କେନ୍ଦୁଝର : ଚମ୍ପୁଆ ବିଧାୟକ ସନାତନ ମହାକୁଡଙ୍କ ଜବରଦଖଲ ଉଚ୍ଛେଦ ଶେଷ ହୋଇଛି । ଗତକାଲି ସନାତନଙ୍କ ବେଆଇନ ନିର୍ମାଣ ଭଙ୍ଗା ଆରମ୍ଭ କରିଥିଲା ଜିଲ୍ଲା ପ୍ରଶାସନ । ଆଜି ଦ୍ୱିତୀୟ ଦିନରେ ବାକି ଥିବା ପାଚେରୀକୁ ଭଙ୍ଗାଯାଇଥିଲା । ପାହାଡ ପରି ପାଚେରୀକୁ ଭାଙ୍ଗି ମାଟିରେ ମିଶାଇ ଦିଆଯାଇଛି । ୫ ଏକରରୁ ଅଧିକ ସରକାରୀ ଜମିରେ ବିଧାୟକ ସନାତନ ମହାକୁଡ କରିଥିବା ବେଆଇନ ନିର୍ମାଣକୁ ହାଇକୋର୍ଟଙ୍କ ନିର୍ଦେଶ ଅନୁସାରେ ଭଙ୍ଗାଯାଇଛି । ୧୯୮୦ ମସିହାରୁ ଖଣିଜ ସଂପଦରେ ଭରପୁର ସର୍ବସାଧାରଣ ସଂପତିକୁ କବଜା କରିଛନ୍ତି କେନ୍ଦୁଝରର ଏହି ବିତଶାଳୀ ବିଧାୟକ । ପରେ ଏହାକୁ ଜଗତଜନନୀ ଟ୍ରଷ୍ଟ ନାଁରେ କରାଇ ଏକ ମନ୍ଦିର ମଧ୍ୟ ତୋଳିଛନ୍ତି । ତେବେ ସନାତନଙ୍କ ବିଶାଳ ଅଟ୍ଟାଳିକା ଭାଙ୍ଗିବ କି ପ୍ରଶାସନ, ତା ଉପରେ ସମସ୍ତଙ୍କ ନଜର ରହିଛି । ଏହାକୁ ନ ଭାଙ୍ଗିବାକୁ କୋର୍ଟଙ୍କ ନିର୍ଦେଶ ଥିବା ଦାବି କରୁଛନ୍ତି ବିଧାୟକ ସନାତନ ମହାକୁଡ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଗତକାଲି ଦିନତମାମ ଚର୍ଚ୍ଚାରେ ଥିବା ବିଧାୟକ ସନାତନ ମହାକୁଡଙ୍କ ଏସି ଗୁହାଳରେ ଆଜି ଚାଲି ନାହିଁ ପ୍ରଶାସନର ବୁଲଡୋଜର । କାରଣ ସନାତନଙ୍କ ଅନୁରୋଧକ୍ରମେ ଏହାକୁ ଭାଙ୍ଗିବା ପାଇଁ ୫ ଦିନ ସମୟ ଦେଇଛି ପ୍ରଶାସନ । ଏଠାରେ ରହୁଥିବା ଗୃହପାଳିତ ପଶୁଙ୍କୁ ଅନ୍ୟତ୍ର ସ୍ଥାନାନ୍ତର କରିବା ପରେ ଗୁହାଳ ଭଙ୍ଗାଯିବ ବୋଲି ଜଣାପିଡିଛି ।