କନକ ବ୍ୟୁରୋ : ମହାରଥୀ କଲେ ମୁହଁ ଖୋଲା ପ୍ରଶଂସା । କିନ୍ତୁ ସେ ପ୍ରଶଂସା ଥିଲା ଏମିତି ଜଣେ ରାଜନେତାଙ୍କୁ ଯାହାଙ୍କୁ ନବୀନ ଏକ ନମ୍ବର ଶତ୍ରୁ ଭାବେ ବିବେଚନା କରନ୍ତି । ଆଜି ଓୟୁଏଟିରେ ଏକ କାର୍ଯ୍ୟକ୍ରମରେ ଭାଷଣ ଦେବା ସମୟରେ କୃଷିମନ୍ତ୍ରୀ ପ୍ରଦୀପ ମହାରଥୀ କହିଛନ୍ତି, ଧର୍ମେନ୍ଦ୍ର ବେଶ୍ ଭଲ କାମ କରୁଛନ୍ତି । ବନ୍ଧୁ ହେବ ତ ଧର୍ମେନ୍ଦ୍ରଙ୍କ ଭଳି । କେନ୍ଦ୍ର କୃଷି ମନ୍ତ୍ରୀ ରାଧାମୋହନ ସିଂଙ୍କୁ ମଧ୍ୟ ପ୍ରଶଂସା କରି କହିଛନ୍ତି, ସେ ତାଙ୍କ ନିଜ ଭାଇ ଭଳି । ଭର୍ତୃହରିଙ୍କ ପରେ ପ୍ରଦୀପ ମହାରଥୀଙ୍କ ବୟାନକୁ ନେଇ ଚର୍ଚା ।
Kanak News is now on WhatsApp
Join and get latest news updates delivered to you via WhatsApp
କଥା ଏତିକିରେ ସରିନଥିଲା, ଭଲ କାମ ପାଇଁ ପ୍ରଶଂସା କରିବାକୁ ଦଳ କିଛି ବାଧକ ନୁହେଁ ବୋଲି ମହାରଥୀ କହିବାକୁ ପଛାଇ ନଥିଲେ । ଅର୍ଥାତ୍ ସିଧାସଳଖ ସୁଚାଇବାକୁ ଚାହିଁଥିଲେ, ମୋଦି ସରକାରଙ୍କ ଭଲ କାମକୁ ପ୍ରଶଂସା କରିବାରେ କୈାଣସି ଭୁଲ ନାହିଁ ।
ସେହିଭଳି ବନ୍ଧୁ ହେବ ତ ଧର୍ମେନ୍ଦ୍ରଙ୍କ ଭଳି ଆଉ ଭାଇ ହେବ ତ ରାଧାମୋହନ ସିଂଙ୍କ ପରି, କିଛି ଏଭଳି ଉକ୍ତି ଆସିଥିଲା କୃଷିମନ୍ତ୍ରୀଙ୍କ ପାଟିରୁ । ବୋଧହୁଏ ମନ କଥା କହିଥିଲେ ମହାରଥୀ । ହେଲେ କାର୍ଯ୍ୟକ୍ରମ ସରିବା ପରେ ଗଣମାଧ୍ୟମକୁ ଉତର ଦେଇ ମହାରଥୀ କହିଥିଲେ, ଆଜି ଭାଇ କହୁଛି, କାଲି ତାଙ୍କ ପାଇଁ ଘାଇ ଖୋଳିବାରେ କିଛି ଅସୁବିଧା ନାହିଁ ।
ଗତ କିଛି ଦିନ ଧରି ବିଜେଡି-ବିଜେପି ରାଜନୀତି ଏକ ରୋଚକ ମୋଡରେ ଥିବା ବେଳେ ଉଭୟ ଦଳର ନେତା ପରସ୍ପର ଉପରେ ଆରୋପ ପ୍ରତ୍ୟାରୋପ କରିବାକୁ ପଛାଉନଥିଲେ । ଆଉ ଏଭଳି ସ୍ଥଳେ ମହାରଥୀଙ୍କ ଉକ୍ତି ପରେ ଧର୍ମେନ୍ଦ୍ର କହିଛନ୍ତି, ଆଗକୁ ଏହା ତାଙ୍କ ପାଇଁ ସମ୍ପଦ କି ବିପଦ ଆଣୀବ, ପ୍ରଭୁ ଜଗନ୍ନାଥଙ୍କୁ ଜଣା । ଖାଲି ଏତିକି ନୁହେଁ, ଟ୍ୱିନସିଟିରେ ପ୍ରଧାନମନ୍ତ୍ରୀ ଉର୍ଜ୍ଜା ଗଂଗା ଯୋଜନାର ଶୁଭାରମ୍ଭ ବେଳେ ଧର୍ମେନ୍ଦ୍ରଙ୍କୁ ପ୍ରଶଂସାରେ ପୋତିଥିଲେ ସାଂସଦ ଭର୍ତୃହରି ।
କିଛି ଦିନ ତଳେ ଆସିଥିଲା ଟ୍ୱିଟର ଝଡ । ସାଂସଦ ତଥାଗତ ଶତପଥୀ କହିଥିଲେ, ବିଜେପି ବିଜେଡିକୁ ଭାଙ୍ଗିବାକୁ ଉଦ୍ୟମ କରୁଛି । ବୈଜୟନ୍ତ ଆତ୍ମସମୀକ୍ଷା କରିବାକୁ ଦଳ ସୁପ୍ରିମୋଙ୍କୁ ପରାମର୍ଶ ଦେଇଥିଲେ । ବିଜେଡିରେ ବିବାଦ ଆଉ ବିପତି ମାଡି ଆସୁଥିବା ବେଳେ କୃଷିମନ୍ତ୍ରୀଙ୍କ ଏହି ବୟାନକୁ ତାଙ୍କ ଚିରାଚରିତ ଡାଇଲଗ ଭାବେ ଦେଖାଯିବ ନା ଏହା ପଛରେ କିଛି ଗୁଢ ରହସ୍ୟ ରହିଛି, ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା ।