍ରୀଙ୍କ ଇଶାରାରେ କାରବାର ଚାଲିଥାଏ । ଆଉ ପ୍ରଶ୍ନ ଉଠିବ, ଦୁର୍ନୀତିର ଚେର ଯୁଆଡେ ଯୁଆଡେ ଲମ୍ବିଛି, ସେଯାଏଁ ଭିଜିଲାନ୍ସର ହାତ ପହଂଚିପାରିବତ?