ଉଦଘାଟନକୁ ବିତିଯାଇଛି ଅଢେଇ ମାସ ! ଏବେବି ସମ୍ପୁର୍ଣ୍ଣ କାର୍ଯ୍ୟକ୍ଷମ ହୋଇପାରିନି ମାଲକାନଗିରିର ନୂଆ ହସ୍ପିଟାଲ, ପୁରୁଣା ଡାକ୍ତରଖାନା ଯାଉଛନ୍ତି ରୋଗୀ ।
କନକ ବ୍ୟୁରୋ : କଥାରେ ଅଛି ଥାନା, ପାଇଖାନା ଓ ଡାକ୍ତରଖାନାରେ କେବେ ତାଲା ପଡେ ନାହିଁ । ହେଲେ ମାଲକାନଗିରିର ୭ ମହଲା ବିଶିଷ୍ଟ ଅତ୍ୟାଧୁନିକ ମଲ୍ଟି ସ୍ପେଶାଲିଟି ହସ୍ପିଟାଲର ବିଭିନ୍ନ ବିଭାଗରେ ତାଲା ପଡିଛି । ନୂଆ ଡାକ୍ତରଖାନାରେ ସମୟ ସାରଣୀ ମୁତାବକ କେବଳ ଓପିଡି ସେବା ଯୋଗାଇବାରେ ସଫଳ ହୋଇଛି ସ୍ୱାସ୍ଥ୍ୟ ବିଭାଗ । ମୁଖ୍ୟମନ୍ତ୍ରୀଙ୍କ ଦ୍ୱାରା ଉଦଘାଟନର ଅଢେଇ ମାସ ପରେ ନୂଆ କୋଠାରେ ଡାକ୍ତରଙ୍କୁ ପରାମର୍ଶ କରି ଅଢେଇ କିଲୋମିଟର ଦୂରରେ ଥିବା ପୁରୁଣା ଡାକ୍ତରଖାନାରେ ପରୀକ୍ଷା ନୀରିକ୍ଷା କରୁଛନ୍ତି ରୋଗୀ ।
Kanak News is now on WhatsApp
Join and get latest news updates delivered to you via WhatsApp
ନିର୍ଧାରିତ ସମୟ ଅନୁସାରେ ସକାଳ ୮ଟାରୁ ୧୨ଟା, ଦିନ ୩ଟାରୁ ଅପରାହ୍ନ ୫ଟା ଯାଏଁ ଡାକ୍ତରଖାନା ଖୋଲା ହେଉଛି । ମାଲକାନଗିରି ନୂତନ ମୁଖ୍ୟ ଚିକିତ୍ସାଳୟରେ ୬ ଘଂଟିଆ ଚିକିତ୍ସା ଚାଲିଛି । ଉଦଘାଟନ ଆଢେଇ ମାସ ପରେ ଏହି ମଲ୍ଟି ସ୍ପେଶାଲିଟି ହସ୍ପିଟାଲରେ କେବଳ ସାଧାରଣ ବର୍ହି ବିଭାଗ ଚିକିତ୍ସା ବ୍ୟବସ୍ଥା କରି ଚୁପ୍ ବସିଛି ସ୍ୱାସ୍ଥ୍ୟ ବିଭାଗ । ଏଠାରେ ନାଁ ରେଜିଷ୍ଟ କରି ଡାକ୍ତରଙ୍କୁ ପରାମର୍ଶ କରିବା, ଟେଷ୍ଟ, ଏକ୍ସରେ ଓ ଅଲଟ୍ରାସାଉଣ୍ଡ ପାଇଁ ପୁରୁଣା କୋଠାକୁ ଦୌଡୁଛନ୍ତି ରୋଗୀ ।
ଜୁଲାଇ ୨୬ ତାରିଖରେ ୭ ମହଲା କୋଠାକୁ ଉଦଘାଟନ୍ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ୫୦ କୋଟି ଟଙ୍କା ବ୍ୟୟରେ ନିର୍ମାଣ ହୋଇଥିବା ୩୦୦ ଶର୍ଯ୍ୟା ବିଶିଷ୍ଟ ନୂଆ ଡାକ୍ତରଖାନାରେ କେବଳ ଓପିଡି ରହିଛି । ନୂଆ ଡାକ୍ତରଖାନାରେ ପୂର୍ବହ୍ନରେ ୪ ଘଂଟା ଓ ଅପରାହ୍ନରେ ୨ ଘଂଟା ଚିକିତ୍ସା ଯୋଗାଉଛନ୍ତି ଡାକ୍ତର । ବାକି ସବୁ ପରୀକ୍ଷା ନିରୀକ୍ଷା ଚାଲିଛି ପୁରୁଣା ଡାକ୍ତରଖାନାରେ । ନୂଆ ଡାକ୍ତରଖାନାରୁ ପୁରୁଣା ଡାକ୍ତରଖାନାର ମଧ୍ୟରେ ଅଢେଇ କିଲୋମିଟର ଦୂରତା ରହିଛି । ଫଳରେ ରୋଗୀ ଅଟୋ ଭଡା କରି ଏ ଡାକ୍ତରଖାନାରୁ ସେ ଡାକ୍ତରଖାନାକୁ ଦୌଡୁଛନ୍ତି ।
ପରିଚାଳଣାଗତ ତୃଟି ଯୋଗୁ ଡାକ୍ତରଖାନାରେ ଅଗ୍ନି ନିରାପତା, ଅକ୍ସିଜେନ ସଂଯୋଗିକରଣ, ପାନୀୟ ଜଳ ପରି ଅନୁସାଙ୍ଗିକ ବ୍ୟବସ୍ଥା ହୋଇ ପାରିନାହିଁ । ଫାୟାର ଫାଇଟିଙ୍ଗ କାମ ଜାରି ରହି ଥିବା ବେଳେ ଫାୟାର ସେଫଟି କାମ ସରିବାକୁ ଆହୁରି ୬ ମାସ ଲାଗିବ । ଆଇ.ସି.ୟୁ ଓ ବିଭିନ୍ନ ବିଭାଗର ଓାର୍ଡରେ ଅକ୍ସିଜେନ ସଂଯୋଗିକରଣ ପାଇଁ ଅର୍ଥ ବ୍ୟୟ ବରାଦ ହୋଇନଥିବା ଜଣାପଡିଛି । ଏପରି ସ୍ଥିତିରେ ମଲ୍ଟି ସ୍ପେଶାଲିଟି ହସ୍ପିଟାଲରେ ରକ୍ତ ଭଣ୍ଡାର କଥା ନକହିବା ଭଲ । କେବଳ ଭିତ୍ତିଭୂମି ନୁହେଁ, ମାଲକାନଗିରି ଜିଲ୍ଲାର ଏହି ମଲ୍ଟି ସ୍ପେଶାଲିଟି ଡାକ୍ତରଖାନାର ସୁପରିଚାଳଣା ଲାଗି ୬୭ ଜଣ ଡାକ୍ତରଙ୍କ ଆବଶ୍ୟକତା ଥିବା ବେଳେ ଅଛନ୍ତି ମାତ୍ର ୨୬ ଜଣ ଡାକ୍ତର । ଏପରି ସ୍ଥିତିରେ କେମିତି ଚାଲିବ ଏହି ବିରାଟ ଡାକ୍ତରଖାନା ତାକୁ ନେଇ ଉଠିଛି ପ୍ରଶ୍ନ ।