ବଲାଙ୍ଗିରରେ ପଂଚାୟତ ନିର୍ବାଚନକୁ ନେଇ ଜୋର ଧରିଲା ପ୍ରଚାର ଅଭିଯାନ:କ୍ୟାମ୍ପେନ ପାଇଁ ଘରେ ଘରେ ପହଂଚିଲେ ରାଜ ପରିବାରର ସଦସ୍ୟ
କନକ ବ୍ୟୁରୋ : ପଂଚାୟତ ନିର୍ବାଚନ ପାଇଁ ନାମାଙ୍କନ ସରିବା ପରେ ଏବେ ସବୁଠି ବୃଦ୍ଧି ପାଇଛି ରାଜନୈତିକ ଉଷ୍ମତା । ବଲାଙ୍ଗିରରେ ମଧ୍ୟ ଏହାର ତାତି ବେଶ୍ ବାରି ହୋଇପଡୁଛି । ପଂଚାୟତ ନିର୍ବାଚନ ପାଇଁ ପୁଣିଥରେ ବଲାଙ୍ଗିରରେ ମୁହାଁମୁହିଁ ହୋଇଛନ୍ତି ରାଜ ପରିବାର । କାକା ଅନଙ୍ଗ ଉଦୟ ସିଂଦେଓ ଏବଂ ପୁତୁରା କନକ ବର୍ଦ୍ଧନ ସିଂଦେଓଙ୍କ କ୍ୟାମ୍ପ ଭିତରେ ଲଢେଇ । ଏବେ ଏୟୁଙ୍କ କ୍ୟାମ୍ପର ମଙ୍ଗ ଧରିଛନ୍ତି ଦୁଇପୁଅ କଳିକେଶ ଓ ଅର୍କେଶ । ନବୀନ ସରକାରଙ୍କ ୧୭ବର୍ଷ ଶାସନର ବିଭିନ୍ନ ଜନକଲ୍ୟାଣମୂଳକ କାମକୁ ଲୋକଙ୍କ ପାଖରେ ପହଂଚାଇ, ଜିଲ୍ଲା ଦଖଲ କରିବାକୁ ରଣନୀତି ପ୍ରସ୍ତୁତ କରିଛି ରାଜ ପରିବାରର ବିଜେଡି କ୍ୟାମ୍ପ । ଏହାରି ଭିତରେ ଶେଷ ହୋଇଛି ନାମାଙ୍କନ ପତ୍ର ଦାଖଲ । ଏବେ ଘରକୁ ଘର ବୁଲି ନିଜ ସପକ୍ଷରେ ସମର୍ଥନ ହାସଲ ପାଇଁ ପ୍ରଚାର କରିବେ ଏହି ଦୁଇ ରାଜକୁମାର ।
Kanak News is now on WhatsApp
Join and get latest news updates delivered to you via WhatsApp
ସେପଟେ ମୋଦିଙ୍କ ମଙ୍ଗୁଆଳ ସାଜି ବଲାଙ୍ଗିରରେ ବିଜେପି ବାନା ଉଡାଇବାକୁ ବି ସମସ୍ତ ପ୍ରସ୍ତୁତି ଶେଷ କରିଛି କେଭିଙ୍କ କ୍ୟାମ୍ପ । ପ୍ରସଙ୍ଗ ଭିତିରେ ପ୍ରଚାର କରିବ ଦଳ । ରାଜ୍ୟରେ ନବୀନଙ୍କ ୧୭ ବର୍ଷ ଶାସନର ବିଫଳତା ଓ କେନ୍ଦ୍ରରେ ମୋଦିଙ୍କ ଅଢେଇ ବର୍ଷ ଶାସନର ସଫଳତାକୁ ଲୋକଙ୍କ ପାଖରେ ପହଂଚାଇବ । ବିଧାନସଭାରେ ବିଜେପି ବିଧାୟକ ଦଳ ନେତା ଥିବା କନକ ବର୍ଦ୍ଧନ ସିଂଦେଓଙ୍କ ନେତୃତ୍ୱରେ ବଲାଙ୍ଗିର ଜିଲ୍ଲା ଦଖଲ କରିବାକୁ ବି ଆଶା ବାନ୍ଧି ବସିଛି ବିଜେପି । ଅନ୍ୟପଟେ ପାଟଣାଗଡରେ ବିଜେଡି ପ୍ରାର୍ଥୀଙ୍କ ଲାଗି ପ୍ରଚାର କାର୍ଯ୍ୟରେ ଲାଗିପଡିଛନ୍ତି ଭାଇବୋହୂ ପ୍ରକୃତି କୁମାରୀ ସିଂଦେଓ । ସାହାଯ୍ୟ କରିବାକୁ ହାଇକମାଣ୍ଡ ମନ୍ତ୍ରୀ ସ୍ନେହାଙ୍ଗୀନି ଛୁରିୟାଙ୍କୁ ବି ପଠାଇଛନ୍ତି ।
ସେପଟେ ରାଜ ପରିବାରର ଲଢେଇରୁ ଫାଇଦା ନେବାକୁ ବସିଛି କଂଗ୍ରେସ । ବିକାଶକୁ ମୁଦ୍ଦା କରି ଉଭୟ ବିଜେଡି ଓ ବିଜେପିକୁ ଚେକମେଟ ଦେବାଲାଗି ସ୍ୱତନ୍ତ୍ର ରଣନୀତି କରିଛନ୍ତି ଅଭିଜ୍ଞ ନେତା ନରସିଂହ ମିଶ୍ର । ବିଧାନସଭାରେ ନିଜର ଶାଣିତ ଆକ୍ରମଣରେ ସରକାରଙ୍କୁ ହଇରାଣରେ ପକାଇ ଦେଉଥିବା ବିରୋଧୀ ଦଳ ନେତାଙ୍କ ନେତୃତ୍ୱରେ ଦଳ ବଲାଙ୍ଗିର ଲଢେଇରୁ ଫାଇଦା ନେବାକୁ ଅନାଇ ବସିଛି । ପଶ୍ଚିମ ଓଡିଶାର ଏ ପ୍ରମୁଖ ଜିଲ୍ଲାକୁ କିଏ କରିବ ଦଖଲ, ସେଥିପାଇଁ ଆରମ୍ଭ ହୋଇଯାଇଛି ବଳ କଷାକଷି । ହେଲେ ରୋଚକ ହୋଇଛି ରାଜପରିବାର ଭିତରେ ରାଜନୀତିର ଲଢେଇ ।
ଦେଖନ୍ତୁ ଏହି ଭିଡିଓ :