ପ୍ରଥମ ପର୍ଯ୍ୟାୟ ଭୋଟ୍ ଗଣତି ପରେ ଛାନିଆ ଶାସକ ଦଳ : ନିଜ ନିଜ ଗଡ ଉପରେ ନେତାଙ୍କ ସତର୍କ ଦୃଷ୍ଟି
କନକ ବ୍ୟୁରୋ : ପ୍ରଥମ ପର୍ଯ୍ୟାୟ ଭୋଟଗଣତିର ଫଳାଫଳ ଦେଖିବା ପରେ ଏବେ ସମସ୍ତ ନଜର ସେହି ଅଂଚଳର ନେତାଙ୍କ ଉପରେ । ଆଜି ମତଦାନ ହେଉଥିବା ଅଂଚଳରେ କିଭଳି ଭଲ ପ୍ରଦର୍ଶନ କରିବ ଦଳ, ସେନେଇ ଏହି ସ୍ଥାନୀୟ ବିଧାୟକମାନେ ରଣନୀତି ପ୍ରସ୍ତୁତ କରିଛନ୍ତି । ବୌଦ୍ଧର ୩ଟି ଜୋନ୍ରେ ଆଜି ନିର୍ବାଚନ ହେଉଥିବା ବେଳେ ସ୍ଥାନୀୟ ବିଧାୟକ ତଥା ଅର୍ଥମନ୍ତ୍ରୀ ପ୍ରଦୀପ ଅମାତଙ୍କ ଉପରେ ନଜର ରହିବ ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ଧର୍ମଗଡ ବିଧାୟକ ତଥା ମନ୍ତ୍ରୀ ପୁଷ୍ପେନ୍ଦ୍ର ସିଂଦେବ ନିଜ ଅଂଚଳରେ ପ୍ରଦର୍ଶନ କରିପାରିନଥିବା ବେଳେ ଏବେ ଜୁନାଗଡ ବିଧାୟକ ତଥା ବିଜେଡି ମୁଖପାତ୍ର ଦିବ୍ୟଶଙ୍କର ମିଶ୍ରଙ୍କ ଉପରେ ନଜର ରହିବ । ତାଙ୍କ ନିର୍ବାଚନ ମଣ୍ଡଳୀର ୬ଟି ଜୋନରେ ଆଜି ଭୋଟ୍ ଗ୍ରହଣ ହେଉଛି । ସେହିପରି ନିମାପଡା ବିଧାୟକ ତଥା ବିଜେଡି ମୁଖପାତ୍ର ସମୀର ଦାଶଙ୍କ ଅଂଚଳରେ ୮ଟି ଜୋନରେ ମତଦାନ ହେଉଛି । ଆରପଟେ ବିଜେଡି ବିଧାୟକ ତଥା ପୂର୍ବତନ ମନ୍ତ୍ରୀ ସଂଜୀବ ସାହୁଙ୍କ ଅଂଚଳରେ ମଧ୍ୟ ମତଦାନ ଚାଲିଛି । ପ୍ରଥମ ପର୍ଯ୍ୟାୟରେ ଝଟକା ଲାଗିଥିବା ବେଳେ ଏହି ପର୍ଯ୍ୟାୟରେ ନିଜ ଅଂଚଳରେ କିଭଳି ଦଳ ଭଲ ପ୍ରଦର୍ଶନ କରିବ ତା ଉପରେ ନଜର ରଖିଛନ୍ତି ମନ୍ତ୍ରୀ ଦେବୀ ପ୍ରସାଦ ମିଶ୍ର । କଂଗ୍ରେସର ବିଧାୟକ ନବ ଦାସଙ୍କ ଅଂଚଳରେ ମଧ୍ୟ ଆଜି ମତଦାନ ହେଉଛି ।
ସେପଟେ ସୁକିନ୍ଦାରେ ବିଜେଡି ବିଧାୟକ ପ୍ରିତିରଂଜନ ଘଡେଇ ନିଜ ଅଂଚଳ ଦଳର ସ୍ଥିତି ବଂଚାଇ ରଖିବାକୁ ଚେଷ୍ଟା କରୁଥିବା ବେଳେ ବାଲିଅନ୍ତା ଓ ବାଲିପାଟଣା ଅଂଚଳ ଉପରେ ନଜର ରଖିଛନ୍ତି ଶଶିଭୂଷଣ ବେହେରା । ସେପଟେ ସୁ୍ଦାମ ମାରାଣ୍ଡି ଓ ସାନନ୍ଦ ମାରାଣ୍ଡିଙ୍କ ଗଡରେ ମଧ୍ୟ ଆଜି ହେଉଛି ନିର୍ବାଚନ । ପରିବହନ ମନ୍ତ୍ରୀ ରମେଶ ମାଝିଙ୍କ ଅଂଚଳରେ ମଧ୍ୟ ଆଜି ମତାଦାନ ହେଉଥିବା ବେଳେ ବିଜେପି ରାଜ୍ୟ ସଭାପତି ବସନ୍ତ ପଣ୍ଡାଙ୍କ ଅଂଚଳରେ ମତଦାନ ହେଉଛି । ୨୦୧୨ ନିର୍ବାଚନରେ ଏହି ୧୭୫ଟି ଜିଲ୍ଲା ପରିଷଦ ଆସନରୁ ୭୭ ପ୍ରତିଶତ ଆସନ ବିଜେଡି ଅକ୍ତିଆର କରିଥିବା ବେଳେ କଂଗ୍ରେସ ହାତକୁ ୧୩ ଓ ବିଜେପି ହାତକୁ ୨ ପ୍ରତିଶତ ଆସନ ଯାଇଥିଲା ।