ବିଧାୟକ ପ୍ରଶାନ୍ତ ଜଗଦେବଙ୍କ ଦାଦାଗିରି : ବୋଲଗଡ ତହସିଲଦାରଙ୍କୁ ଆକ୍ରମଣ ଅଭିଯୋଗ
ବୋଲଗଡ : ବିଧାୟକ ପ୍ରଶାନ୍ତ ଜଗଦେବଙ୍କ ଆକ୍ରମଣରେ ଆହତ ହୋଇଛନ୍ତି ବୋଲଗଡ ତହସିଲଦାର ନିହାରୀକା ନାୟକ । ବୋଲଗଡ ଏକଡାଳିଆ ଗାଁରେ ଥିବା ଏକ ବିବାଦୀୟ ଘର ଭାଙ୍ଗିବାକୁ ନେଇ ସେ ବିଧାୟକଙ୍କୁ ଗୋଟିଏ ଦିନ ସମୟ ମାଗିଥିଲେ । ଏଥିରେ ଉତକ୍ଷିପ୍ତ ହୋଇ ବିଧାୟକ ତାଙ୍କୁ ଆକ୍ରମଣ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ବୋଲଗଡର ମାଣିବନ୍ଧ ପଂଚାୟତର ଏକଡାଳିଆ ଗାଁକୁ ସଂଯୋଗ କରୁଥିବା ପ୍ରଧାନମନ୍ତ୍ରୀ ଗ୍ରାମ୍ୟ ରାସ୍ତା ମଝିରେ ମାଣିବନ୍ଧ ଗାଁର ଅକ୍ରୁର ବାହୁବଳେନ୍ଦ୍ର ତାଙ୍କ ସ୍ଥିତିବାନ ଜାଗା ଥିବା ଦର୍ଶାଇ ଏକ ଘର ତିଆରି କରିଥିଲେ । ଫଳରେ ଅଂଚଳବାସୀ ସେହି ରାସ୍ତାରେ ଯାତାୟତରେ ବହୁ ଅସୁବିଧାର ସମ୍ମୁଖିନ ହେଉଥିଲେ । ଏପରିକି ଚାରିଚକିଆ ଯାନବାହାନ ଯାତାୟତରେ ବି ଅସୁବିଧା ଲାଗିରହିଥିଲା ।
ସୋମବାର ଦିନ ବାହୁବଳୀ ବିଧାୟକ ପ୍ରଶାନ୍ତ ଜଗଦେବ ସେହି ରାସ୍ତା ଦେଇ ଯିବା ବେଳେ ଏହା ଦେଖି ତହସିଲଦାର ନିହାରୀକା ନାୟକଙ୍କୁ ସମ୍ପୃକ୍ତ ଜାଗାକୁ ଆସିବା ପାଇଁ ଫୋନ୍ ଯୋଗେ କହିଥିଲେ । ବିଧାୟକ ଅନ୍ୟ ଏକ କାର୍ଯ୍ୟକ୍ରମରେ ଯୋଗଦେଇ ଫେରିଲାବେଳକୁ ରାତି ପ୍ରାୟ ୮ଟା ବେଳେ ସେଠାରେ ପହଂଚିଥିଲେ ।
ରାସ୍ତା ଉପରୁ ଘର ଉଠାଇବା ପାଇଁ ଘର ମାଲିକ ଅକ୍ରୁରଙ୍କୁ କହିବା ସହ କ୍ଷତିପୂରଣ ପ୍ରତିଶ୍ରୁତି ଦେଇଥିଲେ ପ୍ରଶାନ୍ତ ଜଗଦେବ । ଏହାସହ ନୋଟିସ ଦେଇ ତୁରନ୍ତ ଘର ଭାଙ୍ଗିବାକୁ ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ ବିଧାୟକ ।
ତେବେ ରାତି ହୋଇଯାଇଥିବାରୁ ମଙ୍ଗଳବାର ଦିନ ଜାଗା ମାପି ଘର ଭାଙ୍ଗିବାକୁ କହିଥିଲେ ତହସିଲଦାର । ଏଥିରେ ଉତକ୍ଷିପ୍ତ ହୋଇ ଜଗଦେବ ଅକ୍ରୁରଙ୍କ ଘରେ ଜଳୁଥିବା ଏକ ଲଣ୍ଠନ ଆଣି ଏକ ବାଇକରେ କଚାଡି ଦେବାରୁ ଏଥିରେ ଆହତ ହୋଇଛନ୍ତି ତହସିଲଦାର ନିହାରୀକା ନାୟକ ।