ଅନାହାର ଓ ଅପପୁଷ୍ଟିର କାହାଣୀକୁ ନେଇ ନଗଡା ଗାଁ : ନଗଡାର ଦୁଃଖକୁ ପାଖରୁ ଦେଖିଥିଲା କନକ ନ୍ୟୁଜ ଟିମ୍
ନଗଡା : ଯାଜପୁର ଜିଲ୍ଲାର ସଦର ମହକୁମା ଠାରୁ ୬୫ କିଲୋମିଟର ରାସ୍ତା। ସୁକିନ୍ଦା ବ୍ଲକ୍ ଚିଙ୍ଗୁଡିପାଳ ପଂଚାୟତର ନଗଡା ଗାଁ । ଡୁବୁରୀ , ସୁକିନ୍ଦା ପରେ କାଳିଆପାଣି ହାଟ ଦେଇ କନକ ନ୍ୟୁଜର ମିଶନ୍ ନଗଡା ଆଗକୁ ମାଡି ଚାଲିଥିଲା। ହେଲେ କାଳିଆପାଣି ହାଟ ଠାରୁ କିଛି ବାଟ ଯିବା ପରେ ସରିଯାଇଥିଲା ରାସ୍ତା। ଆଉ ଏଇଠୁ ଆରମ୍ଭ ହୋଇଥିଲା ନଗଡାକୁ ପଡିଥିବା ମୃତ୍ୟୁର ସେତୁ । ଅଜଣା ଜଙ୍ଗଲ । ଆଦିବାସୀଙ୍କ ପାଦ ଯେଉଁଠି ପଡିଛି , ସେଇଠି ତିଆରି ହୋଇଛି ରାସ୍ତା । ଆଉ ସେ ରାସ୍ତାକୁ ଅତିକ୍ରମ କରି ନଗଡାରେ ପହଂଚିବାକୁ ଆମର ସ୍ପେଶାଲ ଟିମ୍ ଆରମ୍ଭ କରିଥିଲା ଅଭିଯାନ। ମାଟି ତଳେ ପ୍ରାଚୁର୍ଯ୍ୟ , ଆଖି ଚାରିପାଖରେ ପ୍ରକୃତି । ଲଗାଣ ବର୍ଷାର ଆତଙ୍କ ଭିତରେ ଅଭିଶପ୍ତ ଶିଶୁଙ୍କ ପାଖରେ ପହଂଚିବାକୁ ଆମ ଟିମ୍ ଆଗକୁ ଆଗକୁ ମାଡି ଚାଲିଥିଲା।
Kanak News is now on WhatsApp
Join and get latest news updates delivered to you via WhatsApp
ନିର୍ଜନ ଘଂଚ ଜଙ୍ଗଲ । ପାଦେ ପାଦେ ବିପଦ । ହାତ ଧରାଧରି ହୋଇ ଆମ ଟିମ୍ ଆଗକୁ ମାଡି ଚାଲିଥିଲା । ହେଲେ ପାହାଡି ନଈର ଗୋଳି ପାଣି ଖୁବ୍ ଡରାଇଥିଲା । କାରଣ ବର୍ଷା ପାଇଁ ନଈର ସ୍ରୋତ ଯେମିତି ଲଗାମ ଛଡା ହୋଇଯାଇଥିଲା । ସମତଳ ରାସ୍ତା ପାରି ହେବା ବେଳକୁ ମଧ୍ୟାହ୍ନ ୧୨ଟା । ତଥାପି ବି ନଗଡା ଗାଁ ଦିଶୁନଥାଏ । ସାତକୁଲିଆ ଓ କମାରୁଣୀ , ଏହି ଦୁଇ ପାହାଡ ମଝିରେ ନଗଡା ଗାଁ । ଦୁମ୍ ଦୁମ୍ ବର୍ଷାରେ ଖସଡା ପାହାଡ ଚଢି ଗାଁ ମୁଣ୍ଡରେ ଓହ୍ଲାଇଲା ଆମ ଟିମ୍ । ପ୍ରାୟ ୫ ଘଂଟା ପରେ ପାଦ ପଡିଥିଲା ନିଖୋଜ ହୋଇ ପଡିଥିବା ନଗଡା ଗାଁରେ । ୧୪ଟି ଖଣି ଓ ୧୦ଟି କାରଖାନା । ଓଡିଶା ଅର୍ଥନୀତିର ପ୍ରଗତିର ସାରଥୀ ଯାଜପୁର ଜିଲ୍ଲା। ହେଲେ ଦୀପତଳ ଅନ୍ଧାର ଭଳି ନଗଡାର ସ୍ଥିତି-ପରିସ୍ଥିତି । ମାସକୁ ଥରେ ପାହାଡ ଚଢି , ପାହାଡ ଓହ୍ଲାଇ ଗାଁ ଲୋକେ ଆସନ୍ତି ସରକାରଙ୍କ ଟଙ୍କିକିଆ ଚାଉଳ ନେବାକୁ । ରୋଗ ବଇରାଗ ହେଲେ କଥା ସରିଲା । ଗାଁରେ ମାଳମାଳ ପିଲା। ସ୍ୱାସ୍ଥ୍ୟକେନ୍ଦ୍ର କଥା ଛାଡନ୍ତୁ , ଅଙ୍ଗନୱାଡି କେନ୍ଦ୍ରଟିଏ ନାହିଁ ଗାଁରେ ।
ପାହାଡ ଖୋଳିଲେ ମୂଲ୍ୟବାନ କ୍ରୋମାଇଟ୍ । ହେଲେ ପାହାଡ ଉପରେ ଅଭାବି ଚରିତ୍ରଙ୍କ ଭିଡ। ୟାରି ଭିତରେ ଅନାହାର ଓ ଅପପୁଷ୍ଟି କାହାଣୀକୁ ନେଇ ନଗଡା ଗାଁ। ଯେଉଁଠି ମଡକ ପଡିଲେ ମିଡିଆ ପହଂଚେ। ଆଉ ସରକାର ଟିଭି ପରଦାରେ କରୁଣ ଚିତ୍ରକୁ ଦେଖି ପ୍ରସ୍ତୁତ କରନ୍ତି ଯୋଜନା।